ەل بويىنشا سۋ تاسقىنىمەن كۇرەسكە بەلسەندى قاتىسىپ جاتقان ەرىكتىلەر سانى 43 مىڭنان استى. ولاردىڭ كۇشىمەن 6 640 تونناعا جۋىق گۋمانيتارلىق كومەك جينالدى, ونىڭ 4 048 تونناسى «قىزىل» ايماقتارعا جەتكىزىلدى جانە زارداپ شەككەن حالىققا تاراتىلدى. ەرىكتىلەر حالىقتى ەۆاكۋاتسيالاۋعا, گۋمانيتارلىق كومەك جيناۋعا جانە تاراتۋعا, بوگەتتەردى كۇشەيتۋگە, سونداي-اق ىستىق تاماقپەن قامتاماسىز ەتۋگە قاتىسىپ, سۋ تاسقىنىنان زارداپ شەككەن ازاماتتارعا كومەك كورسەتىپ ءجۇر, دەپ حابارلايدى Egemen.kz مادەنيەت جانە اقپارات مينيسترلىگىنىڭ ءباسپاسوز قىزمەتىنە سىلتەمە جاساپ.
اقتوبە وبلىسىندا ۆولونتەرلەردىڭ بىرلىگى مەن كۇشىنىڭ ارقاسىندا 308 توننا ازىق-ت ۇلىك, 85 توننا ازىق-ت ۇلىك ەمەس قاجەتتى تاۋارلار جانە 223 كيلوگرامم ءدارى-دارمەك ەۆاكۋاتسيالىق پۋنكتتەرگە ءبولىندى. 10 مىڭعا جۋىق قۇتقارۋشى مەن ەۆاكۋاتسيالانعان تۇرعىندار ءۇشىن ىستىق تاماق ۇيىمداستىرىلدى.
اتىراۋ وبلىسىندا ەرىكتىلەر شتابى شۇعىل رەجيمدە جۇمىس ىستەپ تۇر. سۋ تاسقىنىنا قارسى ءىس-شارالارعا 13 مىڭنان استام ۆولونتەر جۇمىلدىرىلدى. گۋمانيتارلىق كومەك قابىلداۋ پۋنكتىندە وسى كۇنى 1 390 توننادان استام تاۋار جينالدى. اتىراۋ قالاسىندا بوگەتتى كۇشەيتۋ ءۇشىن 107 پۋنكت ورناتىلعان. بوگەت تۇرعىزۋ جۇمىستارى تاۋلىك بويى جۇرگىزىلىپ جاتىر. باتىس قازاقستان وبلىسىنداعى قۇتقارۋ جۇمىستارىنا 8 000 ۆولونتەر قاتىستى. كومەك جيناۋ پۋنكتتەرىندە 415 توننا گۋمانيتارلىق كومەك جينالدى. قوستاناي وبلىسىندا 3 500-دەن استام ەرىكتى تۇرعىنداردى ەۆاكۋاتسيالاۋ جۇمىستارىنا قاتىستى. شىمكەنتكە 1 500-گە جۋىق ۆولونتەر جۇمىلدىرىلىپ, ولاردىڭ ءبىر بولىگى زارداپ شەككەن وڭىرلەرگە جول تارتتى.