ەلىمىزدە تۇراقتىلىقتى, بىرلىكتى ساقتايتىن ينستيتۋتتىڭ مىندەتىن قازاقستان حالقى اسسامبلەياسى اتقارىپ وتىر. پرەزيدەنت قاسىم-جومارت توقاەۆ اتاپ وتكەندەي, اسسامبلەيا – جاساندى ۇيىم ەمەس, ەل بىرلىگىن ناقتى جۇزەگە اسىراتىن, كونستيتۋتسيالىق مارتەبەسى ايقىن قوعامدىق ورگان.
قازىرگى كەي وڭىرلەردەگى توتەنشە جاعدايدان اسسامبلەيانىڭ ءار مۇشەسى دە شەت قالمادى. وڭىرلىك شتاب جاساقتالىپ, «جۇرەكتەن – جۇرەككە» ارنايى ناۋقانىن باستادى. 12 مىڭنان استام ەرىكتىنى جۇمىلدىرىپ, 80-نەن استام جۇك كولىگىمەن 1,5 مىڭ تونناعا جۋىق ازىق-ت ۇلىك جونەلتتى. 40-قا جۋىق تەحنيكا مەن 770 ميلليونعا جۋىق قارجىلاي جاردەم بەردى. مۇنىڭ بارلىعى – بۇگىنگى قيىن كەزەڭدە ۇلكەن كومەك.
مەملەكەت باسشىسى اسسامبلەيا بۇدان ءارى دە قايىرىمدىلىق ءىس-شارالارىنا بەلسەندى قاتىسۋ قاجەتتىگىن ايتتى. پارلامەنت جانە ءماسليحات دەپۋتاتتارىمەن قارىم-قاتىناسىن نىعايتىپ, تىعىز جۇمىس ىستەۋدى تاپسىردى. بۇگىندە اسسامبلەيا قۇرامىندا سەناتتىڭ تا, ءماجىلىستىڭ دە دەپۋتاتتارى بار. ولاردىڭ بىرقاتارى – ەلگە تانىمال قوعام قايراتكەرى. وسى دەپۋتاتتاردىڭ, سونداي-اق «اقساقالدار كەڭەسى» مەن «انالار كەڭەسىنىڭ» ءىس-ارەكەتىن ۇيلەستىرىپ, قوعامدا كوپتەگەن ءىستى جۇزەگە اسىرۋعا بولاتىندىعىن كورىپ وتىرمىز جانە سوعان سەنەمىز.
سەسسيانىڭ ماقساتى – بىرلىكتى, جاسامپازدىقتى نىعايتۋ جانە سول ارقىلى ۇلتتىق قۇرىلتايدا اتاپ وتكەن قۇندىلىقتاردى ءارى قاراي دامىتىپ, ەلىمىزدىڭ وركەندەۋىنە, ورلەۋىنە ۇلەس قوسۋ.
پرەزيدەنت اسسامبلەيانىڭ كەشەگى باسقوسۋىندا «اقساقالدار كەڭەسى» جانە «انالار كەڭەسى» سەكىلدى ءتيىمدى قۇرىلىمداردى ودان ءارى نىعايتۋدى تاپسىردى. وعان قوسا جاستار اسسامبلەياسىنا دا ەرەكشە كوڭىل ءبولىپ, ونىڭ دا جۇمىسىن ىلگەرىلەتۋدى جۇكتەدى. حالىقتى بىرلىككە, قيىندىقتى بىرلەسە ەڭسەرۋگە شاقىردى.
دامير بەلگىباەۆ,
قازاقستان قوعامدىق دامۋ ينستيتۋتى ساراپشىسى