ۆيتسە-پرەمەر قانات بوزىمباەۆ اتىراۋ وبلىسى يندەر اۋدانىنىڭ يندەربور, جاسۋات, قۇرىلىس اۋىلدارىندا, سونداي-اق ماحامبەت اۋدانىنا قاراستى ماحامبەت, سارايشىق, تالدىكول اۋىلدارىندا جاعالاۋدى نىعايتۋ جۇمىستارىن تەكسەردى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
وڭىردە سۋ تاسقىنى قاۋپى ساقتالىپ تۇر. جايىق-يندەربور جانە جايىق-ماحامبەت گيدروبەكەتىندە سۋ دەڭگەيى قاۋىپتى مەجەدەن استى. جايىق وزەنىندە سۋدىڭ ودان ءارى كوتەرىلۋى كۇتىلىپ وتىر. بارلىق قاۋىپتى ۋچاسكەلەردە تاۋلىك بويى كەزەكشىلىك ۇيىمداستىرىلعان. اپاتپەن كۇرەسكە جەرگىلىكتى تۇرعىندار, ەرىكتىلەر جانە ءارتۇرلى كاسىپورىندار قىزمەتكەرلەرى بەلسەندى تۇردە اتسالىسىپ جاتىر.
يندەر اۋدانىندا جەر بوگەتتەرىنىڭ جالپى ۇزىندىعى 30 شاقىرىمدى قۇرايدى, ولار جاسۋات, يندەربور, قۇرىلىس, كوكتوعاي, ورلىك, ەسبول, ەلتاي ەلدى مەكەندەرىندە سالىنعان. اتالعان جۇمىستارعا 40-تان استام ارنايى تەحنيكا, 300-گە جۋىق اسكەري قىزمەتشى جانە 100-گە جۋىق تج قىزمەتكەرى, ونىڭ ىشىندە قىزىلوردا وبلىسى تجد قىزمەتكەرلەرى جۇمىلدىرىلدى.
ماحامبەت اۋدانىندا جايىق وزەنى بويىندا 17 ەلدى مەكەن ورنالاسقان. ولاردى قورعاۋ ءۇشىن 80 كم جاعالاۋدى نىعايتاتىن بوگەتتەر سالىندى. اۋداندا بوگەتتەردىڭ جالپى ۇزىندىعى 105,8 كم قۇرايدى. تاسقىنعا قارسى شارالارعا 130 ارنايى تەحنيكا, 650 اسكەري قىزمەتشى, 200-دەن استام تج قىزمەتكەرى, 300-گە جۋىق ەرىكتىلەر, جەرگىلىكتى تۇرعىندار تارتىلدى.
ۆيتسە-پرەمەر قانات بوزىمباەۆ ماحامبەت اۋدانى اكىمىنە ەجەلگى سارايشىق قالاشىعى ماڭىنداعى بوگەتتى تاعى دا قوسىمشا كوتەرۋدى تاپسىردى.
«ول ءۇشىن مۇندا قورعانىس مينيسترلىگىنىڭ جەكە قۇرامىنىڭ جۇزدەگەن قىزمەتكەرى مەن ونداعان تەحنيكا تارتىلادى. ءبىزدىڭ تاريحي مۇرامىزدى قورعاۋعا جانە ساقتاۋعا جاۋاپكەرشىلىكپەن قاراۋ قاجەت», دەپ تاپسىردى قانات بوزىمباەۆ.