مايقايىڭ كەنىشىندەگى اپات: جۇمىس بەرۋشىنىڭ كىناسى تولىق دالەلدەندى

بۇل ءىس استانا قالاسىنىڭ مامانداندىرىلعان اۋدانارالىق اكىمشىلىك سوتىندا قارالدى. 4 قاڭتاردا "مايقايىڭالتىن" اق مايقايىڭ جەراستى كەنىشىنىڭ اۋماعىندا "كااقق" جشس قىزمەتكەرلەرى اۆتوبۋس تازارتۋ كەڭىستىگىنە قۇلاپ, سالدارىنان ەكى ادام قازا تاۋىپ, قالعان ەكەۋى حابار-وشارسىز جوعالعان بولاتىن.

قر ەحاقم ەڭبەك جانە الەۋمەتتىك قورعاۋ كوميتەتى توراعاسىنىڭ 4 قاڭتارداعى بۇيرىعىمەن ەڭبەك كودەكسىنىڭ 188-بابىنىڭ 3-تارماعىنا سايكەس ەڭبەك قىزمەتىنە بايلانىستى ولىمگە اكەپ سوققان جازاتايىم وقيعانىڭ سەبەپتەرىن تەرگەۋ ماقساتىندا كوميسسيا قۇرىلدى.

تەرگەۋ قورىتىندىسى بويىنشا كوميسسيا توپتىق جازاتايىم وقيعانى تەرگەۋ اكتىسىن جاساپ, وعان جۇمىس بەرۋشىنىڭ 100 پايىز كىناسى بارى انىقتالدى.

الايدا "مايقايىڭالتىن" اق جازاتايىم وقيعاعا قاتىسى جوق ەكەنىن ايتتى.

ءىستى قاراۋ كەزىندە سوت تاۋ-كەن ماسساسىنىڭ كەڭىستىككە قۇلاۋى سالدارىنان توپتىق جازاتايىم وقيعانىڭ سەبەپتەرىنە مىنالاردى جاتقىزدى:

1. "مايقايىڭالتىن" اق جاۋاپتى تۇلعالارى تاراپىنان تاۋ-كەن جۇمىستارىنىڭ قاۋىپسىز جۇرگىزىلۋىنە وندىرىستىك باقىلاۋدى تيىسىنشە جۇزەگە اسىرماۋى.

2. تاۋ-كەن جانە گەولوگيالىق بارلاۋ جۇمىستارىن جۇرگىزەتىن قاۋىپتى وندىرىستىك وبەكتىلەر ءۇشىن ونەركاسىپتىك قاۋىپسىزدىكتى قامتاماسىز ەتۋ قاعيدالارىن بۇزا وتىرىپ, بلوكتاردى پىسىقتاۋ كەزىندە وپىرىلۋ پروتسەسىن ءتيىستى دەڭگەيدە باقىلاماۋ.

3. تالاپكەردىڭ كەن قازبالارىن پىسىقتاۋ كەزىندە قازبا بىرلىكتەرىن (بلوكتارىن) جەتىلدىرۋگە ارنالعان جوبالارى بولماعان (ازىرلەنبەگەن).

ءمان-جاي سوتتا زەرتتەلگەن تەرگەۋ ماتەريالدارىمەن, ونىڭ ىشىندە ساراپتامالار مەن كىشى كوميسسيالاردىڭ قورىتىندىلارىمەن راستالدى.

جازاتايىم وقيعا جۇمىس ۋاقىتىندا "كااقق" جشس قىزمەتكەرلەرىنىڭ ەڭبەك مىندەتتەرىن ورىنداۋ كەزىندە بولعان.

"مايقايىڭالتىن" اق جاۋاپتى تۇلعالارىنىڭ ارەكەتتەرىنەن تۋىنداعان جازاتايىم وقيعانىڭ سەبەپتەرىن نەگىزگە الا وتىرىپ, تالاپكەردىڭ 100 پايىز كىناسى بار دەپ تانىلدى. وسىعان بايلانىستى سوت ەڭبەك كوميتەتى مەن تجم ونەركاسىپتىك قاۋىپسىزدىك كوميتەتىنە تالاپ قويۋدى قاناعاتتاندىرۋدان باس تارتتى", - دەپ جازىلعان باسىلىم مالىمەتىندە.

شەشىم زاڭدى كۇشىنە ەنگەن جوق.