لەوناردو دا ءۆينچيدىڭ اتاعىن ايعا شىعارعان «مونا ليزانى» لۋۆر مۋزەيىنىڭ بولەك زالىنا ساقتىق شارالارىن ورىنداي وتىرىپ كوشىرۋ ءۇشىن 500 ميلليون ەۋروعا جۋىق قاراجات قاجەت ەكەن.
«Euronews» حابارلاعانداي, مۋزەيگە كەلۋشىلەردىڭ كوبى كارتينانى انىق كورە المايتىنىنا شاعىمدانعان. شىنى پانەلدىڭ ارتىندا ءىلۋلى تۇرعان كارتينا ۇلكەن زالدىڭ ىشىندە پوشتا ماركاسى سياقتى اسەر قالدىرادى دەيدى جۇرت.
لۋۆردىڭ XVI عاسىرداعى يتاليالىق كەسكىندەمەلەر باس كۋراتورى ۆينسەنت دەلەۆيننىڭ ايتۋىنشا, بۇل كارتينا اۆتورىنىڭ يدەياسىنا قايشى.
«لەوناردو دا ۆينچي كارتينا مەن ونى كورگەن ادام اراسىندا جەكە قارىم-قاتىناس ورناتقىسى كەلدى», دەيدى ول.
ايتا كەتەيىك, قاۋىپسىزدىك تالابىنىڭ قاتاڭ بولۋى سونشالىق, مۋزەيگە كەلۋشىلەرگە كارتينانى كورۋ ءۇشىن نەبارى 30 سەكۋند قانا ۋاقىت بەرىلەدى. ال بۇل ۋاقىتتا سەلفيگە تۇسۋگە اسىققان ادامدار ءبىر-بىرىنە ىڭعايسىزدىق تۋدىرىپ, تۋىندىدان ءلاززات الۋعا كەدەرگى كەلتىرەدى ەكەن. سوندىقتان دا لۋۆر ديرەكتسياسى پورترەتتى قايتا ءىلۋ كەرەك دەگەن شەشىم قابىلدادى.
مۇراجاي ديرەكتورى لورەنس دە كارستىڭ ايتۋىنشا, كارتينانى كوشىرۋ وڭاي شارۋا ەمەس. ول ءۇشىن لۋۆر مۋزەيىنە جاڭا كىرەبەرىس اشىپ, جەرتولەدەگى ەكى زالدى رەتتەۋ قاجەت. ءسويتىپ, «مونا ليزا» كارتيناسى جەكە زالعا ورنالاستىرىلىپ, كەلۋشىلەردىڭ كەزەگى دە ازايماق.
ال بۇل ماقساتقا جەتۋ ءۇشىن ءتيىستى جوندەۋ جۇمىستارىنا 500 ميلليون ەۋرو قاجەت بولىپ وتىر. اتالعان باستامانى فرانتسيانىڭ مادەنيەت مينيسترلىگى قولداسا, ەندىگى جاۋاپ قارجى مينيسترلىگىنەن بولماق.