قازاقستانداعى ۇلتتىق كينونى قولداۋ ورتالىعى مەن فرانتسيانىڭ ۇلتتىق كينەماتوگرافيا جانە انيماتسيا ورتالىعى حالىقارالىق كانن فەستيۆالى اياسىندا ىنتىماقتاستىق تۋرالى مەموراندۋمعا قول قويدى.
ماڭىزدى قادام قوس ەل اراسىنداعى مادەني قارىم-قاتىناستى نىعايتىپ, كينويندۋستريا سالاسىن دامىتۋعا باعىتتالعان.
مەموراندۋم اياسىندا تاراپتار ەكى ەلدىڭ كينو ونىمدەرىن ءوز اۋماقتارىندا تاراتۋعا قولداۋ كورسەتەدى.
«كينو ونىمدەرىن شەتەلدە تاراتۋ – مادەني ارالۋاندىقتى ىلگەرىلەتۋدىڭ ماڭىزدى فاكتورى. بۇل ورايدا فرانتسياداعى ۇلتتىق كينەماتوگرافيا جانە انيماتسيا ورتالىعى قازاقستاندىق ارىپتەستەرگە كينو ءوندىرىسىن حالىقارالىق دەڭگەيدە ىلگەرىلەتۋگە قاتىستى ساراپتامالارىن بولىسەدى. بۇل – تاجىريبە تولىستىرۋعا تاپتىرماس مۇمكىندىك», دەيدى قازاقستانداعى ۇلتتىق كينونى قولداۋ ورتالىعىنىڭ باسقارما توراعاسى قۇرمانبەك جۇماعالي.
فرانتسيا ۇلتتىق كينەماتوگرافيا جانە انيماتسيا ورتالىعى قازاق فيلمدەرىن تاراتۋعا, فرانتسۋز فيلمدەرىن قازاق تىلىنە دۋبلياجداۋعا كومەك كورسەتۋگە دايىن ەكەنىن جەتكىزدى.
ايتا كەتەيىك, ۇلتتىق كينونى قولداۋ ورتالىعى العاش رەت 77-حالىقارالىق كانن كينوفەستيۆالى اياسىندا «Marche Du Film» كينونارىعىنا قاتىسىپ جاتىر. ونداعى ماقسات – بىرلەسكەن كينووندىرىستى دامىتا وتىرىپ, شەتەلدىك سەرىكتەستەردى تارتۋ, سونداي-اق وتاندىق فيلمدەردىڭ تانىمالدىلىعىن ارتتىرۋ.