استاناداعى ۇلتتىق مۋزەيدە «وقۋ-تاربيە ۇردىسىندە ءبىلىم الۋشىلاردىڭ بويىندا ۇلتتىق قۇندىلىقتاردى قالىپتاستىرۋ» اتتى حالىقارالىق ەتنوفورۋم ءوتتى. ءىس-شارانى ەلوردا اكىمدىگىنىڭ «ادىستەمەلىك ورتالىعى», ى.التىنسارين اتىنداعى ۇلتتىق ءبىلىم اكادەمياسى, قازاقستاننىڭ ەتنوديزاينەرلەر وداعى ۇيىمداستىردى.
ۇلتتىق قۇندىلىقتار مەن داستۇرلەر ارقىلى ءبىلىم الۋشىنىڭ ساناسىن قالىپتاستىرۋدى ماقسات ەتكەن بۇل حالىقارالىق ەتنوفورۋم رەسپۋبليكا كولەمىندە العاش رەت ۇيىمداستىرىلىپ وتىر. تاعىلىمدى ءىس-شاراعا ازەربايجان, قىرعىزستان, وزبەكستان, تۇركيا, ياكۋتيا جوعارى وقۋ ورىندارىنىڭ وقىتۋشىلارى, كوركەم ەڭبەك, گرافيكا جانە جوبالاۋ پاندەرىنىڭ مۇعالىمدەرى, قوسىمشا ءبىلىم بەرۋ پەداگوگتەرى قاتىستى. فورۋم بارىسىندا قازاقستان ەتنوديزاينەرلەر وداعىنىڭ توراعاسى سالتانات جاپاروۆا ءبىلىم بەرۋدە قۇندىلىقتاردى دارىپتەپ, ادەت-عۇرىپتاردى جاڭعىرتۋ كەرەك ەكەنىن ايتا كەلىپ, كوركەم ەڭبەك پانىندە ۇل مەن قىزدى بولەك وقىتۋ ماسەلەسىنە ەرەكشە توقتالدى.
«ەڭبەك ءپانىن ۇلدار بولەك, قىزدار بولەك وقۋى كەرەك. ءبىز بالالارعا ونەر ۇيرەتۋدى مەكتەپتەن باستاپ «ۇل شەبەرلىگى» جانە «قىز شەبەرلىگى» دەپ ءبولۋدى ۇسىندىق. ول ۇسىنىستى بىرنەشە مەكتەپ قابىلداپ, وزدەرىندە تاجىريبەلىك سىناق رەتىندە باستاۋعا كەلىسىمىن بەردى. قازىر وسىعان ساي وقۋ اعارتۋ مينيسترلىگى ماماندارىمەن جۇمىستار اتقارىلىپ جاتىر. بۇل باستامانىڭ بولاشاق ۇرپاق تاربيەسىندە ماڭىزى زور. «قىزدارىمىزدى قىزعا ءتان, ۇلدارىمىزدى ۇلعا ءتان» مىنەزبەن تاربيەلەۋ – اتا-بابادان كەلە جاتقان اسىل مۇرا, قىمبات ءداستۇر. ءبىز وسى ساباقتاستىقتى ءۇزىپ الماۋىمىز كەرەك. سونىمەن قاتار جاز ايلارىندا بالالار شىعارماشىلىعىن دامىتۋ ماقساتىندا «بالالارعا ونەر ۇيرەتۋ», «شەبەرلەردىڭ شىعارماشىلىعىن دامىتۋ» لاگەرلەرىن اشساق دەگەن يگى ويلارىمىز دا بار», دەدى س.جاپاروۆا.
ءىس-شارا اياسىندا استانا قالاسىنىڭ ادىستەمەلىك ورتالىعىنىڭ قولداۋىمەن كوركەم ەڭبەك ءپانى مۇعالىمدەر قاۋىمداستىعى «كوركەم ەڭبەك جانە سىزۋ ساباقتارىنىڭ ماسەلەلەرى مەن شەشىمدەرى» دەگەن دوڭگەلەك ۇستەل وتكىزدى. سىزۋ ءپانى – ماتەماتيكا, گەومەتريا, فيزيكا, حيميا, استرونوميادا, ينجەنەرلىك سالادا اسا كەرەك ءبىلىم سالاسى. سوندىقتان جينالعاندار سىزۋ ءپانىن مەكتەپ باعدارلاماسىنا قايتا ەنگىزبەسە, كەلەشەكتە ەلىمىزدەن ارحيتەكتور شىقپايتىنىن اشىق ايتتى.
