ءباا استاناسى ءابۋ-دابيدە دزيۋدوشىلاردىڭ الەم چەمپيوناتى باستالعان بەتتە اسا جەڭىل سالماق دارەجەسىندە بەلدەسكەن ءابيبا ابۋجاقىنوۆا قولا جۇلدەنى ولجالاپ, ءوز جانكۇيەرلەرىن قۋانتقان ەدى. بىراق ودان كەيىن قورجىنىمىزعا بىردە-ءبىر مەدال تۇسكەن جوق.
بالۋاندارىمىز ويسىراي ۇتىلدى
ەكىنشى جارىس كۇنى ەلىمىزدىڭ بەس دزيۋدوشىسى تاتاميگە شىققانىمەن, بارلىعى دا باستاپقى باسەكەدە جەڭىلىستىڭ كەرمەك ءدامىن تاتتى. اسىرەسە 66 كگ سالماق دارەجەسىندە كۇش سىناسقان عۇسمان قىرعىزباەۆقا زور سەنىم ارتقان ەدىك. 31 جاستاعى ساقا سپورتشى وسىدان ءۇش جىل بۇرىن بۋداپەشتتە وتكەن دۇنيەجۇزىلىك دودادا كۇمىس مەدالدى يەلەنگەن ەدى. ودان بولەك, ازيا چەمپيوناتىندا ەكى رەت جەڭىس تۇعىرىنا كوتەرىلىپ, گراند سلەم مەن گران-پري تۋرنيرلەرىندە توپ جاردى. ءبىر سوزبەن ايتساق, عۇسمان – تاجىريبەسى ابدەن تولىسقان, ءبىر باسىنا جەتەرلىك اتاق-داڭقى بار بالۋان. بىراق ءابۋ-دابيدەگى دوداعا ول دايار بولماي شىقتى. قىرعىزباەۆ العاشقى اينالىمدا ءيزرايلدىڭ وكىلى تال فليكەرگە جول بەردى.
73 كگ سالماقتاعى دانيار شامشاەۆتىڭ دا ەسىمى كوپشىلىككە ەتەنە تانىس. جاس دارىن 2022 جىلى استانادا ايدى اسپانعا ءبىر-اق شىعارىپ, ازيا چەمپيونى اتاندى. ءبىر كەرەمەتى, سول اتاققا قول جەتكىزۋگە دانيارعا بار-جوعى 149 سەكۋند جەتكىلىكتى بولدى. ياعني 2,5 مينۋتتاي ۋاقىتتا ول ءتورت بىردەي قارسىلاسىن جولىنان ىعىستىرىپ, سارى قۇرلىقتىڭ باس بالۋانى دەڭگەيىنە جەتتى. بىراق پارسى شىعاناعىندا شامشاەۆ «شابىسىنان» جاڭىلدى. بۇل جارىستا قانداسىمىز مولدوۆالىق ءادىل وسمانوۆتان ويسىراي ۇتىلدى. سول سەكىلدى جانارىس راحمەتقالي (66 كگ) فرانتسيالىق ۆاليد حيارعا, باقىتجان ءابدىراحمانوۆ (73 كگ) گەرمانيالىق يگور ۆاندتكەگە, باقىت قۇساقباەۆا (57 كگ) تۇركيالىق اچەليا توپىراققا ەسە جىبەردى.
