بىلتىر مەملەكەت باسشىسىنىڭ تاپسىرماسىمەن «اۋىل اماناتى» باعدارلاماسى ىسكە قوسىلعان ەدى. بۇل ءۇشىن ۇكىمەتتەن 100 ملرد تەڭگە قارجى ءبولىندى. قاراجاتتىڭ 70%-عا جۋىعى جامبىل (24,1 ملرد), تۇركىستان (19,8 ملرد), اقتوبە (16 ملرد), الماتى (8,3 ملرد تەڭگە) وبلىستارىنا قاراستىرىلعان. بۇگىندە 82,4 ملرد تەڭگە سوماسىنا 13,2 مىڭ شاعىن نەسيە بەرىلىپتى.
اۋىل شارۋاشىلىعى ۆيتسە-ءمينيسترى ەربول تاسجۇرەكوۆتىڭ ايتۋىنشا, باعدارلاما جىلدىق 2,5% سىياقى مولشەرلەمەسى بويىنشا 5 جىلعا دەيىنگى مەرزىمگە شاعىن نەسيە بەرەدى. ال مال شارۋاشىلىعىنداعى جوبالارعا كرەديت مەرزىمى 7 جىلدى قۇرايدى. نەسيەنىڭ ەڭ جوعارى سوماسى 2,5 مىڭ ايلىق ەسەپتىك كورسەتكىشكە (اەك) دەيىن, (بيىل 9,2 ملن تەڭگە), اۋىل شارۋاشىلىعى كووپەراتيۆتەرىن دامىتۋ ءۇشىن 8 مىڭ ايلىق ەسەپتىك كورسەتكىشكە دەيىن ( 29,5 ملن تەڭگە) قاراستىرىلعان.
«اۋىل شارۋاشىلىعى كووپەراتسياسىن دامىتۋعا دا ەرەكشە كوڭىل ءبولىندى. «اۋىل اماناتى» باعدارلاماسى اياسىندا 6,2 ملرد تەڭگە سوماسىنا 299 كووپەراتيۆ قارجىلاندىرىلدى. جالپى, كووپەراتيۆكە بىرىگۋ – اۋىل شارۋاشىلىعى تەحنيكاسىن بىرلەسىپ پايدالانۋعا, وندىرىلگەن ءونىمدى ساۋدا بازارلارىنىڭ, قالا دۇكەندەرىنىڭ سورەلەرىنە شىعارۋعا مۇمكىندىك بەرەدى», دەيدى ە.تاسجۇرەكوۆ.
اۋىلدى دامىتۋعا ارنالعان باعدارلاماعا مەملەكەتتەن 100 ملرد تەڭگە ءبولۋ جوسپارلانعان. قاراجات جەتىسپەگەن جاعدايدا وبلىس اكىمدىكتەرىنىڭ جەرگىلىكتى بيۋدجەتتەن شاعىن نەسيەلەۋگە قوسىمشا اقشا ءبولۋ مۇمكىندىگى بار.