باق سالاسىنداعى پرەزيدەنت سىيلىعىنىڭ تۇڭعىش لاۋرەاتى, قازاقستاننىڭ ەڭبەك سىڭىرگەن قايراتكەرى, ەل گازەتى «Egemen Qazaqstan»-دى باسقارعان ەرجۇمان سمايىل تۇرعان ءۇيدىڭ قابىرعاسىنا (استانا قالاسىنداعى «سامال» شاعىن اۋدانى) ەسكەرتكىش-تاقتا قويىلدى. جۋرناليستەر قاۋىمى ەراعا اتاپ كەتكەن ەرجۇمان سمايىلدىڭ ۇلت جۋرناليستيكاسىنداعى ورنى بولەك-تۇعىن.
سالتاناتتى ءىس-شاراعا پارلامەنت سەناتىنىڭ دەپۋتاتى نۇرتورە ءجۇسىپ, مەملەكەت جانە قوعام قايراتكەرى ساۋىتبەك ابدراحمانوۆ, «Egemen Qazaqstan» گازەتىنىڭ ۇجىمى, ارداگەر جۋرناليستەر, ەرجۇمان سمايىلدىڭ وتباسى, تۋعان-تۋىستارى قاتىستى.
ەسكەرتكىش-تاقتانىڭ اشىلۋ سالتاناتىندا ساۋىتبەك ابدراحمانوۆ ءسوز سويلەپ, زامانداس ارىپتەسى تۋرالى ەستەلىگىن جەتكىزدى.
– ەرجۇمان اعامىز «گازەتچيك» ۇعىمىن جوعارى بيىككە كوتەرگەن ادام. سول ارقىلى ماماندىقتىڭ مارتەبەسىن اسىردى. ول پروزاعا دا بارعان جوق, باسقا جانرلارعا دا قىزىققان جوق, ءتىپتى ەرەكەڭنىڭ العاشقى كىتابى جاسى ەلۋدەن اسقاندا جارىق كوردى. سوندا دا ەراعا ەرەكشە قۇرمەتتىڭ يەسى بولدى. ۇيىمداستىرۋشىلىق تالانتىمەن, وزگەگە بولسىن دەگەن جومارت جۇرەگىمەن, باسقالاردىڭ ويىن ۇشتاۋىمەن, جاستارعا دەگەن قامقورلىعىمەن كوزگە ءتۇستى. بار ءومىرىن جۋرناليستيكاعا, گازەتتىڭ قارا جۇمىسىنا ارناۋمەن ءوتتى. سويتە ءجۇرىپ, باق سالاسىنداعى پرەزيدەنت سىيلىعىنىڭ تۇڭعىش لاۋرەاتى اتاندى. قىزمەتتىڭ بيىكتەرىنە دە كوتەرىلدى. ءبىزدىڭ ماماندىعىمىزدىڭ مارتەبەسىن كوتەرگەن, ءجۋرناليستىڭ رەنومەسىن ارتتىرعان ادام رەتىندە ەرجۇمان وتەش ۇلى ءبىز ءۇشىن ەرەكشە تۇلعا, – دەدى س.ابدراحمانوۆ.
ال جامپوز جۋرناليست جارىلقاپ بەيسەنباي ۇلى جاستار گازەتى «لەنينشىل جاسقا» قاتار كەلگەندەرىن, ەرجۇمان سمايىلدىڭ كەلە سالا ءوزىنىڭ ۇيىمداستىرۋشىلىق قابىلەتىمەن, ىسكەرلىگىمەن ەرەكشەلەنگەنىن جەتكىزدى.
– «لەنينشىل جاستاعى» مىقتى اۋدارماشىلار باسپا سالاسىنا اۋىسىپ كەتكەن كەز ەدى. ەرجۇمان كەلە سالىپ بىردەن اۋدارما ىسىنە كىرىستى. ءتىپتى ءماتىندى بىردەن «ديكتوۆكا» جاساي وتىرىپ, اۋدارىپ تاستايتىن. شارشامايتىن, تالمايتىن ەرجۇمان «ەگەمەندە» دە قارا جۇمىستى اتقارۋشى ەدى. تۇنىمەن كەزەكشىلىكتە بولسا دا تاڭەرتەڭ جۇمىستا وتىراتىن. ءبىز سوعان تاڭعالاتىنبىز, – دەدى ج.بەيسەنباي ۇلى.
سەنات دەپۋتاتى نۇرتورە ءجۇسىپ ەرجۇمان سمايىلدىڭ وتە ساۋاتتى رەداكتور بولعانىنا توقتالدى.
