گەرمانيانىڭ شتۋتگارت قالاسىندا وتكەن جۇلدە قورى 802 237 دوللاردى قۇراعان WTA ءتۋرنيرى قازاقستاننىڭ ەڭ ۇزدىك تەننيسشىسى ەلەنا رىباكينانىڭ ايقىن جەڭىسىمەن اياقتالدى.
باستاپقى باسەكەلەردە رەسەيلىك ۆەرونيكا كۋدەرمەتوۆا مەن يتاليالىق ياسمينە پاولينيدەن باسىم تۇسكەن جەرلەسىمىز جارتىلاي فينالدا يگا شۆەنتەكپەن شەبەرلىك بايقاستى. بۇگىنگى تاڭدا الەمنىڭ ءبىرىنشى راكەتكاسى اتانىپ وتىرعان 22 جاستاعى پولشانىڭ ماقتانىشى سوڭعى ءۇش-ءتورت جىل ارالىعىندا تولاعاي تابىستارعا قول جەتكىزدى. ول رولان گارروستى ءۇش مارتە ۇتىپ, US وpen دوداسىندا دارالاندى. اۋستراليانىڭ اشىق بىرىنشىلىگىندە ۇزدىك تورتتىكتىڭ قاتارىنا قوسىلىپ, WTA تۋرنيرلەرىندە 19 رەت تەڭدەسسىز دەپ تانىلدى. بىراق بۇل جاعدايلاردىڭ ەشبىرى رىباكيناعا اسەر ەتكەن جوق. ءۇش سەتتىك سايىس 6:3, 4:6, 6:3 ەسەبىمەن قازاقستاندىق ويىنشىنىڭ پايداسىنا شەشىلدى.
فينالدا ەلەنا الەمدىك رەيتينگتە 27-ورىنعا تۇراقتاعان مارتا كوستيۋكپەن كۇش سىناستى. بيىل اۋستراليانىڭ اشىق بىرىنشىلىگىنىڭ شيرەك فينالىنا دەيىن جەتكەن ۋكراينا تەننيسشىسى شتۋتگاردتا توپ-وندىقتىڭ قاتارىنداعى قىتايلىق چجەن تسينۆەن (7-ورىن), امەريكالىق كوري گاۋفف (3-ورىن) جانە چەحيالىق ماركەتا ۆوندروۋشوۆا (8-ورىن) سىندى مىقتى تەننيشىلەردى تىزە بۇكتىرىپ, ايدى اسپانعا ءبىر-اق شىعاردى. الايدا اقتىق سىندا كوستيۋك وتانداسىمىزعا جارىتىپ قارسىلىق كورسەتە المادى. ەسەپ – 6:2, 6:2.
ءسويتىپ, بيىل ەلەنا رىباكينا ءوزىنىڭ ءۇشىنشى تيتۋلىنا قول جەتكىزدى. بۇعان دەيىن ول بريسبەن مەن ءابۋ-دابيدە ۇيىمداستىرىلعان ءدۇبىرلى دودالاردا الدىنا جان سالمادى. جاسىل قۇرلىقتاعى جارىستىڭ شەشۋشى تۇسىندا ەلەنا بەلارۋستىك ارينا سوبولەنكوعا سان سوقتىرسا, پارسى شىعاناعىندا رەسەيلىك داريا كاساتكينانى قاپى قالدىردى. سونداي-اق جەرلەسىمىز دوحا مەن ماياميدەگى تۋرنيرلەردىڭ فينالىندا وينادى.