«قازاقستاننىڭ تانىمال اۋىر اتلەتى اننا نۇرمۇحامبەتوۆا لوندون وليمپياداسىنىڭ كۇمىس جۇلدەگەرى اتاندى» دەگەن جاڭالىقتى جانكۇيەرلەر جىلى قابىلدادى.
كەزىندە جاستار بۋىنى اراسىنداعى جارىستاردا جاقسى ناتيجە كورسەتكەن اننا 2012 جىلى لوندوندا الاۋى تۇتانعان وليمپيا ويىندارىندا 69 كگ سالماق دارەجەسىندە ونەر كورسەتىپ, ۇزدىك بەستىكتى تۇيىندەدى. ونىڭ كورسەتكىشى – 251 (115+136) كگ. الايدا ارادا ءبىراز ۋاقىت وتكەننەن سوڭ بەلارۋستىڭ قوس سپورتشىسى – اتالعان جارىستىڭ قولا جۇلدەگەرى مارينا شكەرمانكوۆا مەن ءتورتىنشى ساتىعا جايعاسقان دينا سازانوۆەتستىڭ دوپينگ قولدانعانى انىقتالىپ, ولار ءتۇرلى مەرزىمگە ۇلكەن سپورتتان شەتتەتىلدى. سونىڭ ارقاسىندا نۇرمۇحامبەتوۆا ءۇشىنشى ورىنعا كوتەرىلدى. كوپ ۇزاماي كۇمىس مەدالدى يەلەنگەن رۋمىنيالىق روكسانا كوكوشتىڭ دا قانىنان رۇقسات ەتىلمەگەن ءدارى-دامەكتىڭ نىشانى تابىلىپ, ول دا قاتاڭ جازالاندى. وسىلايشا, لوندون وليمپياداسىنىڭ كۇمىس جۇلدەسى ءبىزدىڭ قىزعا بۇيىردى.
كۇنى كەشە پەرۋدە وتكەن جاسوسپىرىمدەر اراسىنداعى الەم بىرىنشىلىگى بارىسىندا حالىقارالىق وليمپيادا كوميتەتىنىڭ (حوك) قۇرمەتتى مۇشەسى يۆان ديبوس لوندون وليمپياداسىنىڭ كۇمىس مەدالىن اننا نۇرمۇحامبەتوۆاعا سالتاناتتى تۇردە تابىس ەتتى. ءسويتىپ, ارادا 12 جىل وتكەننەن سوڭ جۇلدە ءوز يەسىن تاپتى.
سالتاناتتى راسىمدە تولقىنىسىن جاسىرا الماعان اننا: «پەرۋدەگى الەم چەمپيوناتىنا كەلگەنىمەن قۋانىشتىمىن. بۇل جەردە ماعان وليمپيادانىڭ مەدالى تابىستالدى. قازىر قانداي سەزىمدە ەكەنىمدى قۇر سوزبەن جەتكىزە الماسپىن. مەنى ماراپاتتاعان فەدەراتسيا مەن حوك مۇشەسىنە ءوز العىسىمدى بىلدىرەمىن. 2012 جىلعى وليمپيا ويىندارىنىڭ كۇمىس جۇلدەگەرى اتانعانىما قۋانىشتىمىن. بۇل – مەنىڭ مانسابىمداعى ەڭ ءىرى تابىس. وسى جارىسقا قاتىسىپ جاتقان جاس سپورتشىلارعا تابىس پەن ءتوزىم جانە ساتتىلىك تىلەيمىن», دەپ اعىنان جارىلدى.