ەلوردا تورىندە ءوتىپ جاتقان ەۋرازيالىق حالىقارالىق كىتاپ كورمە-جارمەڭكەسىنە ەلىمىزدىڭ ءوڭىر-وڭىرىنەن دە قاتىسىپ جاتقاندار بار. سونىڭ ءبىرى – سەمەي قالاسىنداعى اباي اتىنداعى كىتاپحانا قىزمەتكەرلەرى «اباي جولى» كىتاپحاناسى ادەبي ەكسپوزيتسياسىن, ونىڭ سيرەك قورلارىن ۇسىنىپ وتىر.
تاريحي كىتاپحانا قورىنداعى كونە جادىگەر – كىتاپ ەسكەرتكىشتەرىمەن جانە «اباي جولى» كىتاپحاناسى جوباسى اياسىندا جارىق كورگەن جاۋھار تۋىندىلارمەن كوپشىلىك قاۋىمدى كەڭىنەن تانىستىرۋدى ماقسات ەتەدى. كورمە قوناقتارىن اباي, شاكارىم, مۇحتاردىڭ كوزى تىرىسىندە ولار تۋرالى جازىلعان سيرەك دەرەككوزدەر ەرەكشە اسەرگە بولەگەن.
ادەبي ەكسپوزيتسيانىڭ «اباي, شاكارىم – سيرەك باسىلىمداردا» بولىمىندە اباي مەن شاكارىمنىڭ قايراتكەرلىك تۇلعاسىن اشاتىن, سيرەك كەزدەسەتىن ولكەتانۋ باسىلىمدارى ۇسىنىلعان. سونىمەن قاتار جاس م.اۋەزوۆتىڭ تۇلعالىق قاسيەتىن تانىتاتىن تۇپنۇسقالار دا كورمەدەن ورىن الدى.
ال «سيرەك باسىلىمدارداعى اۋەزوۆ شىعارمالارى» ءبولىمى ابايدىڭ كوركەم ادەبيەتتەگى بەينەسىن سومدايتىن «اباي جولى» ەپوپەياسىنىڭ مەرزىمدى باسىلىمدار بەتتەرىندە جاريالانعان العاشقى ۇزىندىلەرىمەن, ەپوپەيانىڭ 1945, 1948, 1949, 1950 جىلدارداعى تولىق نۇسقاسىمەن تانىستىردى.
ادەبي ەكسپوزيتسيانىڭ ءۇشىنشى بولىمىندە وبلىس اكىمى ن.ۇرانحاەۆتىڭ قولداۋىمەن 2023 جىلى جۇزەگە اسىرىلعان «اباي جولى» كىتاپحاناسى جوباسى اياسىندا جارىق كورگەن ءوڭىر اۆتورلارىنىڭ شىعارمالارى قوناقتاردىڭ نازارىنا ۇسىنىلدى.
جوبا اياسىندا حاكىم ابايدىڭ, ويشىل شاكارىمنىڭ, سۋرەتكەر اۋەزوۆتىڭ جانە وسى توپىراقتان شىققان حالىق جازۋشىسى ءا.نۇرشايىقوۆتىڭ, بالالار جازۋشىسى ءا.تولىمبەكتىڭ, قالامگەرلەر ت.ىسمايىلوۆتىڭ, ى.مۇسا ۇلىنىڭ, ب.جاقىپتىڭ, د.رامازاننىڭ, ا.كەمەلباەۆانىڭ ادەبي-كوركەم تۋىندىلارى مەن ابايتانۋشى عالىم ت.جۇرتبايدىڭ ەڭبەكتەرى تانىستىرىلدى. سونىمەن قاتار اقتامبەردى سارى ۇلى مەن دۋلات باباتاي ۇلى, ابايدىڭ اقىن ۇرپاقتارىنىڭ شىعارمالارىنان توپتاستىرىلعان «جىر جاۋھارلارى» جىر جيناعى, اباي كىتاپحاناسىنىڭ 140 جىلدىق تاريحىنا بايلانىستى سيرەك باسىلىمدار قورىنان قۇراستىرىلعان «اباي كىتاپحاناسى – سيرەك باسىلىمداردا», «حرانيتەل يستوري» اتتى قوس تومدىق جيناقتارى, رەسپۋبليكالىق «اباي» جۋرنالىنىڭ بەتتەرىندە جارىق كورگەن قۇندى ماقالالاردان جيناقتالعان «بىلگەنگە مارجان» جيناعى قويىلدى.
ءىس-شارا قوناقتارىنا 140 جىلدان استام تاريحى بار كونە كىتاپحانانىڭ سيرەك باسىلىمدار قورىنان جانە «اباي جولى» كىتاپحاناسى جوباسى اياسىندا جارىق كورگەن باسىلىمداردان ماعلۇمات بەرەتىن, كيۋار-كودتالعان شىعارمالاردى ءموبيلدى قوسىمشاعا جۇكتەۋ مۇمكىندىگى بار ۇلەستىرمە ماتەريالدار تاراتىلدى.