اتىراۋ وبلىسىندا جايىق وزەنىندەگى سۋ دەڭگەيى كۇن سايىن كوتەرىلىپ كەلەدى. بۇگىن ماحامبەت اۋدانىندا 7 مەتر 28 سانتيمەترگە جەتتى.
اتىراۋ وبلىسىنىڭ جەدەل شتابى «قازگيدرومەت» رمك اتىراۋ وبلىستىق فيليالىنىڭ گيدرولوگيالىق مونيتورينگ دەرەگىن جاريا ەتتى. سول دەرەككە سۇيەنسەك, وزەن دەڭگەيى باتىس قازاقستان وبلىسىنىڭ اۋماعىنان كەلەتىن سۋ ەسەبىنەن وزگەرەدى.
ماسەلەن, بۇگىن, 26 ساۋىردە ساعات 08:00-دە يندەربور كەنتىندەگى گيدروبەكەتتە جايىق وزەنىندەگى سۋ دەڭگەيى +9 سانتيمەترگە كوتەرىلىپ, 613 سم قۇراعان. يندەر اۋدانىندا سۋ تاسقىنى باستالعالى بەرى وزەن دەڭگەيى 390 سانتيمەترگە كوتەرىلگەنى انىقتالعان.
ال ماحامبەت اۋىلىنداعى بەكەتتە سۋ دەڭگەيى 728 سانتيمەترگە جەتىپ وتىر. مۇندا سۋ ءبىر تاۋلىكتە +7 سم كوتەرىلگەن. جالپى كوتەرىلۋ دەڭگەيى – 411 سانتيمەتر.
جايىق وزەنىنىڭ دەڭگەيىنىڭ كوتەرىلگەنى اتىراۋ قالاسىنداعى گيدروبەكەتتە دە بايقالادى. بۇل بەكەتتە سۋ ايدىنى +3 سانتيمەترگە كوتەرىلىپ, 428 سانتيمەتردى قۇرادى. شاھار اۋماعىندا سۋ تاسقىنى باستالعان كەزدەن بەرگى كوتەرىلۋ كورسەتكىشى 237 سانتيمەترگە جەتكەن.