مەملەكەت باسشىسى قاسىم-جومارت توقاەۆ گەرمانيا ەكونوميكاسى شىعىس كوميتەتىنىڭ باسقارما توراعاسى كاترينا كلااس-ميۋلحويزەردى قابىلدادى. بۇل تۋرالى اقوردا ءباسپاسوز قىزمەتى حابارلادى, دەپ جازادى Egemen.kz.
كەزدەسۋ بارىسىندا پرەزيدەنت قاسىم-جومارت توقاەۆ پەن گەرمانيا ەكونوميكاسى شىعىس كوميتەتىنىڭ باسقارما توراعاسى جانە CLASS Group كومپانياسى بايقاۋشىلار كەڭەسىنىڭ توراعاسى كاترينا كلااس-ميۋلحويزەر ەكىجاقتى ەكونوميكالىق ىنتىماقتاستىقتى ودان ءارى نىعايتۋ پەرسپەكتيۆاسىن تالقىلادى.
مەملەكەت باسشىسىنىڭ ايتۋىنشا, گەرمانيا قازاقستاننىڭ ەۋروپا وداعىنداعى ستراتەگيالىق سەرىكتەسى سانالادى. ساۋدا-ەكونوميكالىق قاتىناستار قارقىندى دامىپ كەلەدى. سونداي-اق نەمىس بيزنەسى قازاقستانداعى ۇلەسىن كەڭەيتۋگە قىزىعۋشىلىق تانىتىپ وتىر.
پرەزيدەنت بىلتىر قازاقستانعا گەرمانيادان تارتىلعان تىكەلەي ينۆەستيتسيا كولەمى 64 پايىزعا ءوسىپ, 770 ميلليون دوللارعا جەتكەنىن اتاپ ءوتتى. بۇل – رەكوردتىق كورسەتكىش.
كەزدەسۋدە اۋىل شارۋاشىلىعى سالاسىنداعى ىنتىماقتاستىق ماسەلەسىنە دە ەرەكشە نازار اۋدارىلدى. وسى ورايدا قاسىم-جومارت توقاەۆ بۇعان دەيىن ورنىقتى ەگىنشىلىكتىڭ ايماقتىق ورتالىعىن قۇرۋ جونىندە ۇسىنىس ايتقانىن ەسكە سالدى. پرەزيدەنتتىڭ پىكىرىنشە, بۇل ورتالىق ەلىمىزدىڭ اۋىل شارۋاشىلىعى الەۋەتىن بارىنشا تولىق پايدالانۋعا, يننوۆاتسيالىق تەحنولوگيالاردى ەنگىزۋگە جانە ولاردى كوممەرتسيالاندىرۋعا ىقپال ەتەدى.
مەملەكەت باسشىسى قازاقستاننىڭ اگرارلىق الەۋەتىن دامىتۋعا CLASS زاۋىتىنىڭ قوسقان ۇلەسىن جوعارى باعالادى.