«رولان گارروستا» كىمنىڭ باعى جانادى؟

«رولان گارروستىڭ» 133 جىلدىق تاريحى بار. اتالعان ءتۋرنيردىڭ تۇساۋى سوناۋ 1891 جىلى كەسىلدى. سول كەزدەن بەرى جاقسىلار مەن جايساڭداردىڭ تالايى پاريج كورتتارىندا ورەلى ونەرىمەن ءدۇيىم جۇرتتى قۋانتتى. سولاردىڭ اراسىنان رافاەل ءنادالدى بولە-جارا اتاۋعا بولادى. يسپانيانىڭ ماقتانىشى 2005-2022 جىلدار ارالىعىندا ۇيىم­داستىرىلعان 14 جارىستا الدىنا جان سالعان جوق. وسىنداي وراسان زور تابى­سىنىڭ ارقاسىندا جانكۇيەرلەر ءنادالدى «گرۋنت كورولى» دەپ اتادى.

حح عاسىردىڭ العاشقى جارتىسىندا فرانتسيانىڭ قوس ساڭلاعى – ماكس دەكيۋجي مەن انري كوشە جاسىنداي جارقىلدادى. العاشقىسى – سەگىز, ەكىنشىسى بەس رەتتەن باس جۇلدەنى ولجالادى. جەتپىسىنشى جىلدارى شۆەتسيالىق بورن بورگتىڭ داڭقى دۇركىرەدى. سكانديناۆيالىق ساڭلاق التى تۋرنيردە توپ جاردى.

ايەلدەر اراسىنداعى ەڭ ۇزدىك كورسەت­كىش كريس ەۆەرتكە تيەسىلى. 1974-1986 جىلدار ارالىعىندا اقش تەننيسشىسى جەتى مارتە تەڭدەسسىز دەپ تانىلدى. فران­تسيالىق سيۋزان لەنگلەن (1920-1926) مەن گەرمانيالىق شتەففي گرافف (1987-1999) التى رەتتەن دارا شىقتى.

بىلتىر وتكەن جارىستا ەرلەر اراسىندا نوۆاك دجوكوۆيچ جەڭىمپاز اتاندى. سەربيانىڭ ساڭلاعى فينالدا نورۆەگيالىق كاسپەر رۋدتى قاپى قالدىردى – 7:6, 6:3, 7:5. ايەلدەر سايىسى پولشالىق يگا سۆەنتەكتىڭ جارقىن جەڭىسىمەن اياقتالدى. الەمنىڭ ءبىرىنشى راكەتكاسى اقتىق سىندا چەحيالىق كارولينا مۋحوۆادان ايلاسىن اسىردى – 6:2, 5:7, 6:4.

«رولان گارروستا» قازاقستاننىڭ بىردە-ءبىر تەننيسشىسى ۇزدىك تورتتىكتىڭ قاتا­رىنان كورىنە العان جوق. كەزىندە ياروسلاۆا شۆەدوۆا (2010, 2012) ەكى رەت شيرەك فينالدا وينادى. كەيىننەن يۋليا پۋتينتسەۆا (2016, 2018) مەن ەلەنا رىباكينا دا (2021) ءدال سول مەجەدەن كورىندى. وزگە مىقتى تەننيسشىلەرىمىز ەكىنشى اينالىمنان اسا العان جوق. ءيا, 2015 جىلى شۆەدوۆانىڭ اقتىق سىنعا دەيىن القىنباي جەتىپ, فينالدا ونەر كورسەتكەنى راس. بىراق بۇل كورسەتكىشكە ول جۇپتىق سايىستا قول جەتكىزدى.

بيىل ەلەنا رىباكينا مەن يۋليا پۋتينتسەۆا, الەكساندر بۋبليك پەن الەكساندر شەۆچەنكو پاريجدەگى دودانىڭ نەگىزگى بولىگىنە بىردەن جولداما الدى. ويتكەنى ولاردىڭ رەيتينگتەرى – جوعارى. تاعى ءتورت وتانداسىمىز ىرىكتەۋ تۋرنيرىنە قاتىستى. وكىنىشكە قاراي, ۇشەۋىنىڭ جولى بولمادى. تۇساۋكەسەر كەزدەسۋلەرىندە بەي­بىت جۇقاەۆ ارگەنتينالىق حۋان ما­نۋەل چەرۋندولوعا, دميتري پوپ­كو فرانتسيالىق ۆالەنتينا رويەگە, دە­نيس ەۆسەەۆ بولگاريالىق ادريان ان­درەەۆكە ەسە جىبەردى. ولارعا قاراعاندا ميحايل كۋكۋشكين ءتاۋىر ويناپ جاتىر. جەرلەسىمىز شۆەيتساريالىق لەاندرو ريدي مەن اۋستراليالىق لي تۋدى تىزە بۇكتىرىپ, فينالعا شىقتى. ەندى كۋكۋشكين تاعى ءبىر باسەكەدە جەڭىسكە جەتسە, وندا ول دا «رولان گارروسقا» قاتىسادى. ال اننا دانيلينا مەن الەكساندر نەدوۆەسوۆ جۇپتىق باسەكەلەردە باق سىنايدى.

«رولان گارروستىڭ» جەكەلەگەن سايىسىنداعى تەننيسشىلەر تابىسى:

ءبىرىنشى كەزەڭ – 73 مىڭ ەۋرو;

ەكىنشى كەزەڭ – 110 مىڭ ەۋرو;

ءۇشىنشى كەزەڭ – 158 مىڭ ەۋرو;

ءتورتىنشى كەزەڭ – 250 مىڭ ەۋرو;

شيرەك فينال – 415 مىڭ ەۋرو;

جارتىلاي فينال – 650 مىڭ ەۋرو;

فيناليست – 1,2 ملن ەۋرو;

جەڭىمپاز – 2,4 ملن ەۋرو.

جۇپتىق سايىستاعى سىياقى: جەڭىمپاز – 590 مىڭ ەۋرو, فيناليست – 295 مىڭ ەۋرو.

ارالاس جۇپتار سايىسىنداعى سىياقى: جەڭىمپاز – 122 مىڭ ەۋرو, فيناليست – 61 مىڭ ەۋرو.