تاياۋدا ششۋچينسك قالاسىندا اقىن, قوعام قايراتكەرى مارفۋعا بەكتەمىروۆانىڭ اتىنا كوشە بەرىلدى. سالتاناتتى راسىمگە ەسىمدەرى ەلگە بەلگىلى قالامگەرلەر مەن جىرىن جاتتاعان وقىرمانى قاتىستى.
اقىن – جالاۋلى جاسىل دۇنيەدە از عانا عۇمىر كەشسە دە, ارتىنداعى قارا ورمانداي قالىڭ ەلىنە مول مۇرا قالدىرعان قالامگەر. مارفۋعانىڭ باي مۇراسىن شاشاۋ شىعارماي جيناقتاپ, ءسوز ونەرىن سىيلاپ وسكەن ەلگە تانىستىرىپ, تابىستىرىپ جۇرگەن جارى ەسەنگەلدى ءسۇيىنوۆ.
تۋعان جەرىندە قۇرمەتتەلىپ, كوشە اتاۋىنىڭ بەرىلۋى اقىنعا عانا ەمەس, ولەڭ ءسوزدىڭ وكىلىنە دەگەن شىنايى قۇرمەت دەسەك, ارتىقتىعى بولماس.
سالتاناتتى راسىمدە قالا اكىمى اسحات مۇحامەدجانوۆ, وبلىستىق مادەنيەت باسقارماسىنىڭ باسشىسى ايگۇل ءسابيتوۆا, «Amanat» پارتياسى اقمولا وبلىستىق فيليالىنىڭ قىزمەتكەرى اقمانات الىمبەتوۆا, قازاقستاننىڭ ەڭبەك سىڭىرگەن قايراتكەرى وراز قاۋعاباي, جازۋشى اسىلبەك بايتان ۇلى, اقىن قۇدايبەرلى مىرزابەك ءتارىزدى ازاماتتار قاتىسىپ, مارفۋعا بەكتەمىروۆانىڭ شىعارماشىلىعى تۋرالى ايتىپ بەردى. مارفۋعانىڭ وسى ششۋچينسك قالاسىنداعى مەكتەپ-ينتەرناتتا وقىپ, ءبىلىم العاندىعىن ايتا كەتۋىمىز كەرەك.
كەش بارىسىندا اقىننىڭ جۇرەك تەبىرەنتەر ءورشىل ولەڭدەرى وقىلدى. «جان دۇنيەمنىڭ جاڭعىرىعى» تاقىرىبىنداعى كىتاپ كورمەسى ۇيىمداستىرىلدى. وسىلايشا, ويلى جاننىڭ كوكىرەگىنە كوپ-كورىم سەزىم ساۋلەسىن سەبەزگىلەتەتىن شىرايلى ءىس-شارا ۇيىمداستىرىلىپ, تۋعان ەلى اقىن تۇعىرىن بيىگىنە كوتەردى.
اقمولا وبلىسى,
بۋراباي اۋدانى