بىرەر كۇن بۇرىن اسكەري گوسپيتالدار مەن لازارەتتەرگە «دامۋ» مەديتسينالىق اقپاراتتىق جۇيەسىنە تەگىن قول جەتكىزۋ تۋرالى كەلىسىمگە قول قويىلدى. بۇل قورعانىس ءمينيسترىنىڭ قارۋلى كۇشتەردىڭ اسكەري قىزمەتشىلەرى مەن ولاردىڭ وتباسى مۇشەلەرىنە مەديتسينالىق قىزمەت كورسەتۋ دەڭگەيىن ارتتىرۋ تۋرالى تاپسىرماسىن جۇزەگە اسىرۋ جولىنداعى قادامداردىڭ ءبىرى, دەپ حابارلايدى Egemen.kz اتالعان ۆەدومستۆونىڭ ءباسپاسوز قىزمەتىنە سىلتەمە جاساپ.
قۇجاتتى قارۋلى كۇشتەر باس اسكەري-مەديتسينالىق باسقارماسىنىڭ باستىعى, مەديتسينا قىزمەتىنىڭ پولكوۆنيگى ەرجان سمايىل مەن «دامۋ» اقپاراتتىق تەحنولوگيالار ورتالىعى» جشس باسقارما توراعاسى تالعات ەلەمانوۆ قول قويىپ بەكىتتى.
اتالعان كەلىسىم ءداستۇرلى مەديتسينالىق جازبالاردان الشاقتاپ, تىركەلگەندەردىڭ دەنساۋلىعى تۋرالى دەرەكتەردى ساقتاۋدىڭ تسيفرلىق فورماتىنا كوشۋگە مۇمكىندىك بەرەدى.
مەديتسينالىق ۇيىمداردىڭ كورپوراتيۆتىك تىسقارعى قويمالار قۇرۋعا ماماندانعان «دامۋ» اقپاراتتىق جۇيەسى دەنساۋلىق ساقتاۋ مينيسترلىگى دەرەكقورلارىمەن ينتەگراتسيالانعانىن اتاپ ءوتۋ قاجەت. وسى جىلدىڭ ءبىرىنشى ماۋسىمىنان باستاپ اسكەري گوسپيتالدار مەن لازارەتتەر جاڭا اقپاراتتىق رەسۋرسقا قول جەتكىزە الادى.