پاراقورلىققا قاتىستى ەلىمىزدە زاڭ قاتاڭداتىلدى. وسى ورايدا بۇكىل حالىققا قىزمەت كورسەتۋ مەكەمەلەرى سىبايلاس جەمقورلىقپەن كۇرەسكە جۇمىلعان. سەبەبى ادىلەتتى قازاقستاندى قۇرۋدىڭ نەگىزگى باستاماسى جەمقورلىقسىز قوعام قالىپتاستىرۋدان كەلىپ تۋىندايدى. بۇل رەتتە شىمكەنتتىڭ مەديتسينا سالاسىندا پاراقورلىقتى تۇبىرىمەن جويۋ باعىتىندا تىندىرىمدى ىستەر اتقارىلىپ جاتىر دەۋگە تولىق نەگىز بار.
بۇعان شىمكەنت قالالىق دەنساۋلىق ساقتاۋ باسقارماسىنىڭ باسشىسى نۇرلىبەك اسىلبەكوۆ باستاعان ءبىر توپ باس دارىگەردىڭ ورتالىق كوممۋنيكاتسيالار قىزمەتى الاڭىندا بەرگەن ءباسپاسوز ءماسليحاتى بارىسىندا انىق كوز جەتكىزدىك. بريفينگتە شاھاردىڭ باس دارىگەرى مەن اۋرۋحانا, ەمحانا باسشىلارى تاراپىنان مەديتسينا سالاسىنداعى سىبايلاس جەمقورلىققا قارسى كۇرەس جانە ونىڭ الدىن الۋ جولىنداعى شارالار تۋرالى مالىمدەمەلەر جاسالدى. پەرزەنتحانا, ونكولوگيالىق, كارديولوگيالىق, پسيحيكالىق دەنساۋلىق ورتالىقتارىنىڭ باس دارىگەرلەرى دە ءباسپاسوز ءماسليحاتىنا قاتىستى.
جيىندا ءبىرىنشى بولىپ ءسوز العان ن.اسىلبەكوۆ ەمدەلۋشىلەر مەن قىزمەتكەرلەردەن سىبايلاس جەمقورلىق ارەكەتىنە وراي شاعىمدار ءتۇسىپ تۇراتىنىن جاسىرمادى. بىراق كوپ جاعدايدا مۇنداي دەرەكتەر راستالماي شىعادى. وسى تۇستا قالانىڭ باس دارىگەرى دەنساۋلىق ساقتاۋ سالاسىنداعى سىبايلاس جەمقورلىققا قارسى كۇرەستەگى نەگىزگى قۇرالداردىڭ ءبىرى اشىقتىق ەكەنىن العا تارتتى. سونىڭ ىشىندە قارجىلاندىرۋ كوزىندە دە اشىق پورتال ارقىلى جۇمىس ىستەلەدى. سونداي-اق ناۋقاستار ءجيى كەلەتىن ەمدەۋ ورتالىقتارىندا 2 مىڭنان اسا بەينەكامەرالار ورناتىلعان.
«كادر ماسەلەسى بويىنشا سىبايلاس جەمقورلىققا اپاراتىن جولداردى جويۋ ماقساتىندا ءتيىستى جۇمىستار اتقارىلىپ جاتىر. ماسەلەن, قازىر ادامداردى مەديتسينا مەكەمەسىنە جۇمىسقا قابىلداۋ جاريالى تۇردە ىسكە اسىرىلادى. شىنايىلىق, مولدىرلىك – سىبايلاس جەمقورلىق ارەكەتتەرىن, سوعان يتەرمەلەيتىن جاعداياتتاردى جويۋ ءۇشىن قاجەتتى شارا. سوندىقتان قالا حالقىنىڭ دەنساۋلىعىنا جاۋاپتى سالا باسشىلىعى 2022 جىلدىڭ 8 قىركۇيەگىندە شاھاردىڭ تسيفرلاندىرۋ باسقارماسىمەن بىرلەسىپ «i-shymkent.kz» پورتالى ارقىلى نR-ۇدەرىس جۇرگىزۋ جۇيەسىن ىسكە قوستى. بۇعان قوسا بۇگىنگى تاڭدا قالاداعى مەديتسينا ۇيىمدارى اراسىندا دەنساۋلىق ساقتاۋ سالاسىنداعى جەمقورلىق ارەكەتتەرىن بولدىرماۋ ءۇشىن 11 جوبا ىسكە اسىپ جاتىر, ونىڭ ىشىندە جاڭا باستاما سانالاتىن قاناتقاقتى 5 جوبانى ەرەكشە اتاپ وتۋگە بولادى. سونداي-اق مەگاپوليستىڭ ەمدەۋ مەكەمەلەرىندە كومپلاەنس وفيتسەرلەرى تۇراقتى جۇمىستارىن جۇرگىزىپ وتىر. ولارىڭ جالپى سانى – 28», دەدى ن.اسىلبەكوۆ.
