شاروف راشيدوۆ اتىنداعى سامارقاند مەملەكەتتىك ۋنيۆەرسيتەتى بازاسىندا تاياۋدا تۇركى الەمىنىڭ ماتەماتيكالىق قوعامى (Turkic World Mathematical Society, TWMS) باسقارما مۇشەلەرىنىڭ كوشپەلى وتىرىسى ءوتتى. وعان كورنەكتى عالىم, پروفەسسور, قازاقستان ۇلتتىق ينجەنەرلىك اكادەمياسىنىڭ پرەزيدەنتى, تۇركى الەمى ماتەماتيكالىق قوعامىنىڭ پرەزيدەنتى, اكادەميك باقىتجان تۇرسىن ۇلى جۇماعۇلوۆ توراعالىق ەتتى جانە العاشقى پلەنارلىق باياندامانى جاسادى, دەپ حابارلايدى Egemen.kz.
ب.جۇماعۇلوۆ بايانداماسىندا تۇركى الەمى ماتەماتيكالىق قوعامىنىڭ وزەكتى ماسەلەلەرىنە باسا نازار اۋداردى, سونداي-اق وتىرىستىڭ نەگىزگى ماقساتى – عالىمداردىڭ حالىقارالىق بايلانىستارى مەن عىلىمي ىنتىماقتاستىعىن كەڭەيتۋ, ماتەماتيكا عىلىمىن دامىتۋعا جانە ماتەماتيكادا, عىلىمي زەرتتەۋلەردە, تەحنيكا مەن ءبىلىم بەرۋدە اقپاراتتىق تەحنولوگيالاردىڭ جەتىستىكتەرىن پايدالانۋعا باعىتتاۋ ەكەنىن اتاپ ءوتتى.
فورۋمعا قاتىسۋشىلاردى قۇتتىقتاعان سامارقاند مەملەكەتتىك ۋنيۆەرسيتەتىنىڭ رەكتورى, سەناتور رۋستام حالمۋرادوۆ تۇركى الەمى ماتەماتيك-عالىمدارى ەكونوميكانىڭ, ەكولوگيانىڭ قولدانبالى ەسەپتەرىن بىرلەسىپ شەشۋ ءۇشىن شىعارماشىلىق توپتار قۇرۋ قاجەت ەكەنىن ايتتى.
وتىرىس بارىسىندا تۇركى الەمى ماتەماتيكالىق قوعامىنىڭ (TWMS) ۆيتسە-پرەزيدەنتى, وزبەكستان ۇعا اكادەميگى ءازىمباي سادۋللاەۆ پەن پروفەسسور ميرسايد اريپوۆ بايانداما جاسادى. اتالعان عالىمدار وزبەكستان ماتەماتيكتەرىنىڭ ىرگەلى, ەسەپتەۋ جانە قولدانبالى ماتەماتيكا سالالارىنداعى عىلىمي جەتىستىكتەرىن ەگجەي-تەگجەيلى باياندادى.
قازاقستانداعى ماتەماتيكا جانە ماتەماتيكالىق مودەلدەۋ ينستيتۋتىنىڭ ديرەكتورى, TWMS ۆيتسە-پرەزيدەنتى ماحمۋد سادىبەكوۆ ءوزىنىڭ بايانداماسىندا قازاقستان ماتەماتيكتەرىنىڭ جاريالانىمدىق بەلسەندىلىگى جانە وتاندىق ىرگەلى ماتەماتيكانىڭ تاياۋداعى مىندەتتەرى تۋرالى كەڭىرەك اقپارات بەردى.
ال باكۋ مەملەكەتتىك ۋنيۆەرسيتەتىنىڭ قولدانبالى ماتەماتيكا ينستيتۋتىنىڭ ديرەكتورى, TWMS ۆيتسە-پرەزيدەنتى اليەۆ فيكرەت ءوز بايانداماسىن «الەمدىك عىلىمي مەتريكالىق بازالارداعى TWMS جۋرنالدارىن دامىتۋ» تاقىرىبىنا ارناسا, ازەربايجاننان كەلگەن باكۋ ۋنيۆەرسيتەتىنىڭ پروفەسسورى, TWMS ۆيتسە-پرەزيدەنتى پەناحوۆ ەتيبار ءوز ەلىندەگى ماتەماتيكانى جانە قولدانبالى ماتەماتيكانى دامىتۋ ماسەلەلەرى تۋرالى ءسوز قوزعادى.
سونداي-اق TWMS ۆيتسە-پرەزيدەنتى نۇرلان تەمىربەكوۆ «وڭىرلىك ەكولوگيالىق ساياسات باعىتىن قولداۋ جانە شەشىم قابىلداۋعا ارنالعان تسيفرلىق اناليتيكالىق پلاتفورمانى جاساۋ» تاقىرىبىندا وتە وزەكتى ماسەلەگە ارنالعان بايانداما جاسادى. بۇل تاقىرىپتا قازاقستان مەن وزبەكستان عالىمدارى بىرلەسىپ ەڭبەك جاساپ جاتقانىن جەتكىزدى.
ءبىزدىڭ ەلىمىزدەن عىلىمي ءىس-شاراعا ۇلتتىق ينجەنەرلىك اكادەميانىڭ باس عالىم حاتشىسى, ۇيا ۆيتسە-پرەزيدەنتى ەرنار يمانعاليەۆ, ءو.ا. جولداسبەكوۆ اتىنداعى مەحانيكا جانە ماشيناتانۋ ينستيتۋتىنىڭ عىلىمي كەڭەسشىسى اماندىق تولەشوۆ قاتىستى.
ماتەماتيكا عىلىمىن دامىتۋدىڭ جانە ونىڭ كومپيۋتەرلىك مۇمكىندىكتەرمەن جانە وندىرىسپەن بايلانىسىن نىعايتۋدىڭ ماڭىزدىلىعىن ءبارى بىلەدى. جيىندا وسى باعىتتى باسشىلىققا الا وتىرىپ, عالىمدار قويىلعان مىندەتتەردى ىسكە اسىرۋدا ماتەماتيكا عىلىمىنىڭ ءرولىن ارتتىرۋعا ەرەكشە نازار اۋداردى.
سامارقاند عىلىمي فورۋمى عالىمدارعا پىكىر الماسۋعا جانە ماتەماتيكا عىلىمى سالاسىنداعى سوڭعى جەتىستىكتەر تۋرالى اقپارات الۋعا تاماشا مۇمكىندىك بەردى.