«Alageum Electric» ەلەكتر ماشينا جاساۋ سالاسىنداعى جەتەكشى ءوندىرۋشى كومپانيا قۇرامىنا كىرەتىن, كەرنەۋى 110, 220, 500 كۆ, ال قۋاتى 500 مۆا-عا دەيىنگى ترانسفورماتور جابدىقتارىن شىعاراتىن «Asia Trafo» جشس 5 جىلدان بەرى نارىقتا تابىستى جۇمىس ىستەپ كەلەدى. «تاسساي» يندۋستريالدى ايماعىنداعى 12 گەكتار اۋماقتا ورنالاسقان ءوندىرىس ورنىندا 250 ادام ەڭبەك ەتەدى. ورتاشا جالاقىسى – 428 مىڭ تەڭگە.
تمد-عا تانىمال زاۋىت
كاسىپورىندا اۆتوترانسفورماتورلار, كۇشتىك ماي ترانسفورماتورلارى, قۋاتى 500 مۆا, كەرنەۋى 110, 220, 500 كۆ رەاكتورلار شىعارىلادى. وندىرىستىك قۋاتى جىلىنا 12 000 مۆا-دان اسادى نەمەسە 120 ترانسفورماتوردى قۇرايدى. بۇگىنگى تاڭدا جىلدىق قۋاتتىلىعى 70 ترانسفورماتورعا جەتىپ وتىر. كومپانيا ونىمدەرى استانا, شىمكەنت قالاسى مەن تۇركىستان, پاۆلودار, وسكەمەن, اقتاۋ, قاراعاندى, اتىراۋ وڭىرلەرىندەگى قوسالقى ستانسالارعا ورناتىلعان. سونىمەن بىرگە, ءونىمنىڭ 16 پايىز ۇلەسى سىرت ەلدەرگە ەكسپورتتالادى.
ەكسپورت ۇلەسىن ارتتىرۋ ماسەلەسىنە دە ەرەكشە كوڭىل ءبولىپ وتىر. سونىڭ اياسىندا تمد ەلدەرى نارىعىنا كەرنەۋى 110 كۆ جانە ودان دا جوعارى ترانسفورماتور جابدىقتارىن جونەلتۋدى ارتتىرا بەرمەك. كاسىپورىن جىل سايىن جاڭا ءونىم تۇرلەرىن يگەرۋدى الدىنا ماقسات ەتىپ قويعان. سول ءۇشىن بىلتىر قۋاتى 250 000 كۆا, كەرنەۋى 500 كۆ ءۇش فازالى ورىنداۋداعى اۆتوترانسفورماتور جاساپ شىعاردى. بۇل, البەتتە, زاۋىت تاريحىنداعى ەڭ ءىرى وندىرىستىك جەتىستىك. ءتىپتى مۇنى تۇتاس ەلىمىزدىڭ جەتىستىگىنە بالاساق بولادى. مۇنداي ءىرى كولەمدەگى كۇردەلى تەحنولوگيالىق ەلەكتر جابدىعىن جاساۋ قازاقستاندا جالعىز وسى زاۋىتتىڭ قولىنان كەلىپ وتىر. جوعارىدا اتالعان اۆتوترانسفورماتوردىڭ ۇزىندىعى 13 مەتردەن, ال بيىكتىگى 10 مەتردەن اسادى, سالماعى – 300 تونناعا جۋىق.
زاۋىت ەڭ سوڭعى ۇلگىمەن جابدىقتالعان
كۇردەلى تەحنولوگيالىق ءونىم شىعارىلاتىندىقتان جۇمىسشىلاردىڭ بىلىكتىلىگىنە قاتتى كوڭىل بولىنەدى. سوندىقتان ولاردى وقىتۋ, شەبەرلىكتەرىن شىڭداۋ ۇزدىكسىز ءجۇرىپ وتىرادى. «Asia Trafo» ونىمدەرى ساپا مەنەدجمەنتى, قاۋىپسىزدىك, ەڭبەكتى قورعاۋ, ەكولوگيالىق مەنەدجمەنت بويىنشا ءتۇرلى حالىقارالىق سەرتيفيكاتتارمەن راستالعان.