بۇدان كەيىن بايانداما جاساعان №1 قالالىق كلينيكالىق اۋرۋحاناسىنىڭ باس دارىگەرى قايرات كاليبەكوۆ اتالعان مەديتسينالىق مەكەمە تاۋلىك بويى جۇمىس ىستەپ, ناۋقاستارعا قاجەتتى مەديتسينالىق كومەك كورسەتۋ ءۇشىن ۇزدىكسىز ەم-شاراسىن جۇرگىزەتىنىن اتاپ ءوتتى. سىبايلاس جەمقورلىقتىڭ الدىن الۋدىڭ ەڭ ءتيىمدى جولدارىنىڭ ءبىرى – قۇقىقتىق ءتارتىپتى قامتاماسىز ەتۋ. وسى ماقساتقا وراي اۋرۋحانا اۋماعىندا 13 بەينەكامەرا ورناتىلعان. سول ارقىلى ەمدەۋ مەكەمەسىندەگى بارلىق قيمىل-قوزعالىس باقىلاۋعا الىنىپ, زاڭ بۇزۋشىلىقتىڭ جولىن كەسۋگە جاقسى كومەك بەرىپ وتىر. سونداي-اق بۇكىل بولىمشە, زال, گالەرەيا مەن ادام كوپ جينالاتىن ورىندارعا جەدەل مونيتورينگ جۇرگىزەتىن 75 بەينەكامەرا قويىلعان. ەندىگى جەردە اۋراحانا ISO 37001:2016 «سىبايلاس جەمقورلىققا قارسى ءىس-قيمىل مەنەدجمەنتى جۇيەسى, تالاپتار جانە قولدانۋ جونىندەگى نۇسقاۋلىق» اتتى حالىقارالىق ستاندارتى بويىنشا سەرتيفيكاتتاۋدان وتپەك. مەكەمە باسشىسىنىڭ ايتۋىنشا, بۇل الداعى ۋاقىتتا جۇزەگە اساتىن باستى جوسپاردىڭ ءبىرى بولىپ تۇر.
ال №1 قالالىق ەمحاناسىنىڭ باس دارىگەرى ماحامبەت بەيسەۋوۆتىڭ مالىمدەۋىنشە, شىمكەنتتە وسى كۇندە 13 مەملەكەتتىك ەمحانا حالىققا ساپالى مەديتسينالىق كومەك كورسەتەدى. ەمحاناداعى بار قىزمەت الدىمەن تىركەۋ ورنىنان باستالادى. وسىعان بايلانىستى تۋىنداعان كەز كەلگەن سۇراققا تولىق جاۋاپتى ناۋقاس سول تىركەۋ ورنىنداعى مامانداردان الا الادى. سونىمەن قاتار قوسىمشا ينفوبوكستار ءتيىستى اقپارات بەرۋگە ءازىر. كەلۋشەردىڭ ءوز-وزىنە قىزمەت كورسەتەتىن ارنايى بۇرىشى دا ۇيىمداستىرىلعان. اتالعان ەمحانانىڭ ءبىرىنشى قاباتىندا ناۋقاستارعا قولداۋ شارالارىن ۇسىناتىن قىزمەت, فرونت-وفيس بار, كومپلاەنس-وفيتسەر تۋىنداعان ماسەلەلەردى شەشۋگە دايىن. ماسەلەن, ول ەمحاناعا تىركەلۋ, قاجەتتى مەديتسينالىق قىزمەت تۇرلەرىن الۋ, جۇمىسقا بايلانىستى تىركەۋ ۋچاسكەسىن اۋىستىرۋ, تەگىن ءدارى-دارمەكپەن قامتىلۋ سەكىلدى سان الۋان ماسەلەلەر بولۋى مۇمكىن.
