كوكشەتاۋدا سۋ تاسقىنىنان زارداپ شەككەن تۇرعىندارعا پاتەر كىلتى تاپسىرىلدى. سالتاناتتى ءىس-شاراعا اقمولا وبلىسىنىڭ اكىمى مارات احمەتجانوۆ قاتىسىپ, مەملەكەت زالالدى ازايتۋعا قولدان كەلەتىن بارلىق جاعدايدى جاساپ جاتقانىن اتاپ ءوتتى.
– وڭىردە مەملەكەت باسشىسىنىڭ تاپسىرماسىمەن تۇرعىنداردىڭ قاۋىپسىزدىگىن قامتاماسىز ەتەتىن اۋقىمدى ءىس-شارالار قولعا الىندى. تۇرعىنداردىڭ ءوتىنىشىن ەلەپ-ەسكەرەمىز. بۇگىن پاتەر العان وتباسىلارعا اماندىق, ساۋلىق تىلەيمىن. تابيعي اپاتتاردان امان بولايىق. بارلىق قيىندىق ارتتا قالسىن, – دەدى م.احمەتجانوۆ.
مەملەكەتتىك قوردان العاشقى تۇرعىن ءۇي العانداردىڭ قاتارىندا كوپبالالى قاپاروۆ, نيكۋليندەر وتباسى بولدى. جاڭا ءۇي تۇرعىنداردىڭ كوڭىلىنەن شىققان. ويتكەنى پاتەردى وزدەرى تاڭداعان. وندا تۇرمىستا قاجەتتى كەرەك-جاراقتىڭ ءبارى بار ەكەن.
– پرەزيدەنت تاپسىرماسىمەن جەرگىلىكتى اكىمدىك ءبىزدىڭ ماسەلەمىزدى كوپ كۇتتىرمەي-اق شەشتى. تابيعي اپات ايتىپ كەلمەيدى عوي. مۇنداي جاعدايدا مەملەكەت كومەكتەسەدى دەپ سەنگەنىمىزبەن, بۇلاي جىلدام ءۇيلى بولامىز دەپ ويلامادىق. وتباسىمىز ءۇشىن بۇگىن ۇلكەن قۋانىش. بالالار ءدان ريزا. ەلدە احۋال تۇراقتالعان سوڭ, وزگە وڭىرلەردە دە ءبىز سەكىلدى وقىس جاعدايعا تاپ بولعان تۇرعىندارعا مەملەكەت كومەكتەسەدى دەپ سەنەمىز, – دەدى ساۋلە قاپاروۆا اعىنان جارىلىپ.
مەملەكەت باسشىسىنىڭ تاپسىرماسىمەن اقمولا وبلىسىندا تاسقىننان زارداپ شەككەندەردى قولداپ, تۇرعىنداردىڭ مۇلكىن قالپىنا كەلتىرۋ بويىنشا ءتيىستى ءىس-شارالار قولعا الىنعان. ياعني وڭىردە شىعىنداردى وتەۋ تۇرعىن ءۇي قاتىناستارى تۋرالى قولدانىستاعى زاڭناما شەڭبەرىندە جالعاسادى. بىرەر كۇن بۇرىن وبلىس ورتالىعىنداعى 174 وتباسى جالپى سوماسى 65 ملن تەڭگە شاماسىندا بىرجولعى تولەم العان. سونداي-اق ماتەريالدىق شىعىنداردى باعالاۋ جانە وتەۋ جونىندەگى كوميسسيا 12 وتباسىنىڭ 8 ملن تەڭگە كولەمىندە ماتەريالدىق شىعىنىن وتەۋ تۋرالى شەشىم شىعارعان. ناق قازىر ارنايى كوميسسيا وبلىستاعى وزگە دە تۇرعىن ۇيلەردىڭ جاي-كۇيىن باعالاپ, شىعىندى ناقتىلاۋ ءۇشىن تەحنيكالىق تەكسەرۋ جۇمىستارىن جالعاستىرىپ جاتىر.