اتباسارلىقتاردىڭ العىسى

كوپشىلىكتى كول-كوسىر قۋا­نىشقا بولەگەن جاڭا پاتەر­لەردىڭ جالپى قۇنى – 162 ملن 700 مىڭ تەڭگە. جاڭا پاتەرلەر «اسار استانا» قوعامدىق قورىنىڭ قارجىسىنا الىندى. ءالى دە ەلۋ وتباسى جەرگىلىكتى اتقارۋشى ورگانداردىڭ كومەگىمەن وزدەرىنە لايىقتى پاتەر ىزدەستىرىپ جاتىر.

پاتەر ءبىرىنشى كەزەكتە باسپانالارى مۇلدەم جارامسىز بولىپ قالعان تۇرعىندارعا بەرىلدى. 334 وتباسىنا 123 ملن تەڭگە ءبىر جولعى كومەك تولەنىپتى. سۋ تاسقى­نى­نان زارداپ شەككەن ءار وتباسىنا كەلتىرىلگەن زالالدى ەسەپتەۋ جالعاسا بەرەدى.

«قالادا سالىنىپ جاتقان 100 پاتەرلى ەكى كوپقاباتتى ءۇيدىڭ قۇرىلىسىن اياقتاپ, تاعى ءبىر ءدال وسىنداي تۇرعىن ءۇيدىڭ قۇرىلىسىن باستايمىز. مەملەكەت باسشىسى قاسىم-جومارت توقاەۆتىڭ تاپسىرماسىمەن ۇزاق ۋاقىتتان بەرى پاتەر كەزەگىندە تۇرعان كوپبالالى وتباسىلاردى, مۇگەدەكتىگى بار جانە الەۋمەتتىك جاعىنان از قامتىلعان وتباسىلارعا جاتاتىن ادامداردى تۇرعىن ۇيمەن قامتاماسىز ەتەمىز. الداعى ۋاقىتتا جىل سا­يىن سۋ تاس­قىنىنىڭ زاردابىن شەك­پەس ءۇشىن جاباي وزەنىنىڭ ارناسىن كەڭەيتىپ, ءتۇبىن تازالاپ, جاعالاۋىن بيىكتەتۋ جۇمىستارىن جۇر­گىزەمىز»,  دەيدى وبلىس اكىمى مارات احمەتجانوۆ.

جاڭا پاتەرلەردىڭ كىلتىن العان اتباسارلىقتار ەل پرەزيدەنتىنە, ەرىكتىلەرگە جانە جاناشىر جان­دار­عا شىنايى العىستارىن جەت­كىز­دى. جاڭا سالىنىپ جاتقان ەكى ءۇي كوكتەمگى سۋ تاسقىنى قاۋپى ۇنەمى ءتونىپ تۇراتىن قىزىل ايماق­تاعى تۇرعىنداردى كوشىرۋگە ار­نال­عان. 2021 جىلى قۇرىلىس ما­تەريالدارىنىڭ باعاسى ءوسىپ كەتۋىنە بايلانىستى اياقتالماي قالعان. ەندى الداعى جوسپار وڭىنان وڭعارىلسا, 200 وتباسى قونىس تو­يىن تويلاماق. قازىر ىشكى ارلەۋ جۇمىستارى جۇرگىزىلىپ جاتىر.

«اۋداندا سۋ باسقان 250-گە جۋىق ءۇي تولىق تەكسەرىلىپ, ساراپتاما بەرىلدى. زارداپ شەككەن تۇرعىندارعا 100 ايلىق ەسەپتىك كورسەتكىش كولەمىندە العاشقى كومەك كورسەتىلدى. كوميس­سيا قورىتىندىسى بو­يىنشا 40 ملن 136 مىڭ تەڭگە شىعىن كەل­گەنى انىقتالدى, 77 ءۇي اپاتتى جاع­دايدا دەپ تانىلىپ, 173 ۇيگە جوندەۋ جۇمىستارى جۇرگىزىلمەك», دەيدى اۋدان اكىمى امانبەك قالجانوۆ.

سۋ تاسقىنى كەزىندە 6 ەلدى مەكەن اۋدان ورتالىعىمەن قاتىناسا الماي قالعان. ەكى اپتانىڭ ىشىندە جوندەۋ جۇمىستارى جۇرگىزىلىپ, بارلىق ەلدى مەكەندەردىڭ اراسىندا قاتىناس ورناتىلعان. تۇرعىن ۇيلەرمەن قاتار №1 جالپى ءبىلىم بەرەتىن مەكتەپ پەن «ەسىل» ساۋىقتىرۋ لاگەرى دە زارداپ شەككەن ەكەن. زالال كولەمى – 236 ملن تەڭگە. قازىر جوندەۋ جۇمىستارى باستالىپ كەتكەن. جاڭا وقۋ جىلىنا دەيىن مۇقيات جوندەۋدەن وتكىزىلمەك.

ەل ەلەڭدەگەن قاۋىپ-قاتەر دە سەيىلدى. جەرگىلىكتى تۇرعىندار اتقارۋشى ورگانداردىڭ ءابجىل كومەگىنە رازى.

ء«ساۋىردىڭ ونى كۇنى بىزگە ۇلكەن كولەمدە تاسقىن سۋدىڭ كەلە جاتقانى تۋرالى حابارلاندى. ءۇي جيھازدارىن جوعارى كوتەرىپ قويدىق تا, قاۋىپسىز جەردى پانالادىق. ءبىر اتتەگەن-ايى, ۇزاق جىل باسپانامىز بولعان ءۇيى­مىزدىڭ قابىرعالارى قۇلاپ جاتىر. ءوزىم كوپبالالى انا بولعاندىقتان, ءتورت بولمەلى ءۇي تيە مە دەپ ۇمىتتەنىپ وتىرمىن. اۋىل اكىمدىگىنىڭ ماماندارى قاجەتتى قۇجاتتاردى راسىمدەۋگە كومەكتەستى. جاناشىر جاندارعا مىڭ العىس», دەيدى بوريسوۆكا اۋلىنىڭ تۇرعىنى ناتاليا زايكا.

قىزىل سۋ جۇرگەن كەزدە ۇرەي بۇلتى تورلاعان اتباساردىڭ اس­پانى شايداي اشىلىپ كەلەدى. بۇل – ەڭ الدىمەن, بەرەكەلى ءىستىڭ ناتيجەسى.

اقمولا وبلىسى,

اتباسار اۋدانى