سونىمەن قاتار فورۋمدا وقۋشىلار دا «اتا-بابا ونەرى – ۇرپاقتار مۇراسى» اتتى سايىسقا قاتىستى. ياعني قىزدار ءجۇن ءتۇتىپ جانە ۇرشىق ءيىرىپ جارىسسا, ال ەر بالالار سەگىز تاسپالى قامشى ءورىپ باق سىناستى. ولاردىڭ ونەرىن «اتالار جانە اجەلەر القاسى» باعالادى. سونداي-اق ء«سان – سارقىلماس سالتانات» اتتى ۇلتتىق كيىمدەر مەن ۇلتتىق قولونەر سايىستارى دا ەتنوفورۋمنىڭ كورىگىن قىزدىردى. اسىق اتۋدان استانا قالاسى كومانداسىنىڭ اعا جاتتىقتىرۋشىسى ەسكەندىر راحمەتوۆتىڭ ايتۋىنشا, بالالار ۇلتتىق ويىنداردى بالاباقشادان باستاپ مەڭگەرۋى كەرەك. «قازىر اسىق اتۋ ۇلتتىق سپورتىنان مەكتەپ پەن كوللەدجدەردە ساباق بەرەتىن ماماندار دايارلاپ جاتىرمىز. ءتىپتى اسىق اتۋدى بالاباقشا باعدارلاماسىنا دا ەنگىزۋ جوسپاردا بار. قازاقتىڭ بۇل ۇلتتىق وينىن بالا ءۇش جاستان باستاپ-اق ۇيرەنىپ ويناي بەرەدى. بالانىڭ ءبىتىمىن شىمىر ەتىپ, ويلاۋ قابىلەتىن شىڭداپ, قىراعىلىققا, ەپتىلىككە باۋليدى. ەندى ۇلتتىق بولمىسىمىزدى بالا جاستان قالىپتاستىراتىن ۋاقىت كەلدى», دەيدى ە.راحمەتوۆ.
قىرعىز ەلىنەن كەلگەن تەحنولوگيا ءپانىنىڭ مۇعالىمى ماقسات ءساينيدينوۆتىڭ ايتۋىنشا, قازاق-قىرعىز باۋىرلاس مەملەكەت بولعاندىقتان, مادەنيەتىمىزدە ۇقساستىقتار وتە كوپ. سول سەبەپتى ۇلتتىق قولونەردەن تاجىريبە الماسۋدا ءدال وسى ەتنوفورۋمنىڭ ماڭىزى زور.
«بۇل ءىس-شاراعا قازاقستان ەتنوديزاينەرلەر وداعىنىڭ شاقىرتۋىمەن كەلدىم. فورۋم اياسىندا قازاقستاندىق جانە باسقا دا شەتەلدىك ارىپتەستەرمەن شەبەرلىك ساباعىن وتكىزىپ, كيىزدەن جاسالاتىن پورترەتتەردىڭ قىر-سىرىن ۇيرەتتىم. ارىپتەستەرگە وتپەن سۋرەت سالۋدىڭ دا ءادىس-ءتاسىلىن كورسەتتىم. بىراق بۇل قولونەردى مەن ويلاپ تاپقان جوقپىن. ونى قىرعىزستانعا كەلىپ شەبەرلىك ساباعىن وتكىزگەن امەريكالىق ارىپتەسىمنەن مەڭگەردىم. قازىر مەكتەپتە شاكىرتتەرىمە وسى ونەردى ۇيرەتىپ ءجۇرمىن», دەدى ول.
ءيا, زاماناۋي تەحنولوگيا ومىرىمىزگە دەندەپ ەنىپ جاتقان ۋاقىتتا جاس بۋىننىڭ بويىنا ۇلتتىق قۇندىلىقتاردى ءسىڭىرىپ ءوسىرۋدىڭ ماڭىزى زور. ۇلتتىق رۋحتان قايناپ شىققان تازا بۇلاقتىڭ قاشاندا بەرەرى مول, بەدەلى بيىك بولارىن بولجاعان ەتنوفورۋم ءوز ماقساتىنا جەتتى دەپ ويلايمىز.