مەملەكەت باسشىسى قاسىم-جومارت توقاەۆ اتىراۋ قالاسىندا وتكەن «ادال ادام – ادال ەڭبەك – ادال تابىس» اتتى ۇلتتىق قۇرىلتايدىڭ ءۇشىنشى وتىرىسىندا كوپتىڭ كوكەيىندە جۇرگەن بىرقاتار ماسەلەنىڭ شەشىمىنە قاتىستى ۇتىمدى ۇسىنىستارىمەن ءبولىستى.
ءبىلىم, عىلىم, تاربيە, تاريح, بىرلىك, سالت-ءداستۇر تۋرالى كەلەلى ويلاردى ورتاعا تاستاپ, جاۋاپتىلارعا ءتيىستى تاپسىرمالاردى ورىنداۋدى مىندەتتەدى. وسى ورايدا پرەزيدەنتتىڭ قۇرىلتاي وتىرىسىندا ايتقان ەكى ماڭىزدى باستاماسىنا توقتالۋدى ءجون كوردىم.
پرەزيدەنت قازاق ءتىلىن قولداۋ, قولدانۋ اياسىن كەڭەيتۋ جانە جاستاردى كىتاپ وقۋعا باۋلۋ ماسەلەلەرىنە كەڭىرەك توقتالدى. شىنىندا, وكىنىشكە قاراي, ەكونوميكا, ءىت سالاسىندا, قارجىلىق, ديپلوماتيالىق سۇحباتتاسۋلاردا قازاق ءتىلىنىڭ قولدانىس اياسى تار ەكەنى راس. مەملەكەتتىك ءتىلدى ءبىلۋ – وتان الدىنداعى پارىزىمىز. سوندىقتان كەز كەلگەن كاسىپ, ماماندىق, لاۋازىم يەسى قازاق ءتىلىن قۇرمەتتەۋگە ءتيىس جانە ونى ءوز سالاسىندا قولدانۋدى مىندەتتەۋى كەرەك.
پرەزيدەنت ايتقانداي, قازاق ءتىلى عىلىم مەن تەحنيكانىڭ تىلىنە اينالا باستادى. قازىرگى كەزدە قازاقشا عىلىمي ەڭبەكتەر, ديسسەرتاتسيالار كوپتەپ جازىلىپ جاتىر. بۇل – قۋانارلىق ءۇردىس. ويتكەنى عىلىم ءتىلى قازاقشالانباي, وركەنيەتكە ىلەسە المايتىنىمىز انىق ەكەنىنە تولىق كوزىمىز جەتتى.
قازاق ءتىلىنىڭ قولدانىس اياسىنىڭ كەڭەيۋىنە بىردەن-ءبىر سەبەپ – ۇلت سانىنىڭ ءوسۋى. شۇكىر, ەلىمىزدە قازاقتاردىڭ جانە قازاق ءتىلىن مەڭگەرگەن ازاماتتاردىڭ ۇلەسى ارتىپ كەلەدى. تەك ءبىز جاس ۇرپاقتى ۇلتتىق تاربيەمەن سۋسىنداتىپ, ءبىلىمدى التىنشى سىنىپقا دەيىن قازاق تىلىندە بەرىپ, سودان كەيىن شەت تىلدەرىن وقىتا باستاۋىمىز قاجەت. جاستار اعىلشىن ءتىلىن ءبىلۋى كەرەك. ول الەمدىك وركەنيەتتى تانۋعا مۇمكىندىك بەرەدى. گەوساياسي جاعدايعا بايلانىستى قازاق-اعىلشىن, قازاق-ورىس, قازاق-قىتاي ءتىلماشتارىن كوپتەپ دايارلاعان ءجون. IT-كوممۋنيكاتسيا, كومپيۋتەرلىك تەحنولوگيا, روبوتتەحنيكا, جاراتىلىستانۋ, ينجەنەرلىك ءىس سالالارىندا دا قازاق ءتىلىنىڭ قولدانۋ اياسىن كەڭەيتسەك, قازاق ءتىلى جاڭا تەحنولوگيا مەن ينتەرنەت تىلىنە جىلدام اينالادى.
ءبىز قازاقشا سويلەۋمەن قاتار قازاقشا كوركەم جازا ءبىلۋىمىز كەرەك. ول ءۇشىن كىتاپتى كوبىرەك وقۋىمىز قاجەت. جاتا-جاستانىپ كىتاپ وقىعان اعا بۋىن جولىن جالعاستىراتىن جاستار از. ارينە, ينتەرنەت زامانىندا قاجەتتىلىك جوق دەيتىندەر تابىلار. دەگەنمەن دە اباي اتامىزدان «ارتىق ءبىلىم كىتاپتا, ەرىنبەي وقىپ كورۋگە» دەگەن ناقىل قالعان. رۋحاني ازىقتىڭ باستاۋى كىتاپتىڭ ادام ومىرىندەگى الاتىن ورنى بولەك.
كىتاپ وقۋ جاڭا الەمنىڭ ەسىگىن اشقانمەن بىردەي. جاقسى كىتاپ جاڭا ادەتتەر قالىپتاستىرۋعا, ويىمىزدىڭ ۇشقىر بولۋىنا, بيىكتى باعىندىرۋعا, كوركەم سويلەۋگە, جازۋعا ۇيرەتەدى. كىتاپ وقىعان سايىن ءبىلىمىمىز جاڭارىپ وتىرادى, پىكىر تۋدىرادى.
پرەزيدەنت قۇرىلتايدا كىتاپحانا تۋرالى دا جاقسى ايتتى. وقىرماننىڭ رۋحاني تالاپ-تىلەگىن قاناعاتتاندىراتىن, ۇلتتىق, الەمدىك ادەبي-عىلىمي اقپارات كوزدەرىن تولىق جيناقتاپ, وقىرمانعا ۇسىناتىن زاماناۋي كىتاپحانالاردى سالۋ – زامان تالابى. ەلىمىزدىڭ بولاشاعى جاستار دەسەك, سول جاستار ۇلتتىق تاربيەنى, كىتاپقۇمارلىقتى بويىنا ءسىڭىرىپ, ءبىلىم مەن عىلىمدى شەبەر يگەرسە, قازاقستاننىڭ وزىق مەملەكەتتەر قاتارىندا بولۋىنا ءوز ۇلەسىن قوساتىندارى انىق.
كەنجەعالي شيلىبەك,
تەحنيكا عىلىمدارىنىڭ كانديداتى, تاراز قالالىق ءماسليحاتىنىڭ دەپۋتاتى
تاراز قالاسى