19 ءساۋىر كۇنى پرەزيدەنت قاسىم-جومارت توقاەۆ «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنساۋلىق ساقتاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويدى. وسى زاڭ ارقىلى كوپتەن قوعامدا كەڭىنەن تالقىلانىپ كەلگەن بىرقاتار ماسەلە شەشىمىن تاپپاق. زاڭداعى وزگەرىستەرگە قاتىستى سەناتور بيبىگۇل جەكسەنباي ويىن ورتاعا سالىپ, الەۋمەتتىك جەلىدە جازبا جاريالادى, دەپ جازادى Egemen.kz.
بيبىگۇل جەكسەنباي زاڭدا شەگۋگە كەلمەيتىن تەمەكى ونىمدەرىن, ۆەيپتەردى, حوش يىستەندىرگىشتەردى جانە ولارعا ارنالعان سۇيىقتىقتاردى ساتۋعا, تاراتۋعا, سونداي-اق ولاردى جارنامالاۋعا تىيىم سالۋ قاراستىرىلعان (بۇل نورما رەسمي جاريالانعاننان كەيىن 60 كۇن وتكەن سوڭ قولدانىسقا ەنگىزىلەدى). سونىمەن بىرگە, جاستار اراسىندا قۇرامىندا نيكوتينى بار زاتتاردىڭ تارالۋىنىڭ الدىن الۋ جانە وعان قارسى كۇرەسۋ ءۇشىن جۇيەلى شارالار قابىلداۋعا زاڭ مۇمكىندىكتەر بەرەدى. بۇل زاڭ ارقىلى وسكەلەڭ ۇرپاقتىڭ دەنساۋلىعىن ساقتاۋ باعىتىندا مەملەكەتتىك كەشەندى قادام جاسالىپ وتىرعانىن ايتتى.
«وزدەرىڭىز بىلەتىندەي, كەشەگى پاندەميا كەزىندە اق حالاتتى ابزال جاندار ءوز ومىرلەرىن قاتەرگە تىگە ءار ناۋقاستىڭ جانى ءۇشىن كۇرەسكە شىقتى. مەديتسينا ماماندارىنىڭ قوعامداعى ماڭىزدىلىعى كۇن سايىن ارتىپ كەلەدى. الايدا, سايلاۋشىلارمەن كەزدەسۋ بارىسىندا ءدال وسى مەديتسينا ماماندارىنىڭ تاراپىنان قۇقىقتىق-قارجىلىق ماسەلەلەر ءجيى كوتەرىلەدى. ونىڭ ءبىرسىپىراسىن ءوزىم دە دەپۋتاتتىق ساۋال تۇرىندە ۇكىمەتكە جولداعان دا ەدىم.
مەملەكەت باسشىسى قول قويعان زاڭ مەديتسينا قىزمەتكەرلەرىن قۇقىقتىق جانە قارجىلىق تۇرعىدان قورعاۋ جۇيەسىن ەنگىزۋگە جانە ولاردىڭ جاۋاپكەرشىلىگىن ارتتىرادى.
زاڭ ارقىلى مەديتسينا قىزمەتكەرلەرىنىڭ كاسىبي جاۋاپكەرشىلىگىن ساقتاندىرۋ تەتىگى ەنگىزىلدى (زاڭ رەسمي جاريالانعاننان كەيىن 6 اي وتكەن سوڭ قولدانىسقا ەنەدى).
سونىمەن قاتار مەديتسينا قىزمەتكەرلەرىن قولداۋعا باعىتتالعان تۇزەتۋلەر قابىلداندى.
اتاپ ايتقاندا:
تۇرعىلىقتى جەرى بويىنشا مەكتەپكە دەيىنگى ۇيىمداردان بالالارى ءۇشىن باسىم تارتىپپەن ورىن الۋ, كاسىبي قىزمەتىنە زاڭسىز ارالاسۋدان جانە كەدەرگى كەلتىرۋدەن قورعاۋ, ماماندىعىنا قۇرمەتپەن قاراۋ, مەديتسينالىق ماماندىعى بويىنشا اسكەري قىزمەتىن وتكەرۋ نەمەسە اسكەري قىزمەتكە شاقىرۋدى كەيىنگە قالدىرۋ قۇقىقتارى بەرىلدى;
«قازاقستاننىڭ ەڭبەك سىڭىرگەن دارىگەرى» قۇرمەتتى اتاعى – مەملەكەتتىك ناگراداسى بەلگىلەندى.
جاسىراتىنى جوق, دارىگەرلەر ناۋقاس جاننىڭ جاعدايىنان بۇرىن كومپيۋتەرگە تەلمىرىپ نەمەسە قاعازعا شۇقشيىپ تولاسسىز ەسەپ جازۋدان باس كوتەرمەيتىن بولعان ەدى. داوىگەرلەردى جاڭا زاڭ قاعازباستىلىقتان ءبىرسىپىرا ارىلتاتىن بولدى.
باسى ارتىق ەسەپ نەمەسە اقپارات بەرۋدەن بوساتۋ ءۇشىن دەنساۋلىق ساقتاۋ سالاسىنداعى ۋاكىلەتتى ورگان بۇدان بىلاي مەديتسينا قىزمەتكەرلەرى تولتىرۋعا مىندەتتى قۇجاتتاما تىزبەسىن بەكىتەدى.
اۋىل-اۋدانداردا حالىقتى تۇراقتاندىرۋداعى نەگىزگى فاكتوردىڭ ءبىرى - ساپالى معديتسينالىق قىزمەت. الايدا, جەرگىلىكتى جەرلەردە جەكەلەگەن مەديتسينالىق مامانداردىڭ تاپشىلىعىنان دەر كەزىندە دۇرىس دياگنوز قويىلماي نەمەسە ۇلكەن قالالارعا ازاماتتاردىڭ سابىلاتىنى بەلگىلى. ال, ونداي ماماندىق يەلەرىن وڭىرلەرگە تارتۋعا مەملەكەتتىك قولداۋ جەتكىلىكسىز بولاتىن.
سوندىقتان ارنايى زاڭ شەڭبەرىندە, اسا تاپشى ماماندىقتى مەڭگەرگەن مەديتسينا قىزمەتكەرلەرى اۋىلدىق جەرگە كەمىندە 5 جىل جۇمىس ىستەۋگە كەلگەن جاعدايدا, وعان ەڭ تومەنگى جالاقىنىڭ 100 ەسەلەنگەن مولشەرىندە بىررەتتىك اقشالاي تولەم بەرىلەدى», دەپ جازدى سەناتور.