بۇگىن سەناتتا مەملەكەت باسشىسىنىڭ «ادىلەتتى قازاقستاننىڭ ەكونوميكالىق باعدارى» اتتى قازاقستان حالقىنا جولداۋىن ىسكە اسىرۋ اياسىندا «قازاقستان رەسپۋبليكاسىندا ەكونوميكانىڭ وڭدەۋشى سەكتورىن دامىتۋ» تاقىرىبىنا ارنالعان پارلامەنتتىك تىڭداۋ ءوتتى. ءىس-شارا بارىسىندا سالانى دامىتۋعا قاتىستى وزەكتى ماسەلەلەر كەڭىنەن تالقىلاندى. سونداي-اق قاتىسۋشىلار كوتەرىلگەن ماسەلە جونىندە ۇسىنىستارىن ايتىپ, مۇددەلى تاراپتاردىڭ الداعى بىرلەسكەن جۇمىسىنىڭ باسىمدىقتارىن پىسىقتادى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
تىڭداۋ كەزىندە مەملەكەت باسشىسىنىڭ ەلىمىزدىڭ مىقتى ونەركاسىپتىك نەگىزىن قالىپتاستىرۋ جانە ەكونوميكامىز ءوزىمىزدى تولىق قامتاماسىز ەتە الاتىن جاعدايعا جەتۋ مىندەتىن جۇكتەگەنى ايتىلدى. بۇل رەتتە وڭدەۋ سەكتورىن جەدەل دامىتۋدىڭ ماڭىزى زور.
سەنات توراعاسى ماۋلەن اشىمباەۆ قازىرگى ۋاقىتتا ەلىمىزدىڭ الدىندا 2029 جىلعا قاراي ۇلتتىق ەكونوميكانىڭ كولەمىن 2 ەسەگە ۇلعايتىپ, ونى 450 ميلليارد دوللارعا جەتكىزۋ جونىندە ماڭىزدى مىندەت تۇرعانىن اتاپ ءوتتى. سوعان قاراماستان وڭدەۋشى سەكتوردا قوردالانعان پروبلەمالار از ەمەس. ونىڭ ىشىندە وندىرىستىك قورلاردىڭ ابدەن توزۋى, ءوندىرىس قۋاتىنىڭ جەتكىلىكسىز جۇكتەلۋى, بىلىكتى كادرلاردىڭ تاپشىلىعى, شيكىزات يمپورتىنا تاۋەلدىلىك سەكىلدى ماسەلەلەر بار.
«وڭدەۋ سەكتورىنىڭ شامامەن 40 پايىزى مەتاللۋرگياعا تيەسىلى. ولار نەگىزىنەن تومەن دەڭگەيدە وڭدەلگەن ونىمدەر, ارالىق تۇتىنۋ تاۋارلارى جانە ونەركاسىپتىك شيكىزات. شيكىزاتتىق ەمەس ەكسپورتقا قاتىستى جاعداي دا وسىنداي. جالپى, وڭدەۋ سەكتورى ءالى كۇنگە دەيىن يمپورتقا تاۋەلدى بولىپ قالىپ وتىر. بۇل اسىرەسە, تەحنولوگيالىق ونىمدەرگە جانە شيكىزاتقا قاتىستى ەكەنىن ايتا كەتكەن ءجون. سونداي-اق كادرلارمەن قامتاماسىز ەتۋ ماسەلەسى دە وزەكتى», دەدى پالاتا سپيكەرى.
سونىمەن قاتار تىڭداۋ بارىسىندا قاتىسۋشىلار قارجىلاندىرۋعا قول جەتكىزۋ ماسەلەسىن تالقىلادى. سەناتورلار كەشە پالاتا وتىرىسىندا كاسىپكەرلىك سالاعا كرەديت بەرۋ تەتىكتەرىن قاراۋ كەزىندە وسى تۇيتكىلدى ءىشىنارا كوتەرگەن بولاتىن. قازىرگى تاڭدا نەسيەلەۋ مولشەرلەمەسى 22 پايىزعا دەيىن جەتەدى. ال, بۇل وڭدەۋشى سەكتورداعى كاسىپورىنداردىڭ دامۋىنا كەدەرگى كەلتىرەتىنى انىق.
