مەملەكەت باسشىسى قاسىم-جومارت توقاەۆ استاناداعى يران يسلام رەسپۋبليكاسىنىڭ ەلشىلىگىندە بولىپ, تىكۇشاق اپاتى سالدارىنان پرەزيدەنت يبراگيم رايسي مەن ۇكىمەتتىك دەلەگاتسيا مۇشەلەرىنىڭ قايتىس بولۋىنا بايلانىستى يران حالقىنا كوڭىل ايتىپ, قولداۋ ءبىلدىردى, دەپ حابارلايدى Egemen.kz.
ەل پرەزيدەنتى كوڭىل ايتۋ كىتابىنا جازبا قالدىردى.
«يران يسلام رەسپۋبليكاسىنىڭ پرەزيدەنتى يبراحيم ءرايسيدىڭ جانە ۇكىمەت دەلەگاتسياسى مۇشەلەرىنىڭ مەزگىلسىز قازاسى تۋرالى قارالى حابار قابىرعامىزدى قايىستىردى. ءوز ۇلتىنىڭ ۇلى پەرزەنتى يبراحيم رايسي – وتانىنا ادال قىزمەت ەتكەن تۇعىرلى تۇلعا. ءبىز ونى پاراساتتى باسشى, بەدەلدى ساياساتكەر, ەكى ەلدىڭ ىنتىماقتاستىعىن نىعايتۋعا زور ەڭبەك سىڭىرگەن قايراتكەر رەتىندە ءاردايىم ەستە ساقتايمىز. قازاق حالقىنىڭ جانە ءوزىمنىڭ اتىمنان يراندىق باۋىرلارىمىزعا قايعىرىپ كوڭىل ايتامىن. مارقۇمداردىڭ يمانى سالامات, رۋحى پەيىشتە بولسىن!», دەپ جازدى مەملەكەت باسشىسى.
قىرمىزى جۇماعاليقىزى,
ەۇۋ ستۋدەنتى