جەزقازعان قالاسىندا پارلامەنت ءماجىلىسىنىڭ ەكولوگيا جانە تابيعاتتى پايدالانۋ كوميتەتىنىڭ كوشپەلى وتىرىسى ءوتىپ, ۇلىتاۋ وبلىسىنىڭ ەكولوگيالىق جانە ەنەرگەتيكالىق ماسەلەلەرىن شەشۋ جولدارى تالقىلاندى.
كوميتەت توراعاسى ەدىل جاڭبىرشين باستاعان كوشپەلى وتىرىسقا قاتىسۋشىلار وبلىس ورتالىعى مەن ساتباەۆ قالاسىنداعى بىرقاتار نىساندى ارالاپ كوردى, جەرگىلىكتى جەردەگى ەكولوگيالىق احۋالمەن جەتە تانىسۋعا ۇمتىلدى.
ال ايماقتاعى ەكولوگيالىق جاعداي – الاڭداتارلىق كۇيدە. كەيىنگى كەزدە ءوڭىر حالقىنىڭ اراسىندا ونكولوگيالىق اۋرۋلاردىڭ كوبەيىپ كەتكەنى بەكەر بولماسا كەرەك. اۋانىڭ لاستانۋىنا قوسا اۋىزسۋدىڭ ساپاسى, اسىرەسە جەزقازعان قالاسىندا مۇلدەم سىن كوتەرمەيدى. جەزقازعاندىق قوعام بەلسەندىلەرى بۇل ماسەلەگە بيلىكتىڭ نازارىن اۋدارۋ ماقساتىندا جەزقازعان, ساتباەۆ قالالارى مەن ۇلىتاۋ اۋدانىن «ەكولوگيالىق اپات ايماعى» دەپ جاريالاۋ جونىندە ۇسىنىس بىلدىرگەن ەدى. وسى تالاپتىڭ ناتيجەسىندە «ەكوسەرۆيس-س» جشس جەزقازعان- ۇلىتاۋ وڭىرىندەگى ونكولوگيالىق اۋرۋلاردىڭ سەبەپتەرىن زەرتتەۋمەن اينالىسىپ جاتىر. بۇل مەكەمە زەرتتەۋ جۇمىستارىن الداعى قازان ايىندا اياقتايدى. وكىنىشكە قاراي, جاڭاارقا اۋدانىندا مۇنداي ماقساتتاعى زەرتتەۋ جۇرگىزىلىپ جاتقان جوق. بۇل – جەرگىلىكتى بيلىكتىڭ تاراپىنان جىبەرىلگەن اعاتتىق. ايتپەسە, جاڭاارقا وڭىرىندە دە ءتۇيىندى ماسەلەلەر جەتكىلىكتى. باسقاسىن ايتپاعاندا, جاڭاارقاعا ءبىر ەمەس, ەكى رەت زىمىران قۇلاپ, گەپتيل توگىلگەنى بەلگىلى. وبلىستىڭ قاراجال قالاسى مەن جايرەم كەنتىنىڭ تۇرعىندارى حالىققا جەتىمسىزدىك تۋىنداپ جاتقاندا «كازتسينك جگوك» زاۋىتىنىڭ ءوندىرىس قاجەتىنە اۋىزسۋدى پايدالانۋىنا نارازىلىق ءبىلدىرىپ ءجۇر. كارىز سۋلارىنىڭ وزەن, كولدەرگە قۇيىلۋى, وبلىس تەرريتورياسىنداعى سۋقويمالارىنىڭ لاستانۋى جانە باسقا ماسەلەلەر كوشپەلى وتىرىستا جان-جاقتى ءسوز بولدى.
كوشپەلى وتىرىس كەزىندە ءماجىلىس دەپۋتاتتارى, پارتيالاردىڭ وكىلدەرى, ەڭبەك ارداگەرلەرى, قوعام بەلسەندىلەرى جيىنعا قاتىسقان ۇكىمەت مۇشە-لەرىنە, وبلىس پەن ءىرى ءوندىرىس باسشىلارىنا وزەكتى سۇراقتارىن قويىپ, ۇسىنىستارىن جەتكىزدى. قوعام بەلسەندىلەرى تاراپىنان ايماقتاعى الپاۋىت كاسىپورىن «قازاقمىس» كورپوراتسياسى جشس-نىڭ اتىنا كوپ سىن ايتىلدى. ولاردىڭ ايتۋىنشا, ايماقتا الاڭداتارلىق احۋالدىڭ قالىپتاسۋى – كورپوراتسيانىڭ ەكولوگيالىق تالاپتاردى ساقتاماۋىنىڭ سالدارى, «قازاقمىس» ءوز مىندەتتەمەلەرىن ورىنداۋعا سالعىرت قاراۋى. بۇل – ءبىر عانا مىسال. ۇكىمەت 2022 جىلعى 4 قاراشادا ۇلىتاۋ وبلىسىن الەۋمەتتىك-ەكونوميكالىق دامىتۋدىڭ 2022-2026 جىلدارعا ارنالعان كەشەندى جوسپارىن بەكىتۋ تۋرالى №871 قاۋلى قابىلداعان ەدى. وسى قاۋلىنىڭ «جىلۋمەن جابدىقتاۋ» دەپ اتالاتىن بولىگىنىڭ 48-تارماعىندا ساتباەۆ قالاسىندا قوسىمشا 5-قازاندىقتى ورناتىپ, №1 جىلۋ ستانساسىن جاڭعىرتۋدىڭ ورىندالۋ مەرزىمى 2024 جىل دەپ كورسەتىلگەن. بىلتىر ساتباەۆ قالاسى قازاندىعىنان بۋداقتاعان قارا ءتۇتىن قالانى التى اي بويى كۇلگە كومىپ تاستادى. بۇعان ەشكىم جاۋاپ بەرگەن دە ەمەس. 5-قازاندىق سالۋ, جاڭعىرتۋ جۇمىستارى دا جۇرگىزىلگەن جوق. سوعان قاراعاندا «قازاقمىس» ۇكىمەت بەكىتكەن كەشەندى جوسپارداعى وزدەرىنە العان مىندەتتەمەلەرىن ەسىنەن شىعارىپ العان دا بولۋى مۇمكىن.
جيىندى قورىتىندىلاعان ە.جاڭبىرشين بەلسەندىلىك تانىتقان بارشا ازاماتقا العىسىن ايتىپ, كوپشىلىكتىڭ پىكىرى اياقسىز قالمايتىنىنا سەندىردى.
– جىلدار بويى قوردالانىپ قالعان ماسەلەلەردى ءبىر دەمدە شەشۋ مۇمكىن ەمەس, بىراق كەيىنگە ىسىرا بەرۋگە دە بولمايدى. ءبىز مۇنى جەزقازعان جەرىندە بولىپ ەكى كۇندە كوزىمىزبەن كورىپ, جانىمىزبەن سەزىندىك. مىس ورداسىنىڭ كەتەۋى كەتكەن كۇيىن كورىپ, كوڭىلىمىز قۇلازىدى, جۇرەگىمىز اۋىردى. سوندىقتان مۇمكىندىگىنشە قولداۋ, كومەك كورسەتۋ – مىندەتىمىز, – دەدى ول.
ۇلىتاۋ وبلىسى