ۇكىمەتتە ۆيتسە-پرەمەر سەرىك جۇمانعاريننىڭ توراعالىعىمەن وتكەن كەڭەستە شارۋاشىلىقتار بويىنشا ەسەپكە الۋدىڭ ەلەكتروندى جۇيەسىندە دەرەكتەردى جاڭارتۋ جونىندەگى جۇمىستىڭ ارالىق قورىتىندىلارى قارالدى.
مال مەن قۇس بويىنشا اقپاراتتى الدىن الا تالداۋ ناتيجەسى اكىمدىكتەر جۇمىستى ءتيىمدى جۇرگىزبەگەنىن كورسەتتى.
اۋىل شارۋاشىلىعى ءمينيسترى ايداربەك ساپاروۆ كەيبىر وڭىردە دەرەكتەردى بۇرمالاۋ فاكتىلەرى بار ەكەنىن ايتتى. جۋىردا ۆەتەرينارلىق ينسپەكتورلار ەكى وبلىستىڭ جەكەلەگەن اۋىلدارىن ارالاپ, ەلەكتروندى جۇيەدەگى اقپاراتتا ناقتى مال سانىنان 30-70% ايىرماشىلىق بار ەكەنىن انىقتاعان.
كەڭەستە ءىرى قارا مالدىڭ ءسۇتتى جانە ارالاس تۇقىمدارىنىڭ رەسپۋبليكالىق پالاتاسىنىڭ اتقارۋشى ديرەكتورى ازامات ساعىنباەۆ ءسوز سويلەدى. پالاتانىڭ مالىمەتىنشە, ەلىمىزدە 2,2-2,5 ملن ليترگە جۋىق ءسۇت وندىرىلەدى. ال رەسمي ستاتيستيكا 2023 جىلى ءسۇت ساۋىمى 6,3 ملن توننانى قۇرادى.
«شارۋاشىلىقتار بويىنشا ەسەپكە الۋ دەرەكتەرىن ساپالى تۇردە وزەكتەندىرۋ قاجەت. بۇل – مال مەن وسىمدىك شارۋاشىلىعىنداعى دا ستاتيستيكانى قالىپتاستىرۋدىڭ نەگىزگى اقپارات كوزى. ولارسىز اۋىل شارۋاشىلىعىن ءتيىمدى جوسپارلاپ, دامىتۋ مۇمكىن ەمەس. اۋىل شارۋاشىلىعى مينيسترلىگىنە ءار ءوڭىر جانە اۋدان اكىمدەرىمەن شارۋاشىلىقتار بويىنشا ەسەپكە الۋ دەرەكتەرىن دۇرىس تولتىرۋ ماسەلەسىن پىسىقتاۋدى, ال اكىمدىكتەرگە دەرەكتەردى ەلەكتروندى ەسەپكە الۋ جۇيەلەرىن وزەكتەندىرۋدى تاپسىرامىن», دەدى س.جۇمانعارين.