تۇركىستان وبلىسىنا جۇمىس ساپارى بارىسىندا ۆيتسە-پرەمەر سەرىك جۇمانعارين شەگىرتكەگە قارسى جاپپاي وڭدەۋ جۇمىستارى جۇرگىزىلىپ جاتقان اۋدانداردىڭ ەگىس القاپتارىن ارالاپ كوردى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
تۇركىستان وبلىسى ەگىستىك القاپتار كولەمى بويىنشا ەلىمىزدەگى توپ-3 ايماق قاتارىنا كىرەدى. ءوڭىر ءبىرىنشى بولىپ شەگىرتكەنىڭ ەڭ قاۋىپتى ءتۇرى – ماروككو شەگىرتكەسىنە قارسى بەلسەندى كۇرەس كەزەڭىن باستادى.
بارلىعى 272 مىڭ گەكتار جەر وڭدەلەدى. ونىڭ 252 مىڭ گەكتارى 19 مامىرعا دەيىن وڭدەلدى, بۇل وڭدەۋ جۇمىستارى جوسپارلانعان جەردىڭ 93%-ى. قالعان 20 مىڭ گەكتاردا تاياۋ كۇندەرى وڭدەۋ جۇمىستارى اياقتالادى.
وڭىردەگى ۇلكەن القاپتاردى وڭدەۋ جۇمىستارىنا 360-تان استام ادام تارتىلعان. ولاردىڭ قاتارىندا تۇركىستان جانە باسقا دا وبلىستاردىڭ اۋدان-قالالارىنان كەلگەن ينسپەكتورلار, ماماندار, بولجاۋ ورتالىعىنىڭ قىزمەتكەرلەرى, سونداي-اق ماسەلەگە بەيجاي قالماعان جەرگىلىكتى تۇرعىندار دا بار. جۇمىستار جاياۋ, كولىكتە, ۇشاقتار مەن دروندار ارقىلى جۇرگىزىلىپ جاتىر. بارلىعى 162 مىڭ گا جەردەن, 107 مىڭ گا اۋادان, 1 مىڭ گا ريۋكزاك تۇرىندەگى بۇرىككىشپەن, 1,4 مىڭ گا دروندار ارقىلى وڭدەلۋدە.
سەرىك جۇمانعارين شەگىرتكەگە قارسى وڭدەۋ مەحانيزمدەرى مەن ادىستەرىن زەرتتەپ, زيانكەستەرگە قارسى جۇمىستاردىڭ بارلىق تسيكلىن جۇرگىزەتىن مەردىگەرلەرمەن پرەپاراتتاردى جەتكىزۋ, ساقتاۋ جانە وڭدەۋ جۇمىستارى جونىندە پىكىر الماستى.
ەسكە سالا كەتەيىك, تۇركىستان وبلىسىندا بۇكىل قىزمەت تسيكلىن ءبىر مەردىگەردىڭ كورسەتۋى پيلوتتىق جوبا رەتىندە سىناقتان ءوتىپ جاتىر. كەلەر جىلى رەسپۋبليكا بويىنشا شەگىرتكەگە قارسى كۇرەس قىزمەتتەرىن ورتالىقتاندىرىلعان بىرىڭعاي جۇيەدە ساتىپ الۋعا كوشۋ جوسپارلانىپ وتىر.