قوستاناي قالاسىنىڭ №2 سوتىندا وبلىس ورتالىعى تۇرعىنىنا قاتىستى كورىنەۋ جالعان اقپارات تاراتقانى ءۇشىن قىلمىستىق ءىس قارالدى. ايىپتالۋشى 2023 جىلعى 8 قىركۇيەكتە ءوزىنىڭ جەكە ۇيالى تەلەفونىنا قر ۇلتتىق ۇلانىنىڭ اسكەري بولىمىنە تيەسىلى جاۋىنگەرلىك تەحنيكا اۆتوكولونناسىن ءتۇسىرىپ العان, دەپ حابارلايدى Egemen.kz.
سوتتالۋشى تۇسىرىلگەن ۆيدەونى «WhatsApp» مەسسەندجەرىندەگى توپتىق چاتقا جىبەرگەنىن جاسىرمادى, كەيىن بەلگىسىز تۇلعالار تاراپ كەتكەن بەينەماتەريالدى «YouTube» ارناسىنا جۇكتەپ, شىندىققا جاناسپايتىن اقپارات جاريالاعان. سالدارىنان «قوستانايدا سوعىس باستالايىن دەپ جاتىر» جەگەن فەيك قوعامدا رەزونانس تۋدىرىپ, حالىقتىڭ ۇرەيىن ۇشىردى.
سوتتا كۇدىكتىنىڭ ءىسى قىسقارتىلعان تارتىپپەن قارالدى. سوت جارىسسوزىندە مەملەكەتتىك ايىپتاۋشى سوتتالۋشىعا 1 جىل 6 اي مەرزىمگە باس بوستاندىعىن شەكتەۋ تۇرىندەگى جازا تاعايىنداۋدى ءوتىندى.
بۇرىن سوتتالماعان سوتتالۋشىنىڭ جەكە باسىن, ورتاشا اۋىر قىلمىس ساناتىنا جاتاتىن ارەكەتتىڭ سيپاتىن, قوعامدىق قاۋىپتىلىك دارەجەسىن جانە باسقا دا ءمان-جايدى ەسكەرە وتىرىپ, سوت پروباتسيالىق باقىلاۋدى بەلگىلەي وتىرىپ, سوتتالۋشىعا 1 جىل باس بوستاندىعىن شەكتەۋ تۇرىندەگى جازانى تاعايىندادى.