زاۋىتتا ەڭ سوڭعى ۇلگىدەگى جابدىقتار مەن ستانوكتار ورناتىلعان. ولار ەڭبەك ونىمدىلىگىن ارتتىرىپ, جۇمىستىڭ كوپ بولىگىن اۆتوماتتاندىرۋعا, ءونىم ساپاسىن جاقسارتۋعا كوپ ۇلەس قوسىپ وتىر. ءتىپتى وندىرىستىك باسقارۋدا الەمدەگى برەند ونىمدەر شىعاراتىن الپاۋىت كومپانيالاردىڭ وزىق تاجىريبەلەرى قولدانىلادى. ەكولوگيالىق تازالىقتى ساقتاۋ ماقساتىندا كاسىپورىن اۋماعىندا 1 500-دەن استام جەمىس اعاشى وتىرعىزىلعان. سونداي-اق بىلىكتى كادرلاردى دايارلاۋ مەن دۋالدى وقىتۋ جۇيەسىن كۇشەيتۋ باعىتىندا ەلىمىزدىڭ جەتەكشى تەحنولوگيالىق جوعارى وقۋ ورىندارىمەن ارنايى كەلىسىمدەر جاسالعان. ماسەلەن, وتكەن جىلى زاۋىت بازاسىندا اشىلعان ساتباەۆ ۋنيۆەرسيتەتىنىڭ «ەنەرگەتيكا» كافەدراسى سونىڭ ءبىر ايعاعى.
كاسىپورىن 2019 جىلى شىمكەنتتە وتكەن «قازاقستاننىڭ ۇزدىك تاۋارى» وڭىرلىك كورمەسىندە «وندىرىستىك ماقساتتاعى ۇزدىك تاۋارلار» نوميناتسياسىنىڭ جەڭىمپازى اتانعان. ءدال وسى نوميناتسيانى كومپانيا بىلتىرعى بايقاۋدا دا جەڭىپ الدى.
جالپى, كاسىپورىننىڭ جوبالىق قۇنى – 32 ملرد تەڭگەگە تەڭ. ونىڭ 17,4 ملرد تەڭگەسى – كومپانيانىڭ جەكە قاراجاتى. قالعان ينۆەستيتسيالىق قارجىنى كومپانيا بانكتەن نەسيەگە العان. «تاسساي» يندۋستريالدى ايماعىندا ورنالاسقانى ءۇشىن جانە ينوۆاتسيالىق ءونىم شىعاراتىندىقتان كاسىپورىنعا مەملەكەت تاراپىنان ءبىرتالاي جەڭىلدىك قاراستىرىلعان. ايتالىق, تەحنولوگيالىق جابدىقتى اكەلگەنى ءۇشىن باج سالىعىنان, سونداي-اق مولشەرلەمە بويىنشا جەر, م ۇلىك, كورپوراتيۆتىك تابىس سالىعىنان بوساتىلعان.
بۇكىل بولشەكتى ءوزى وندىرەدى
«Asia Trafo» جشس باسقارما توراعاسى ومار اسانوۆتىڭ ايتۋىنشا, كاسىپورىن ترانسفورماتوردىڭ بارلىق بولشەگىن ءوزى جاساپ شىعارادى. سوندىقتان ونىڭ ونىمدەرىن ءجۇز پايىز وتاندىق ءونىم دەۋگە تولىق نەگىز بار. كوپتەگەن ەلدە ءتىپتى ەۋروپا مەملەكەتتەرىنىڭ وزىندە, قاسىمىزداعى كورشى رەسەيدە دە ترانسفورماتوردى تولىق ءبىر زاۋىت وندىرمەيدى. ءار بولشەگىن ءارتۇرلى زاۋىت جاسايدى. ال «Asia Trafo» ترانسفورماتورعا قاجەتتى بۇكىل ماڭىزدى بولشەكتەرىن ءبىر ءوزى جاساپ, ونى سىناقتان وتكىزىپ, ساپالى قۇراستىرىپ شىعارادى. ترانسفورماتور جابدىعى ءوزىنىڭ ءتول ءونىمى بولعاندىقتان ونىڭ ساپاسىنا دا كۇمان كەلتىرمەيدى. سوندىقتان 5 جىلعا كەپىلدىك مەرزىممەن بەرەدى. كاسىپورىن سونداي-اق بۇزىلعان شەتەلدىك ترناسفورماتورلارعا وتاندىق كومپانيالاردىڭ وتىنىشىمەن جوندەۋ جۇمىستارىن جۇرگىزەدى.
