مەملەكەتتىك كەڭەسشى, پرەزيدەنت جانىنداعى جاستار ساياساتى جونىندەگى كەڭەستىڭ توراعاسى ەرلان قارين قىرعىز رەسپۋبليكاسىنىڭ پرەزيدەنتى سادىر جاپاروۆتىڭ ەلىمىزگە رەسمي ساپارى اياسىندا ءوتىپ جاتقان قازاق-قىرعىز جاستار فورۋمىنا قاتىسۋشىلارمەن كەزدەستى.
جيىندا مەملەكەتتىك كەڭەسشى پرەزيدەنت قاسىم-جومارت توقاەۆتىڭ قازاقستان جاستارىنىڭ قۇقىقتارى مەن مۇمكىندىكتەرىن كەڭەيتۋگە ايرىقشا ءمان بەرەتىنىن اتاپ ءوتتى. پرەزيدەنتتىك جاستار كادر رەزەرۆى, جاستار كاسىپكەرلىگىن دامىتۋ, سونداي-اق كرەاتيۆتى يندۋستريانى قۇرۋ ءۇشىن دارىندى جاستارعا قولداۋ كورسەتۋ سياقتى جاس ۇرپاقتىڭ مۇددەسىن جانە قاجەتتىلىگىن ەسكەرەتىن جوبالار مەن باعدارلامالار – سونىڭ ايقىن دالەلى.
پرەزيدەنت جانىنداعى جاستار ساياساتى جونىندەگى كەڭەس جاستار ساياساتىن قالىپتاستىرۋمەن جانە ونى جۇزەگە اسىرۋمەن اينالىساتىن نەگىزگى قۇرىلىم سانالادى. جاستار ونىڭ جۇمىسىنا بەلسەندى ارالاسىپ, ءتۇرلى يدەيالار مەن جوبالار ۇسىنادى, وسىلايشا ەلىمىزدىڭ دامۋىنا ۇلەس قوسادى.
مىسالى, كەڭەس مۇشەلەرى مەملەكەتتىك جاستار ساياساتىنىڭ 2029 جىلعا دەيىنگى تۇجىرىمداماسىن ازىرلەۋگە تىكەلەي اتسالىستى. سونداي-اق جاستار ساياساتى جونىندەگى كەڭەس مۇشەلەرىنىڭ باستاماسىمەن ناشاقورلىققا جانە ەسىرتكى بيزنەسىنە قارسى كۇرەستىڭ 2023-2025 جىلدارعا ارنالعان كەشەندى جوسپارى قابىلداندى. قازىرگى ۋاقىتتا كەڭەس زاڭسىز ويىن بيزنەسىنە جانە لۋدومانياعا قارسى كۇرەس جونىندە كەشەندى جوسپار ازىرلەپ جاتىر.
كەزدەسۋ سوڭىندا ەرلان قارين قىرعىز جاستارىن قىزىقتىرعان سۇراقتارعا جاۋاپ بەردى.