پرەمەر-ءمينيستردىڭ ورىنباسارى تامارا دۇيسەنوۆانىڭ توراعالىعىمەن وڭىرلەردەگى تەحنيكالىق جانە كاسىپتىك ءبىلىم بەرۋ ۇيىمدارىن بەيىندەۋ بويىنشا كەڭەستەر ءوتتى.
قازىردە ەلىمىزدىڭ ءار وڭىرىندە دامۋ باعدارلاماسى, سونداي-اق ينفراقۇرىلىمدىق, ينۆەستيتسيالىق جوبالار جۇزەگە اسىرىلىپ جاتىر. ناتيجەسىندە, جۇمىسشى جانە ورتا بۋىن ماماندارىن دايارلاۋ قاجەتتىگى تۋىنداپ وتىر. بۇل رەتتە كوللەدجدەردىڭ ءرولى ارتىپ كەلەدى.
«تەحنيكالىق جانە كاسىپتىك ءبىلىم بەرۋ مەكەمەلەرى ەڭ الدىمەن جەرگىلىكتى ەڭبەك نارىعىنا قاجەت مامانداردى دايارلاۋى قاجەت. ول ءۇشىن ەڭ باستىسى كوللەدجدەردىڭ وقىتۋشىلىق قۇرامىنا, ماتەريالدىق-تەحنيكالىق جابدىقتالۋىنا جانە ساپالى ءبىلىم باعدارلامالارىنا نازار اۋدارىلۋعا ءتيىس. «جاس مامان» جوباسى اياسىندا بىرقاتار كوللەدجدىڭ بازاسى جابدىقتالدى. ءار ايماقتا وزىق تاجىريبە جيناقتاعان وقۋ ورىندارى بار. ولار تىرەك كوللەدجى جانە قۇزىرەتتىلىك ورتالىق ەسەبىندە وزگە ءبىلىم بەرۋ مەكەمەلەرىنە كومەك بەرۋى شارت», دەدى ت. دۇيسەنوۆا.
كەڭەستەر اياسىندا ءار ايماقتىڭ وڭ تاجىريبەلەرى قاراستىرىلىپ وتىر.
ماسەلەن, شىمكەنتتە 2 كوللەدج بازاسىندا قاناتقاقتى جوبا اياسىندا ەكسپەريمەنتتىك توپتار ۇيىمداستىرىلعان. مۇندا مەكتەپتىڭ جوعارى سىنىپ وقۋشىلارى ساباقتان بوس ۋاقىتتا ءتۇرلى ماماندىق مەڭگەرەدى. اتاپ ايتقاندا, 30 بالا تىگىنشىلىك ءىسىن ۇيرەنىپ جاتىر. وسىعان ۇقساس تاجىريبەلەر بارلىق وڭىردە بار.
تاعى ءبىر مىسال – جامبىل وبلىسىنداعى قورداي اۋدانىندا شەتەلدىك ماماندار قولداۋىمەن كوللەدج ىشىنەن تىگىن تسەحى اشىلدى. قازىر ول وڭىردەگى سۇرانىستى قامتۋ ءۇشىن ءىرى تاپسىرىستار الىپ, قىزمەت كورسەتىپ جاتىر. مۇندا كوللەدج ستۋدەنتتەرى كاسىپتىك پراكتيكادان ءوتىپ, تاجىريبە جيناقتاپ, ءارى قاراي جۇمىسقا ورنالاسا الادى.
حالىقارالىق ارىپتەستىك اياسىندا الماتى قالاسىندا دا وڭ تاجىريبە بار. بيىل 20 كوللەدجدىڭ 200 ارنايى پاندەر وقىتۋشىلارى مەن وندىرىستىك وقىتۋ شەبەرلەرى شەت مەملەكەتتەردە تاعىلىمدامادان ءوتتى. بۇل باعىتتاعى جۇمىس الداعى ۋاقىتتا دا جالعاسىن تابادى. سونداي-اق الماتىلىق كوللەدجدەرگە كاسىپورىنداردان تاجىريبەلى مامانداردى تارتا وتىرىپ, كادر دايارلاۋ ءىسى جولعا قويىلعان.
«تەحنيكالىق جانە كاسىپتىك ءبىلىم بەرۋ ۇيىمدارىنىڭ وڭ تاجىريبەلەرى كەڭىنەن تاراتىلۋى كەرەك. بۇل جۇمىس وقۋ-اعارتۋ مينيسترلىگىنىڭ تۇراقتى نازارىندا بولۋعا ءتيىس. باستى ماقسات – تۇلەك دايىنداۋ عانا ەمەس, جاستارعا تۇراقتى جۇمىسقا ورنالاسا الاتىنداي جاعداي جاساۋ. كوللەدجدەردىڭ تەك مەملەكەتتىك تاپسىرىسقا يەك ارتۋى دۇرىس ەمەس. جۇمىس بەرۋشىلەر دە وزدەرىنە قاجەت مامانداردى دايارلاۋعا ات سالىسۋى كەرەك. وعان قوسا, كوللەدجدەردە قازىر وندىرىلگەن ونىمنەن تۇسەتىن تابىس سول مەكەمەدە قالاتىنداي مۇمكىندىك بەرىلگەن. مۇنى ماتەريالدىق-تەحنيكالىق بازانى جاقسارتۋعا جانە پەداگوگتەردىڭ بىلىكتىلىگىن ارتتىرۋ ءۇشىن قوسىمشا تابىس كوزى رەتىندە قاراستىرۋعا بولادى», دەدى پرەمەر-ءمينيستردىڭ ورىنباسارى.