سول كۇنى 73 كگ سالماق دارەجەسىندە كۇرەسكەن ازەربايجاندىق حيدايات گەيداروۆتىڭ اسقان شەبەرلىگىنە ءتانتى بولدىق. ول كوسوۆالىق اكيل گياكوۆا, يسپانيالىق سالۆادور كاسەس روسا, برازيليالىق دانيەل كارگنين, گەرمانيالىق يگور ۆاندتكە جانە جاپونيالىق تاتسۋكي يشيحارانى جەڭىپ, الەم چەمپيونى اتاندى. بۇل بالۋان بىزگە دە بوتەن ەمەس. حيدايات 1997 جىلدىڭ جازىندا قاراعاندىدا دۇنيەگە كەلگەن. بالاۋسا شاعىندا اكە-شەشەسىمەن بىرگە تاريحي وتانىنا قونىس اۋداردى. ازەربايجان قۇراماسى ساپىندا ول الەم چەمپيوناتىنىڭ ءۇش دۇركىن قولا جۇلدەگەرى, ءتورت دۇركىن ەۋروپا چەمپيونى, دۇنيەجۇزىلىك ۋنيۆەرسيادانىڭ ەكى دۇركىن جۇلدەگەرى, ەۋروپا ويىندارىنىڭ قولا جۇلدەگەرى, يسلام ىنتىماقتاستىعى ويىندارىنىڭ جەڭىمپازى اتاندى. مىنە, ەندى ح.گەيداروۆ ءوزىنىڭ سپورتتىق مانسابىنداعى ەڭ زور تابىسقا قول جەتكىزىپ وتىر.
جەڭىمپازدار مەن جۇلدەگەرلەر
ەرلەر. 66 كگ: 1. رەما تاناكا (جاپونيا), 2. تاكەشي تاكەوكا (جاپونيا), 3. لۋكاس ساحا (فينليانديا) مەن ۆاجا مارگۆەلاشۆيلي (گرۋزيا).
73 كگ: 1. حيدايات گەيداروۆ (ازەربايجان), 2. تاتسۋكي يشيحارا (جاپونيا), 3. انحزايا لاۆدجارگال (موڭعوليا) مەن نيلس ستۋمپ (شۆەيتساريا).
ايەلدەر. 57 كگ: 1. حەو ميمي (وڭتۇستىك كورەيا), 2. كريستا دەگۋچي (كانادا), 3. دجەسسيكا كليمكەيت (كانادا) مەن مومو تاماوكي (جاپونيا).
ەسميگۇل ەسە جىبەردى
ءۇشىنشى كۇنى قازاقستاننىڭ ەكى دزيۋدوشىسى ونەر كورسەتۋگە ءتيىس ەدى. بىراق دەنساۋلىعىنىڭ سىر بەرۋىنە بايلانىستى 81 كگ سالماقتاعى ابىلايحان جۇبانازار تاتاميگە شىققان جوق. وسى ورايدا فەدەراتسيا باسشىلارى مەن ۇلتتىق قۇراما باپكەرلەرىنە قوياتىن مىناداي سۇراعىمىز بار: اسا ماڭىزدى جارىسقا قاتىسقالى وتىرعان بالۋان الدىن الا تەكسەرىستەن وتپەگەن بە؟ ەگەر ونىڭ دەنساۋلىعىندا اقاۋ بولسا, دۇنيەنىڭ ءدۇلدۇل جۇيرىكتەرى باس قوسقان باسەكەگە اپارۋدىڭ نە قاجەتى بار ەدى؟ سوندا كەڭ بايتاق قازاق ەلىندە ابىلايحاندى الماستىراتىن ەشكىم تابىلمادى ما؟ بۇعان باسشىلار مەن باپكەرلەردىڭ ايتار ءۋاجى قانداي؟
سودان بارشا قازاق جانكۇيەرلەرىنىڭ نازارى 22 جاستاعى ەسميگۇل كۋيۋلوۆاعا اۋدى. بىلتىر ازيا ويىندارى مەن بيىل قۇرلىق چەمپيوناتىندا قولا مەدالدى موينىندا جارقىراتقان بۇرىمدىمىز جارىستى ءساتتى باستادى. تۇساۋكەسەر كەزدەسۋىندە ەسميگۇل قىرعىزستاندىق ادينا كوچكونباەۆانى قاپى قالدىردى. ەكىنشى كەزەڭدە كاپە-ۆەردە وكىلى ساندرا بيلليەتتىڭ اياعىن كوكتەن كەلتىردى. بىراق ودان ارىگە كۋيۋلوۆانىڭ ءالى جەتپەدى. ءۇشىنشى اينالىمدا ەۋروپا چەمپيوناتىنىڭ قولا جۇلدەگەرى, پولشالىق انجەليكا شيمانسكاياعا ەسە جىبەرگەن ول جارىس جولىنان شىعىپ قالدى.
