جۋىردا موڭعوليا استاناسى ۇلانباتىر قالاسىندا تۇركى اكادەمياسى جانە موڭعوليا عىلىم اكادەمياسى ارحەولوگيا ينستيتۋتىنىڭ بىرلەسىپ ۇيىمداستىرۋىمەن «نومعون-2» عۇرىپتىق كەشەنىنەن تابىلعان بىتىكتاستىڭ تومەنگى بولىگىنىڭ تانىستىرىلىمى ءوتتى. بۇل تۋرالى تۇركى اكادەمياسىنىڭ ءباسپاسوز قىزمەتى حابارلادى, دەپ جازادى Egemen.kz.
ۇلانباتىر قالاسىنداعى شىڭعىسحان مۇراجايىندا وتكەن عىلىمي ءىس-شاراعا تۇركى اكادەمياسىنىڭ پرەزيدەنتى شاھين مۇستافاەۆ, موڭعوليا عىلىم اكادەمياسىنىڭ پرەزيدەنتى دۇگەرين رەگدەل, قازاقستاننىڭ موڭعولياداعى ەلشىسى عابيت قويشىباەۆ, تۇركيانىڭ موڭعولياداعى ەلشىلىگىنىڭ ۋاقىتشا سەنىمدى وكىلى الي سايد سەردەنگەچتي, سونىمەن قاتار ديپلوماتيالىق ميسسيا وكىلدەرى, ينستيتۋتتاردىڭ باسشىلارى جانە باسقا دا بەلگىلى عالىمدار قاتىستى.
ايتا كەتۋ كەرەك, ارحەولوگتار ەلتەرىس قۇتلىق قاعانعا تيەسىلى دەپ بولجاپ وتىرعان بىتىكتاستىڭ جوعارعى بولىگى الدىڭعى جىلى وسى كەشەندەگى قازبا جۇمىستارى كەزىندە تابىلعان ەدى.
ونىڭ ەكىنشى بولىگىن ىزدەۋگە قاتىسقان عالىمداردىڭ مالىمدەۋىنشە, بىتىكتاستىڭ جاڭادان تابىلعان تومەنگى بولىگىندە كونە قىتاي تىلىندە جازىلعان ءماتىن انىقتالعان.
ەسكەرتكىشتىڭ ءبىرشاما ب ۇلىنگەنى بايقالىپ وتىر.
عالىمدار بىتىكتاستاعى جازۋلاردى وقىپ, زەرتتەۋ جۇمىستارىن جۇرگىزىپ جاتىر.
وسى القاپتا تۇركى اكادەمياسى جۇرگىزگەن ارحەولوگيالىق قازبا جۇمىستارى بارىسىندا 2019, 2022, 2023 جىلدارى مالداس قۇرىپ وتىرعان قاعاننىڭ ءبادىز ءتاسمۇسىنى مەن ءمۇسىننىڭ باس بولىگى تابىلعان ەدى. سونىمەن قاتار باۋىرىندا ەكى الانى بەينەلەنگەن ارىستان تاس ءمۇسىنى جانە 5 ءبادىز تاس ءمۇسىننىڭ سىنىق بولشەكتەرى انىقتالعان.
تۇركى اكادەمياسى مەن موڭعوليا عىلىم اكادەمياسى ارحەولوگيا ينستيتۋتى بولاشاقتا نومعون جازىعىنىڭ توعىزىنشى عۇرىپتىق كەشەنىندە ارحەولوگيالىق قازبا جۇمىستارىن جالعاستىرۋدى جوسپارلاپ وتىر.