مەملەكەت باسشىسى قاسىم-جومارت توقاەۆ ماسكەۋدە ءوتىپ جاتقان جوعارى ەۋرازيالىق ەكونوميكالىق كەڭەستىڭ (جەەك) كەزەكتى وتىرىسىنا قاتىستى, دەپ حابارلايدى Egemen.kz.
سامميتكە قازاقستان پرەزيدەنتىمەن قاتار, ارمەنيا پرەمەر-ءمينيسترى – جەەك توراعاسى نيكول پاشينيان, رەسەي پرەزيدەنتى ۆلاديمير پۋتين, بەلارۋس پرەزيدەنتى الەكساندر لۋكاشەنكو, قىرعىزستان پرەزيدەنتى سادىر جاپاروۆ, سونداي-اق ەۋرازيالىق ەكونوميكالىق كوميسسيا القاسىنىڭ توراعاسى باقىتجان ساعىنتاەۆ قاتىستى.
مەملەكەتتەر باسشىلارى ەۋرازيالىق ەكونوميكالىق وداق اياسىنداعى ىقپالداستىقتىڭ ماڭىزدى مىندەتتەرى مەن نەگىزگى باعىتتارىن تالقىلادى. سونداي-اق ەاەو قىزمەتىنىڭ جەكەلەگەن اسپەكتىلەرى جونىندە پىكىر الماستى.