ءىس-شارا كەزىندە وتاندىق شيكىزاتتىڭ جەكەلەگەن تۇرلەرىنىڭ جوعارى قۇنىنا بايلانىستى پروبلەمالار دا ءسوز بولدى. بۇل قايتا وڭدەلگەن ءونىمنىڭ باسەكەگە قابىلەتتىلىگىن تومەندەتەدى. سونداي-اق وتىرىسقا قاتىسۋشىلار جەتكىزىلەتىن تاۋارلار كولەمىن ۇلعايتۋ جانە قايتا وڭدەلەتىن ءونىم نومەنكلاتۋراسىن كەڭەيتۋ بويىنشا جۇمىستى كۇشەيتۋ قاجەت ەكەنىن ايتتى.
سەنات توراعاسى ونەركاسىپ سەكتورىن دامىتۋ ىسىندەگى سىن-قاتەرلەردى نازارعا الىپ, الداعى كەزەڭگە ارنالعان بىرلەسكەن جۇمىستىڭ نەگىزگى مىندەتتەرىنە توقتالدى. پالاتا سپيكەرىنىڭ ايتۋىنشا, ورتا بيزنەستەگى وندىرۋشىلەردى قولداۋ جانە ولاردى دامىتۋ باسىم باعىتتاردىڭ ءبىرى. سوندىقتان اتالعان ساناتتىڭ ەرەكشەلىگىن ەسكەرە وتىرىپ, وسىنداي كاسىپورىنداردى ىنتالاندىرۋدىڭ جاڭا تەتىكتەرىن ازىرلەۋ ۇسىنىلدى.
«پرەزيدەنتىمىز وندىرىلەتىن ءونىمدى قايتا وڭدەۋ دەڭگەيىن ارتتىرۋ جونىندە ناقتى تاپسىرما بەردى. سونىڭ اياسىندا وڭدەۋ ونەركاسىبىن مەملەكەت تاراپىنان قولداۋدىڭ قوسىمشا شارالارىن پىسىقتاعان ءجون. وسى باعىتتاعى پروبلەمالار مەن كەدەرگىلەردى انىقتاۋ ءۇشىن سالاعا جاسالعان بارلىق قولداۋ شارالارىنىڭ تيىمدىلىگىن تەكسەرۋ جانە باعالاۋ ماڭىزدى. سونىمەن قاتار, بۇگىن اتاپ وتىلگەندەي, وڭدەۋ ونەركاسىبى ءۇشىن بىلىكتى كادرلار دايارلاۋ قاجەت. نارىق قاجەتتىلىكتەرىنە جاۋاپ بەرەتىن مامانداردى دايارلاۋ ءۇشىن ءبىلىم بەرۋ مەكەمەلەرى مەن كاسىپورىندار اراسىنداعى بايلانىستى نىعايتۋدىڭ ماڭىزى زور. جالپى, وڭدەۋشى سەكتورداعى احۋالدى جاقسارتۋ ءۇشىن مەملەكەت, بيزنەس, دەپۋتاتتار جانە عىلىمي-ءبىلىم بەرۋ مەكەمەلەرى بىرلەسىپ, كەشەندى ءارى جۇيەلى جۇمىس جۇرگىزۋگە ءتيىس», دەگەن ماۋلەن اشىمباەۆ پارلامەنت الداعى ۋاقىتتا دا اتالعان باعىتتاعى ماڭىزدى باستامالارعا قاجەتتى زاڭنامالىق قولداۋ كورسەتۋگە دايىن ەكەنىن تىلگە تيەك ەتتى.
پارلامەنتتىك تىڭداۋ كەزىندە ەلىمىزدىڭ ونەركاسىپ جانە قۇرىلىس ءمينيسترى قانات شارلاپاەۆ, وڭدەۋشى ونەركاسىپ وداعىنىڭ توراعاسى مارات باققۇلوۆ, قازاقستان ماشينا جاساۋ وداعىنىڭ توراعاسى مەيرام پىشەمباەۆ, قازاقستان حيميكتەر وداعىنىڭ ۆيتسە-پرەزيدەنتى تاحمينا ناعۇمانوۆا, دۇنيەجۇزىلىك بانكتىڭ ساراپشىسى اسەت بيجان جانە تاعى باسقا ساراپشىلار ءسوز سويلەپ, كوتەرىلگەن ماسەلەگە قاتىستى ۇسىنىستارىن جەتكىزدى.