وبلىستىق پد ەسىرتكىگە قارسى كۇرەس باسقارماسىنىڭ قىزمەتكەرلەرى سينتەتيكالىق ەسىرتكى تاراتقان بىرنەشە كۇدىكتىنى تۇتقىندادى. ۇستالعانداردىڭ ءبىرى ينتەرنەت-دۇكەندەردىڭ بىرىندە ەسىرتكىنى ساتۋ ءۇشىن قالتاشالارعا بۋىپ-ءتۇيىپ جۇرگەن 39 جاستاعى ايەل بولىپ شىقتى.
تەكسەرۋ كەزىندە كۇدىكتى كەلىنشەكتىڭ قالتاسىنان, جالعا العان پاتەرىنىڭ قۋىس-قۋىسىنان, جاتىن بولمەسىنەن, ءتىپتى دارەتحاناسىنان تۇيىلگەن سينتەتيكالىق ەسىرتكىلەر تابىلعان. ۇنتاق تۇرىندە قالتاشالارعا سالىنعان الگى زاتتار ساتىپ الۋشىلار ءۇشىن ارناۋلى جەرلەرگە جاسىرىلاتىن «تىعىندىلار».
تاركىلەنگەن ەسىرتكىلەردىڭ جالپى سالماعى – 227,97 گرامم. بۇل – «α-PvP» دەپ اتالاتىن سينتەتيكالىق ەسىرتكى. ەسىرتكى ساۋداگەرلەرىنىڭ وزدەرى ونى «تۇز» دەپ اتايدى. سونىمەن بىرگە تابىلعان سارعىش ءتۇستىسى «مەفەدرون» دەپ اتالادى. ونىڭ سالماعى 57,57 گرامم بولعان. ەسىرتكىگە قاتىستى ايتىلعاندا بۇلار وتە ۇلكەن كولەم بولىپ ەسەپتەلەدى.
كۇدىكتىنىڭ ۇيىنەن ەسىرتكىنى قالتاشالارعا سالۋ ءۇشىن ولشەيتىن ارناۋلى ەلەكتروندى تارازى, تۇيىنشەكتەيتىن ماتەريالدار دا تابىلدى. «كۇدىكتى ايەلدىڭ ءوزى ەسىرتكىگە تاۋەلدى. ول بۇرىن دا ەسىرتكى ساقتاعانى ءۇشىن سوتتالىپ, باس ەركىنەن ايىرىلعان. الايدا تۇرمەدەن شىققاننان بەرى ءۇش اي بويى قايتادان ەسىرتكى قولدانۋ مەن تاراتۋ جولىنا تۇسكەن. ەندى ول قىلمىستىق كودەكستىڭ 297-بابىنىڭ 3-تارماعىمەن ەسىرتكىنى ۇلكەن كولەمدە تاراتقانى ءۇشىن كەمىندە 10 جىلعا باس ەركىنەن ايىرىلادى», دەيدى ەقكب باسشىسى, پودپولكوۆنيك رۋسلان ساپاروۆ.
قالتاشالارعا سالىنىپ, تۇيىنشەكتەلگەن ەسىرتكىنى قالانىڭ ءتۇرلى قۋىسىنا كۇدىك كەلتىرمەيتىن ايەلدەر مەن ءجاسوسپىرىم بالالار تاراتادى. ولار ساتىپ الۋشىنىڭ اقشاسىن العاننان كەيىن شارتتى سوزدەرمەن كەلىسىپ, «تىعىندى» جاسىرىلاتىن جەردى تەلەفونمەن ايتادى.
پەتروپاۆل قالاسىنىڭ «جۇمىسشى» كەنتىندە «Toyota RAV4» كولىگىمەن ءجۇرىپ, ەسىرتكى سالىنعان تۇيىنشەكتەردى ارناۋلى جەرلەرگە جاسىرىپ جۇرگەن 33 جانە 36 جاستاعى ەكى ايەل دە ۇستالدى.
33 جاستاعى ايەلدىڭ كۇيەۋى مۇنداي زاڭسىز, وڭاي جولمەن اقشا تاباتىن «شارۋامەن» اينالىسقانى ءۇشىن 2022 جىلى سوتتالىپ, قازىر جازاسىن وتەپ جاتىر ەكەن. ايەلى سونىڭ قىلمىسىن جالعاستىرىپ جۇرگەن بولىپ شىقتى. كولىكتىڭ ىشىندە وتىرعان 36 جاستاعى ەكىنشى ايەل دە ەسىرتكىگە تاۋەلدى جانداردىڭ ءبىرى ەكەن. ولاردىڭ ۇيلەرىن ءتىنتۋ بارىسىندا ۇلكەن كولەمدەگى, ياعني 700 گراممداي اق ۇنتاق تابىلدى. بۇل دا «تۇز» دەگەن اتاۋمەن بەلگىلى «α-PvP» سينتەتيكالىق ەسىرتكىسى. ەكى ايەلدىڭ دە وسىنداي قىلمىسپەن اينالىسىپ جۇرگەندەرىنە ءتورت ايداي بولعانى دا انىقتالىپ وتىر.
17 جاسار ءجاسوسپىرىم دە ەسىرتكى تۇيىنشەكتەرىن تاراتۋمەن اقشا تاۋىپ جۇرگەن. ونى ۇستاعان كەزدە تۇيىنشەكتەر تۇراتىن ۇيىنەن تابىلماي, اجەسىنىڭ ۇيىنە جاسىرىنعانى بەلگىلى بولدى. ۇيىنەن 10 تۇيىنشەككە ءبولىنىپ, ساتۋعا دايىندالعان سينتەتيكالىق ەسىرتكى شىعا كەلگەندە قاريا شوشىپ, تالىپ قالا جازداعان. اجەنىڭ ۇيىندەگى ەسىرتكىنىڭ جالپى كولەمى 191 گرامم بولعان
ءجاسوسپىرىمنىڭ دە تاراتىپ جۇرگەنى – «تۇز» دەپ اتالاتىن جاساندى ەسىرتكى. كەيىنگى كەزدە قالادا سينتەتيكالىق ەسىرتكىنى تاراتۋ دەرەكتەرى كوبەيىپ كەتكەنى بايقالادى. ۇستالعان كەزدە 18 جاسقا تولماعانىمەن بۇل ءجاسوسپىرىم دە سوتتالادى. «ۇستالعانعا دەيىن ول قاشىقتان ەسىرتكى تاراتۋمەن اينالىساتىن ينتەرنەت-دۇكەندەردىڭ بىرىندە 3 ايعا جۋىق جۇمىس ىستەپ ۇلگەرگەن. تاجىريبە كورسەتكەندەي, ەسىرتكى تاراتۋشىلاردىڭ بارلىعى وسىنشا مەرزىمگە عانا سايرانداي الادى, ودان ءارى ءبارىبىر قاماۋعا الىنىپ, سوتتالادى», دەيدى رۋسلان ساپاروۆ.
بىلتىر دا وبلىستا ەسىرتكى تاراتقانى ءۇشىن كامەلەتتىك جاسقا تولماعان 2 جاسوسپىرىمگە سوت ۇكىمى شىققان بولاتىن.
سولتۇستىك قازاقستان وبلىسى