– ەرەكەڭدى قازاقتىڭ ءسوزىن, بۇكىل ماقال-ماتەلى مەن فرازەولوگيالىق تىركەستەردىڭ بارلىعىنىڭ قالاي ساقتالۋىن گازەت ارقىلى قالىڭ قازاققا جەتكىزىپ وتىرعان ءتىل زەرگەرى دەپ ايتۋعا بولادى. ادامدىق قىرىنا كەلەتىن بولساق, ءبىر سوزبەن ايتقاندا, ەرجۇمان اعا «Egemen Qazaqstan» دەيتىن قادىرلى دە قاستەرلى قاراشاڭىراقتىڭ قۇتى بولدى. باسشىمىن دەپ ءامىر بەرىپ وتىرماي, بۇكىل تىرلىكتى ۇيىمداستىرۋ, ۇيىستىرۋ ءىسىنىڭ باسى-قاسىندا جۇرەتىن. بارلىق ءتىلشىنىڭ, وزگە دە قىزمەتكەرلەردىڭ, «ەگەمەندىك» بۇرىنعى ارداگەر اعا-اپالارىمىزدان باستاپ, قىزمەتكەرلەردىڭ قاي-قايسىنىڭ بولسىن كوڭىل قىبىن تاپ باسىپ, ايتپاي تاباتىن. قاتال ادام سياقتى كورىنگەنىمەن وتە مەيىرىمدى ەدى. ول كىسىنىڭ مەيىرىمدىلىگىن بالالارى, نەمەرەلەرىن قالاي جاقسى كورگەنىنەن بىلەمىز. كوپ جاعدايدا سىرىن سىرتقا اشا بەرمەيتىن سىرباز مىنەزدى ادام ەدى, – دەگەن ن.ءجۇسىپ ەراعاڭنىڭ باسشى مەن ءتىلشىنى قاتار قابىلدايتىن قاراپايىمدىلىعىن ايرىقشا اتاپ ءوتتى.
«Egemen Qazaqstan» گازەتىنىڭ باس رەداكتورى عابيت ىسكەندەر ۇلى ەرجۇمان سمايىلدىڭ مىنەزدى ادام بولعانىن, سول مىنەزىنىڭ ارقاسىندا ەلگە قادىرلى بولعانىن ايتتى.
– شەرحان مۇرتازانىڭ 60 جىلدىق مەرەيتويىندا قازاق جۋرناليستيكاسىنىڭ كوريفەيى كامال سمايىلوۆ «باسىلىم باستىعىنا تارتادى» دەپ جازعان ەدى. سول سياقتى «Egemen Qazaqstan» باسىلىمى ەراعا باسقارعان جىلدارى مىنەزدىلىگىمەن حالقىنا جاقتى, جاقىن بولدى. ەگەر ەراعادا مىنەز بولماسا گازەتتىڭ بولمىسى دا باسقاشا بولار ما ەدى. سوندىقتان وسىنداي مىنەزدى اعامىزعا, ەلگە, قازاق جۋرناليستيكاسىنا ەڭبەگى سىڭگەن ەراعاعا وسىنداي قۇرمەت كورسەتۋدى زاڭدىلىق دەپ سانايمىن, – دەدى ع.ىسكەندەر ۇلى.
ەسكەرتكىش-تاقتانىڭ اشىلۋ ءىس-شاراسىنان كەيىن ە.سمايىلدىڭ قىزى ايجان سمايىلوۆانى سوزگە تارتتىق.
– انام ەكەۋى وسى ۇيدە ومىردەن وتكەنشە تۇردى. اكەم رەداكتسيانى الماتىدان استاناعا باستاپ كەلىپ ەدى. ءوز سالاسى بويىنشا قانداي بىلىكتى مامان بولعانىن ارىپتەستەرىنەن اسىرىپ ايتا الماسپىز. بىراق اكە رەتىندە ەڭ مەيىرىمدى ادام بولعانىن ايرىقشا اتاپ وتەر ەدىم. ۇيدە ەكى اعايىندى بولعاندىقتان اعام ەكەۋمىزدى ەش ءبولىپ-جارماي تەڭ قارادى, بىردەي مەيىرىمىن توكتى. گازەتتىڭ قىم-قۋىت, قاربالاسقا تولى جۇمىسىنان كەيىن مىندەتتى تۇردە بالالارىنا دا كوڭىل ءبولىپ, ءبىزدىڭ تاربيەمىزدى قاپەرىنەن شىعارمادى. دەگەنمەن ءبىز اكەمىزدىڭ جولىن قۋا المادىق. ءبىرىمىز دارىگەر, ءبىرىمىز زاڭگەر بولدىق. ەڭ باستىسى, اكەمىزدىڭ ەشكىمنىڭ الا ءجىبىن اتتاماي, ەشكىمنىڭ نازىنا, كوز جاسىنا قالماي, مەملەكەتكە دە, حالىققا دا ادال قىزمەت ەتۋدى ۇنەمى ايتىپ وتىراتىن وسيەتىن ۇمىتقان جوقپىز, – دەيدى ا.سمايىلوۆا.
ەسكەرتكىش تاقتانى اشۋ ءراسىمىن سەناتور نۇرتورە ءجۇسىپ پەن قوعام قايراتكەرى ساۋىتبەك ابدراحمانوۆ اتقاردى. جينالعان كوپشىلىك قارا مارمارعا قاشالعان ەرجۇمان وتەش ۇلىنىڭ بەينەسى ءساتتى شىققانىنا ريزا بولىستى. ودان كەيىن ارنايى وتكىزىلگەن يماني شارادا مارقۇم ە.سمايىل مەن ونىڭ بىلتىر دۇنيە سالعان جۇبايىنىڭ رۋحىنا قۇران باعىشتالدى.