15-22 مامىر ارالىعىندا قحر شىڭجاڭ-ۇيعىر اۆتونوميالىق اۋدانىندا نانۆان گيدروبەكەتىنىڭ ماڭىندا سۋ دەڭگەيى كوتەرىلگەن. 21 مامىر 20:00-دەگى جاعداي بويىنشا سۋدىڭ شىعىن كولەمى – 2070 م3/س. اتالمىش جاعداي 2013 جانە 2016 جىلدارى تىركەلگەن, دەپ جازادى Egemen.kz.
وسى اۋماقتا اعىپ جاتقان بۋىرشىن وزەنى ترانسشەكارالىق قارا ەرتىس وزەنىنە, ال قارا ەرتىس زايسان وزەنىنە قۇيادى.
مارقاكول اۋدانىنىڭ بوران اۋىلىندا ورنالاسقان گيدروبەكەتتەگى كورسەتكىش بويىنشا قارا ەرتىس وزەنىنىڭ دەڭگەيى 543 سم قۇراپ وتىر. بۇل قاۋىپتى دەڭگەيدەن 18 سم-گە جوعارى.
قازىرگى تاڭدا شقو اكىمدىگى جانە تجد جاعدايدى باقىلاۋعا الىپ, شۇعىل شارالار قولدانىپ جاتىر. جەرگىلىكتى جەردە اتقارۋشى بيلىك, پوليتسيا جانە پروكۋراتۋرا ورگاندارى الدىن الا ەسكەرتىلدى.
اۋىلدىڭ تومەنگى تۇسىندا وتكەن جىلى ۇزىندىعى 400 م, بيىكتىگى 675 سم بوگەت سالىنعان. بوگەتتىڭ بيىكتىگى قازىردە قاۋىپتى دەڭگەيدەن 1,5 م جوعارى بولعاندىقتان, ءالى دە 70 سم-گە جۋىق ارالىق بار.
قارا ەرتىس وزەنىنىڭ دەڭگەيى ءار 4 ساعات سايىن ولشەنىپ, تاۋلىك بويى باقىلاۋ ۇيىمداستىرىلدى. اۋىل ماڭىنداعى ۇزىندىعى 60 م بولاتىن بوگەتتى كۇشەيتۋ جۇمىستارى جۇرگىزىلىپ جاتىر.
ەلدى مەكەن تۇرعىندارى ەسكەرتىلىپ, توتەنشە جاعداي تۋىنداعان جاعدايدا تۇرعىنداردى ۋاقىتشا ورنالاستىرۋ ورىندارى ازىرلەندى. ازىرگە بوگەتتى كۇشەيتۋ جۇمىستارىنا 11 ادام جانە 7 تەحنيكا جۇمىلدىرىلدى.
بوران اۋىلىنا جاقىن ماڭداعى تارباعاتاي, زايسان, كۇرشىم جانە ۇلكەن نارىن اۋداندارىنان قوسىمشا تەحنيكا مەن ماماندار جۇمىلدىرىلدى.
ەلدى مەكەنگە تونەر قاۋىپ جوق. جاعداي باقىلانىپ جاتىر.