پارلامەنت سەناتىنىڭ توراعاسى ماۋلەن اشىمباەۆ قىرعىزستان جوعارعى كەڭەسىنىڭ بۇرىنعى توراعاسى, قىرعىز رەسپۋبليكاسىنىڭ باتىرى, تۇركى مەملەكەتتەرى ۇيىمى اقساقالدار كەڭەسىنىڭ مۇشەسى مەدەتقان شەريمكۋلوۆپەن كەزدەستى. كەزدەسۋ بارىسىندا تاراپتار ءوزارا مادەني-گۋمانيتارلىق ىنتىماقتاستىقتى ودان ءارى نىعايتۋدا ەكى ەلدىڭ زيالى قاۋىمىنىڭ ءرولىن جانە حالىقارالىق الاڭدارداعى بىرلەسكەن ءىس-قيمىل اياسىنداعى ماسەلەلەردى تالقىلادى.
ماۋلەن اشىمباەۆ قازاق-قىرعىز قارىم-قاتىناسى بارلىق سالادا قارقىندى دامىپ كەلە جاتقانىن ايتتى. باۋىرلاس ەلدەردىڭ ەكىجاقتى بايلانىسىنا جوعارى دەڭگەيدەگى بەلسەندى ديالوگتىڭ ىقپالى زور. بۇل رەتتە وسى كۇندەرى ءوتىپ جاتقان قىرعىزستان پرەزيدەنتىنىڭ قازاقستانعا رەسمي ساپارى ەرەكشە مانگە يە.
سۇحبات بارىسىندا قازاقستان رەسپۋبليكاسى مەن قىرعىز رەسپۋبليكاسىنىڭ جوعارى مەملەكەتارالىق كەڭەسىنىڭ VI وتىرىسىندا قول جەتكىزىلگەن ۋاعدالاستىقتارعا باسا ءمان بەرىلدى. اتاپ ايتقاندا, ەكى ەل اراسىنداعى وداقتاستىق قاتىناستاردى تەرەڭدەتۋ جانە كەڭەيتۋ تۋرالى شارتتىڭ ماڭىزى ءسوز بولدى. سونىمەن قاتار تاراپتار پارلامەنتارالىق ديالوگتى نىعايتۋ جانە ساياسي-ەكونوميكالىق, مادەني-گۋمانيتارلىق قارىم-قاتىناستاردى كەڭەيتۋ ماسەلەلەرىنە دە نازار اۋداردى.
سەنات توراعاسى عىلىم, ادەبيەت, مادەنيەت, ونەر, تاريح, رۋحانيات سالالارىنداعى ىنتىماقتاستىقتى دامىتۋدا جانە تۇركى الەمىنىڭ بىرلىگىن نىعايتۋدا زيالى قاۋىمنىڭ الەۋەتىن پايدالانۋدىڭ ماڭىزى زور ەكەنىن اتاپ ءوتتى.
ءوز كەزەگىندە مەدەتقان شەريمكۋلوۆ پرەزيدەنت قاسىم-جومارت توقاەۆتىڭ باستاماسىمەن قازاقستاندا جۇرگىزىلىپ جاتقان الەۋمەتتىك-ەكونوميكالىق جانە ساياسي رەفورمالار اياسىنداعى جۇمىستى جوعارى باعالادى. سونداي-اق ول ورتاق مادەني جانە ادامگەرشىلىك قۇندىلىقتاردى دارىپتەۋ ىسىندە اقساقالدار كەڭەسى اياسىنداعى بەلسەندى ءوزارا ءىس-قيمىل ءۇشىن العىسىن ءبىلدىردى.