«شىمكەنت قالاسىن 30-40 پايىز ەلەكتر ەنەرگياسىمەن قامتاماسىز ەتەتىن «بوزارىق» قوسالقى ستانساسىندا ءورت شىعىپ, «سيمەنس» كومپانياسىنىڭ ترانسفورماتورلارى جارامسىز كۇيگە تۇسكەن. سونى جوندەدىك. وسى كۇنگە دەيىن يتاليا, ۋكراينا, قىتاي ترانسفورماتورلارىنىڭ قانشاماسىن جوندەپ تاستادىق. نەگىزىندە جابدىقتى جاساعان ەل ءوزى قالپىنا كەلتىرۋ كەرەك. بىراق ول جاققا جىبەرىپ, جوندەتۋگە قانشاما ۋاقىت پەن قاراجات جۇمسالادى. ەكى ورتادا اۋرە بوپ جۇرگەندە قوندىرعىنىڭ كەپىلدەمە مەرزىمى دە ءبىتىپ قالۋى مۇمكىن. سوندىقتان قالتاسىن ويلاعان جەرگىلىكتى كومپانيا, مەكەمەلەر ترانسفورماتورلارىن بىزگە اكەپ جوندەتەدى. ترانسفورماتوردىڭ ەڭ كەرەكتى بولشەگىنىڭ ءبىرى – ەلەكتر تەحنيكالىق بولات ماتەريالى. ونى تاباقشا كۇيىندە ساتىپ اكەلىپ, ارنايى پىشىندە كەسىپ قاباتتاستىرىپ جينايمىز. يرەلەڭدەگەن مىس شيكىزاتىنان جۇقا سىم ءيىرىپ, سوسىن ونى ورايمىز. ودان قالسا قاعاز-كارتوننان ەلەكتر جابدىقتارىن يزولياتسيالاپ, سىرتىن قاپتايمىز. قوندىرعىنىڭ تەمىر قاڭقاسى دا تسەحتاردا ەلەكترمەن دانەكەرلەنىپ قۇراستىرىلادى. كەيىن جەكە-جەكە بولشەكتەردىڭ باسىن قۇراپ, جيناپ, ارنايى بولمەدە سىناقتان وتكىزەمىز. بۇل وندىرىستىك تىزبەك اسا دالدىك پەن اۋقىمدى ەڭبەك كۇشىن تالاپ ەتەدى. سول سەبەپتى, ماماندار بىلىكتىلىگى مەن ستانوكتاردىڭ زاماناۋي ۇلگىسىنە باسا كوڭىل بولەمىز. الداعى مىندەتىمىز – ءوندىرىس قۋاتتىلىعىن ارتتىرىپ, ەكسپورتتىق الەۋەتىمىزدى كۇشەيتۋ. وسىعان بار كۇش-جىگەرىمىزدى سالامىز», دەدى سەرىكتەستىك باسقارما توراعاسى و.اسانوۆ.
الەۋمەتتىك احۋالعا كوڭىل بولەدى
كاسىپورىندا ەڭبەككەردىڭ الەۋمەتتىك تۇرمىسىن جاقسارتۋعا بارىنشا قولايلى جاعداي قاراستىرىلعان. ماسەلەن, جاڭادان وتاۋ قۇرعان جاس جۇبايلارعا – 1 ملن تەڭگە, ءاربىر دۇنيەگە كەلگەن سابيگە 400 مىڭ تەڭگە سىياقى بەرىلەدى. سونداي-اق ءوز ەركىمەن شەتەلگە بىلىكتىلىگىن ارتتىرۋعا بارعان جۇمىسشىنىڭ وقۋ اقىسى مەن ءجۇرىپ-تۇرۋ شىعىندارىن كومپانيا تولىق ءوزى وتەيدى. بۇدان بولەك, وتباسىلى جاس ماماندارعا زاۋىت جانىنان جاتاقحانا دا ۇسىنىلعان.
شىمكەنت