كوكتەمگى تاسقىن كۇشىنە مىنگەن كەزدە بۇلاندى اۋدانىنىڭ ءتورت ەلدى مەكەنىن سۋ باسىپ قالىپ, كادىمگىدەي ابىرجىتىپ تاستاعان بولاتىن. اۋىلداردان بەس جۇزدەن استام ادام قاۋىپسىز جەرگە كوشىرىلدى. مال-م ۇلىكتىڭ ءبىر پاراسى قىزىل سۋدىڭ استىندا قالىپ, قيىندىق جاعادان العاندا جابىرقاعان جۇرتقا ەل جاناشىرلىعى دەم بەرىپ وتىر.
اۋداننىڭ كاپيتونوۆكا, جۋراۆلەۆكا, ۆوزنەسەنكا, يۆانكوۆكا اۋىلدارىن توپان سۋ باستى. اشىعىن ايتقاندا, ءتامام ەل ابىرجىپ قالعانى دا راس. ءدال وسىنداي ۋاقىتتا كورسەتىلگەن جاناشىرلىقتىڭ, قاناتتى قامقورلىقتىڭ قادىرى باسىم ەكەن. ىلە اۋداندا گۋمانيتارلىق كومەك جينايتىن ارنايى 13 ورىن اشىلدى. اتام قازاق «قايعىنى بولىسسە ازايادى» دەيتۇعىن. بەينەت تە سولاي ەكەن.
– ءبىز تاسقىن سۋدىڭ سالدارىنان جەرلەستەرىمىزدىڭ قينالىپ وتىرعان ءساتىن ەستىگەننەن كەيىن قاراپ وتىرا المادىق, – دەيدى ماكينسك قالاسىنىڭ تۇرعىنى نيكولاي بوندارەنكو, – وسىندايدا كومەك قولىن سوزۋ ناعىز اعايىندىق. ءارى-بەرىدەن سوڭ ازاماتتىق پارىز سانادىق. بۇدان قيىن كەزدە دە يىعىمىزعا تۇسكەن جۇكتى بىرلەسىپ كوتەرگەن جوقپىز با؟ بۇل جولى دا تابيعاتتىڭ تارپاڭ مىنەزىن جۇمىلا كوتەرىپ, جەڭىپ شىعارىمىز ءسوزسىز.
بۇلاندىلىقتاردىڭ بەينەتىنەن قۇلاقتانعان وزگە اۋدانداردىڭ تۇرعىندارى دا جۇرەك جىلۋىن جەتكىزىپ جاتىر. تاياۋدا اۋدانعا جالپى كولەمى 17 توننا بولاتىن گۋمانيتارلىق كومەك جەتكىزىلدى. ءدال قازىر قاسقالداقتىڭ قانىنداي قات بولىپ تۇرعان تۇرمىستىق بۇيىمدار مەن ازىق-ت ۇلىكتى استانا, كوكشەتاۋ قالالارى مەن بۋراباي, ءبىرجان سال اۋداندارىنىڭ تۇرعىندارى جىبەرگەن ەكەن.
– گۋمانيتارلىق كومەكتىڭ ىشىندە كوكونىس, ءدارى-دارمەك, شارۋاشىلىق زاتتارى, ءتىپتى كومىر دە بار, – دەيدى اۋداندىق جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ ءبولىمىنىڭ باسشىسى ابىلاي جاقىپبەكوۆ, – ءدال وسىنداي ءىس-قيمىل, قامقورلىق تۇپتەپ كەلگەندە ءبىزدىڭ كۇشىمىز بىرلىكتە ەكەنىن كورسەتىپ تۇر.
جەكەلەگەن ۇجىمدار دا قول ۇشىن سوزۋدا. اۋدانداعى اۋرۋحانالار مەن بالاباقشالاردىڭ قىزمەتكەرلەرى ەرىكتىلەر رەتىندە ەل ىشىندەگى شاشىلعان زاتتاردى جيناستىرىپ, تارتىپكە كەلتىرۋگە كىرىسىپ كەتكەن. ۋاقىتشا قيىندىق وتەر-كەتەر, ال بىرلىكتى بەكەمدەر بەرەكەلى شارۋا ەل ەسىندە قالارى انىق.
اقمولا وبلىسى,
بۇلاندى اۋدانى