قازاقستان مەن ءۇندىستان جوعارعى سوتتارىنىڭ توراعالارى اسلامبەك مەرعاليەۆ پەن دحاناندجايا چاندراچۋد الماتىدا وتكەن كەزدەسۋ بارىسىندا ءوزارا ءىس-قيمىلدىڭ الداعى ۋاقىتتاعى اسپەكتىلەرىن تالقىلادى, دەپ جازادى Egemen.kz.
كەزدەسۋگە قر سوت اكىمشىلىگىنىڭ باسشىسى, حالىقارالىق سوت اكىمشىلىگى قاۋىمداستىعىنىڭ ورتالىق ازيا جانە ءۇندىستان ءوڭىرى بويىنشا ۆيتسە-پرەزيدەنتى نايل احمەتزاكيروۆ جانە الماتى قالالىق سوتىنىڭ توراعاسى, تمد ەكونوميكالىق سوتىنىڭ سۋدياسى اسقار سمايىلوۆ قاتىستى.
قوناققا سوت تورەلىگىن جۇزەگە اسىرۋ ساپاسىن ارتتىرۋ باعىتىندا اتقارىلىپ جاتقان جۇمىستار تۋرالى باياندالدى. سونىمەن قاتار ازاماتتار مەن مەملەكەتتىك ورگاندار اراسىنداعى داۋلاردى قاراۋدىڭ جاڭا ەرەجەلەرىن بەلگىلەگەن اكىمشىلىك ادىلەتتىڭ تيىمدىلىگى, اپەللياتسيانىڭ ءرولىن كۇشەيتۋ, سوتتىڭ تاۋەلسىزدىگىن نىعايتۋ ماسەلەلەرى تالقىلاندى.
اسلامبەك مەرعاليەۆ اۋدانارالىق سوتتاردى قۇرۋ, وتباسىلىق, القابيلەر سوتىنىڭ اياسىن كەڭەيتۋ ماقساتى جانە تسيفرلاندىرۋدىڭ قارقىندى دامۋى پروتسەستى جەڭىلدەتەنىن العا تارتتى.
ءوز كەزەگىندە, چاندراچۋد مىرزا سوت مەنەدجمەنتىندە قازاق ەلىنىڭ تاجىريبەلىك ەرەكشەلىكتەرىنە, سونىڭ ىشىندە, شىۇ-عا مۇشە ەلدەردىڭ جوعارعى سوتتارى توراعالارىنىڭ الداعى ۋاقىتتا تاشكەنتتە وتەتىن كەڭەسىندە وسى ماسەلەلەردىڭ تالقىلاناتىنىنا قىزىعۋشىلىق تانىتتى.
الماتى قالالىق سوتىندا بولىپ, ونداعى ءىت-قىزمەتتەردىڭ جۇمىسىمەن تانىسقان ءۇندىستان جوعارعى سوتىنىڭ توراعاسى زاماناۋي تەحنولوگيالاردى ەنگىزۋدىڭ مۇنداي جوعارى دەڭگەيىن كۇتپەگەنىن اتاپ ءوتىپ, سوت كورپۋسىنا زاڭ ۇستەمدىگىنىڭ نەگىزگى كورسەتكىشتەرىنە قول جەتكىزۋدى تىلەدى.
كەزدەسۋ سوڭىندا تاراپتار سىندارلى ديالوگتى جالعاستىرۋ قاجەتتىگى تۋرالى ءوزارا پىكىر الماستى.