ءوز كەزەگىندە قالالىق كلينيكالىق بالالار اۋرۋحاناسىنىڭ باس دارىگەرى دينارا ءجۇمادىلوۆا دا ەمدەۋ مەكەمەسىندە سىبايلاس جەمقورلىقتىڭ الدىن الۋ بويىنشا اتقارىلىپ جاتقان جۇمىستار مەن ءتيىستى تاجىريبەسى جونىندە بايانداپ بەردى.
«قوعامنىڭ ەڭ باستى قۇندىلىعى ادام دەيتىن بولساق, بارشا قوعامنىڭ الدىنداعى وزەكتى ماسەلەنىڭ ءبىرى – ازاماتتاردىڭ دەنساۋلىعىن ساقتاۋ. سونىڭ ىشىندە بالالار دەنساۋلىعىن جاسقارتۋ ەڭ الدىمەن ساپالى مەديتسينالىق كومەككە كەلىپ تىرەلەدى ال سىبايلاس جەمقورلىق جايلاعان جەردە ساپالى مەديتسينا جايلى اڭگىمە قوزعاۋدىڭ ءوزى ارتىق. سوندىقتان مەگاپوليستىڭ جالپى دەنساۋلىق ساقتاۋ جۇيەسىمەن بىرگە بالالار اۋرۋحاناسىنىڭ دا باستى ستراتەگيالىق دامۋ ۇدەرىسى جەڭ ۇشىنان جالعاسقان جەمقورلىقتى تۇبىمەن جويۋعا كەلىپ سايادى. وسى باعىتتا كەيىنگى جىلدارى ەمدەۋ مەكەمەسىندە كوپتەگەن يگى باستاما, تىڭ ءادىس-تاسىلدەر ەنگىزىلىپ كەلەدى. ماسەلەن, 2021 جىلدان باستاپ شتاتتىق كەستەگە ساي وفيتسەر-كومپلاەنس قىزمەتى قاراستىرىلىپ, سول بويىنشا بۇگىنگى تاڭدا جاۋاپتى مامان بەكىتىلگەن», دەدى د.ءجۇمادىلوۆا.
سونداي-اق باس دارىگەردىڭ ايتۋىنشا, مەگاپوليستىڭ اسار شاعىن اۋدانىندا ورنالاسقان بالالار اۋرۋحاناسىندا سىبايلاس جەمقورلىقتى بولدىرماۋ, كورسەتىلەتىن مەديتسينالىق قىزمەتتىڭ ساپاسىن باقىلاۋعا الۋ ءارى بالالار قاۋىپسىزدىگىن قامتاماسىز ەتۋ ماقساتىندا اۋرۋحانانىڭ ءبىرىنشى عيماراتىندا 200 بەينەكامەرا ورناتىلدى. ونىڭ 30-ى سىرتتا بولسا, 170 كامەرا عيماراتتىڭ ءىش جاعىن باقىلايدى. ءوز كەزەگىندە اۋرۋحانانىڭ ەكىنشى كورپۋسىندا 138 بەينەكامەرا جۇمىس ىستەيدى. بۇعان قوسا اتالعان ەمدەۋ ۇيىمىنىڭ باسشىسى مامانداردى جۇمىسقا الۋدا ۇمىتكەرلەرگە تەڭدەي مۇمكىندىكتەر بەرىلەتىنىن اتاپ ءوتتى. سونىڭ نەگىزىندە اشىق اڭگىمەلەسۋ جۇرگىزىلىپ, ونىڭ قورىتىندىسىنا سايكەس كوميسسيا جۇمىسقا قابىلداۋ تۋرالى شەشىم قابىلدايدى.
جالپى, اشىق ادىسپەن جۇمىسقا تۇرۋ ماماندار اراسىندا ءادىل باسەكەلەستىكتى كۇشەيتسە, ول ءوز كەزەگىندە مەديتسينالىق قىزمەت ساپاسىنىڭ جاقسارۋىنا تىكەلەي اسەر ەتەتىنى ءسوزسىز. ال جەمقورلىق بولعان جەردە ادالدىق تا, ساپا دا قۇريتىنى راس. سوندىقتان مەگاپوليستىڭ مەديتسينا سالاسىنا جاۋاپتى ماماندار قوعام دەرتىن جەڭىپ شىعۋعا وزدەرىن مۇددەلى سانايدى.
شىمكەنت