ەڭبەك جانە حالىقتى الەۋمەتتىك قورعاۋ مينيسترلىگى سۋ تاسقىنىنان زارداپ شەككەندەرگە وتەماقى تولەيتىنى تۋرالى مەسسەندجەرلەر مەن الەۋمەتتىك جەلىلەردە تاراتىلىپ جاتقان اقپارات شىندىققا جاناسپايتىنىن مالىمدەدى.
ناقتىلاي تۇسسەك, مينيسترلىك سۋ تاسقىنىنان زارداپ شەككەندەرگە وتەماقى تولەيتىنى تۋرالى الەۋمەتتىك جەلىلەردە جانە مەسسەندجەرلەردە جالعان اقپارات تاراپ كەتكەن-ءدى. اقپاراتتىڭ ارتىندا تۇرعان بەلگىسىز تۇلعالار تولەمدەردى الۋ ءۇشىن «تولىعىراق» باتىرماسىن باسۋدى نەمەسە سىلتەمەگە ءوتۋدى ۇسىنادى.
«مەملەكەت باسشىسىنىڭ تاپسىرماسىنا سايكەس سۋ تاسقىنىنان زارداپ شەككەن قازاقستاندىقتارعا جەرگىلىكتى اتقارۋشى ورگاندار بىرجولعى تولەم تۇرىندە كومەك كورسەتەدى. ولاردىڭ مولشەرى ءار وڭىردە كەلتىرىلگەن ماتەريالدىق زالالدى ەسەپتەۋ ءۇشىن قۇرىلعان ارنايى كوميسسيالاردىڭ شەشىمى بويىنشا جەكە-جەكە بەلگىلەنەتىن بولادى.
تيىسىنشە, حابارلامادا كورسەتىلگەن سىلتەمە الاياقتاردىڭ ازاماتتاردىڭ جەكە دەرەكتەرىن الۋ ءتاسىلى بولۋى مۇمكىن. الاياقتارمەن ءوزارا ارەكەتتەسۋدى بولدىرماۋ ءۇشىن ەشبىر جاعدايدا سىلتەمەگە وتپەۋگە كەڭەس بەرەمىز. مەملەكەتتىك قولداۋدىڭ ءتيىستى شارالارى تۋرالى رەسمي اقپارات 1414 نومىرىنەن سمس-حابارلامالار ارقىلى عانا تاراتىلاتىنىن ەستەرىڭىزگە سالامىز. ازاماتتاردى تەك رەسمي اقپارات كوزدەرىنە سۇيەنۋگە شاقىرامىز. جالعان اقپارات تاراتۋ زاڭمەن جازالاناتىنىن ەستەرىڭىزگە سالامىز», دەلىنگەن مينيسترلىكتىڭ ءباسپاسوز قىزمەتى تاراتقان رەسمي حابارلامادا.