جەڭىمپازدار مەن جۇلدەگەرلەر
ەرلەر. 81 كگ: 1. تاتو گريگالاشۆيلي (گرۋزيا), 2. تيمۋر اربۋزوۆ (رەسەي), 3. لي دجۋن حۆان (وڭتۇستىك كورەيا) مەن سومون ماحامادبەكوۆ (تاجىكستان).
ايەلدەر. 63 كگ: 1. دجوان ۆان ليسحاۋت (نيدەرلاند), 2. انجەليكا شيمانسكايا (پولشا), 3. كلاريسس اگبەنەنۋ (فرانتسيا) مەن لاۋرا فازليۋ (كوسوۆو).
قىزداردان دا قايىر بولمادى
ءتورتىنشى كۇنى ەكى بۇرىمدىمىز بوزكىلەمگە بەتتەدى. 70 كگ سالماقتاعى ەكاتەرينا توكارەۆانى رەسەيدەن «وسى ءبىزدىڭ كوسەگەمىزدى كوگەرتەدى» دەپ اتتاي قالاپ الدىرعان ەدىك. بۇعان دەيىن ول ءوز ەلىنىڭ چەمپيوناتىندا كۇمىس جۇلدەگەر اتانىپ, بىرنەشە حالىقارالىق جارىستا ولجاعا كەنەلدى. بىراق ۇلتتىق كوماندانىڭ ساپىنا ىلىگە الماعاننان كەيىن قازاقستانعا قونىس اۋدارۋدى قۇپ كوردى. بىلتىر ەل بىرىنشىلىگىندە باس جۇلدەنى ولجالاعاننان كەيىن ءتۇرلى بايراقتى باسەكەلەردە قازاق ەلىنىڭ تۋى استىندا ونەر كورسەتە باستادى. الايدا ءالى دە اۋىز تولتىرىپ ايتارلىقتاي تابىسقا جەتە العان جوق. ءباا-دەگى جارىستىڭ العاشقى اينالىمىندا توكارەۆا وزبەكستاندىق گۇلنوزا ماتنيازوۆانى جەڭگەنىمەن, ەكىنشى كەزەڭدە يسپانيالىق اي تسۋنودوعا ەسە جىبەردى.
78 كگ سالماقتاعى ارۋنا جانگەلدينانىڭ دا ۇلتتىق قۇراما ساپىندا جۇرگەنىنە ءبىراز جىلدىڭ ءجۇزى بولدى. بىراق ونىڭ دا جەتىستىگى شامالى. ءارى كەتكەندە قۇرلىقتىق دەڭگەيدەگى جارىستاردا جۇلدە الۋمەن شەكتەلىپ جاتىر. الەمدىك دودالاردا العاشقى اينالىمداردان اسقان ەمەس. بۇل جولى دا سولاي بولدى. ارۋنا تۇساۋكەسەر كەزدەسۋىندە ۇلىبريتانيالىق ەمما رەيدتىڭ «وڭاي ولجاسىنا» اينالدى. ال ەرلەردىڭ 90 كگ سالماق دارەجەسىندە قازاق بالۋاندارى ونەر كورسەتكەن جوق.
جەڭىمپازدار مەن جۇلدەگەرلەر
ەرلەر. 90 كگ: 1. گوكي تادزيما (جاپونيا), 2. نەمانيا مايدوۆ (سەربيا), 3. ەرلان شەروۆ (قىرعىزستان) پەن تريستاني موساحليشۆيلي (يسپانيا).
ايەلدەر. 70 كگ: 1. مارگو پينو (فرانتسيا), 2. ماري-يۆ گايە (فرانتسيا), 3. شيحو تاناكا (جاپونيا) مەن مادينا تايمازوۆا (رەسەي).
78 كگ: 1. اننا-ماريا ۆاگنەر (گەرمانيا), 2. اليسا بەللاندي (يتاليا), 3. مادلەن مالونگا (فرانتسيا) مەن ەمما رەيد ( ۇلىبريتانيا).