1927 جىلى ماسكەۋدە تۇسىرىلگەن بۇل سۋرەت قانداي قۇندى بولسا, تاريحى دا سونداي قاسىرەتتى. ايگىلى كومپوزيتور الەكساندر زاتاەۆيچتىڭ شاقىرۋىمەن العاشقى كاسىبي قازاق تەاترىن قۇرعان قايراتكەردىڭ ءبىرى جۇمات شانين ءبىر توپ ونەرپازدى ماسكەۋگە كونتسەرت بەرۋگە الىپ بارادى.
دەلەگاتسيا قۇرامىندا امىرە قاشاۋباەۆ, يسا بايزاقوۆ, قاليبەك قۋانىشباەۆ, سەركە قوجامقۇلوۆ, قۇرمانبەك جانداربەكوۆ, قالي بايجانوۆ, عابباس ايتباەۆ, ەلۋباي ومىرزاقوۆ, جانبيكە شانينا (جۇماتتىڭ جۇبايى), ءداليلا وڭعارباەۆا سىندى تالانتتى ارتىستەر بار.
بۇل ساپار قازاق ونەرى ءۇشىن قانشالىقتى ماڭىزدى بولسا, ەرلى-زايىپتى جۇمات پەن جانبيكە شانيندەرگە قاسىرەتىمەن ەستە قالدى. ماسكەۋگە بارار جولدا جانبيكە اپامىزدىڭ وزىمەن بىرگە الا شىققان قۇنداقتاعى 6 ايلىق ءسابيى وتاربا ىشىندە قاتتى اۋىرىپ, شەتىنەپ كەتەدى. باۋىر ەتى بالادان ايىرىلۋ وڭاي ما, قوس ونەرپاز قايعىدان قان جۇتادى. ۇلكەندەر جاعى جۇمات پەن جانبيكەگە: «بالانى جەرلەۋگە ەلگە قايتىڭدار» دەيدى. بىراق قاشاندا ءوز قايعىسىنان قازاقتىڭ مۇددەسىن جوعارى قويعان جۇمات شانين: «ولەر بالا ءولدى, بالا بىزدىكى, بىراق قازاق ونەرى ولمەسىن, مەن دە, جانبيكە دە قايتپايمىز», دەيدى. سەبەبى ءسابيدىڭ شەتىنەگەنىن بايقاسا, بۇلاردى ماسكەۋ قابىلدامايدى. بۇل تۋرالى عاسىر جاساعان حابيبا ەلەبەكوۆا اپامىز: «ەلۋباي ومىرزاقوۆ پەن قۇرمانبەك جانداربەكوۆ جولدان ءتۇسىپ قالىپ, بالانى جەرلەپ, ارتتارىنان كەلمەك بولادى. بىراق بۇعان جۇمات قارسى بولادى. سەبەبى كەلىسىم بويىنشا بۇكىل قۇرام پويىزدان بىرگە ءتۇسۋى كەرەك.سودان نە كەرەك, دەلەگاتسيا ماسكەۋگە تولىق قۇراممەن كەلەدى. جانبيكە ءولى ءسابيدى وتىرىك الديلەگەن بولىپ, پويىزدان تۇسەدى. تاڭ اتىسىمەن ەلۋباي مەن قۇرمانبەك بالانى تاتار زيراتىنا اپارىپ جەرلەيدى. ال جۇمات پەن جانبيكە توپقا قايتا قوسىلۋعا ءماجبۇر بولادى. سەبەبى ارالارىندا ورىسشا بىلەتىن جالعىز جۇمات ەكەن», دەپ سول ءبىر قيىن دا قاسىرەتتى جىلداردىڭ ەستەلىگىن ايتىپ بەرگەن بولاتىن.
مىنە, ءدال وسى كەزدە قازاقتىڭ ونەرپازدارىن قارسى الۋعا زاتاەۆيچتىڭ ءوزى كەلەدى. ءبارى جينالىپ وسى ءبىر تاريحي سۋرەتكە تۇسكەن. ال ەلۋباي ومىرزاقوۆ پەن قۇرمانبەك جانداربەكوۆ بالانى جەرلەۋگە كەتكەندىكتەن, سۋرەتكە تۇسپەي قالعان. وزگەسى تولىعىمەن وسى سۋرەتتە تاسپالانعان.