قازاقستان بوكسشىلارى جەرەبە بويىنشا تايلاندتاعى ليتسەنزيالىق ءتۋرنيردى بۇگىن باستادى. كوماندا قۇرامىنان العاش بولىپ, نازىم قىزايباي شارشى الاڭعى شىقتى, دەپ جازادى Egemen.kz.
50 كەلى سالماق دارەجەسىنىڭ العاشقى اينالىمىندا نازىم سلوۆاكيالىق نيكول دۋريكوۆامەن كەزدەستى.
وتانداسىمىز سلوۆاكيا چەمپيونى, U22 ەۋروپا چەمپيوناتىنىڭ كۇمىس جانە قولا جۇلدەگەرى نيكول دۋريكوۆانى ەكىنشى راۋندتا مەرزىمىنەن بۇرىن جەڭدى.
سلوۆاكيالىق سپورتشى ءبىر راۋندتا ەكى رەت نوكداۋن الىپ, رينگتەگى تورەشى جەكپە-جەكتى توقتاتۋ تۋرالى شەشىم قابىلدادى.
«بۇل ءالى قۋاناتىن جاعداي ەمەس. ءبىرىنشى كەزدەسۋ بولعاندىقتان العاشقى راۋندتا قارسىلاستى زەرتتەپ, كۇشتى ەكىنشى راۋندقا سالدىم», دەدى نازىم قىزايباي قازاقستان بوكس فەدەراتسياسىنىڭ ءباسپاسوز قىزمەتىنە بەرگەن سۇحباتىندا.
وسىلايشا نازىم قىزايباي پاريج جولداماسى ءۇشىن كۇرەسىن ءارى قاراي جالعاستىرادى.