زورلىققا – زور جازا

استانا قالاسىنان كەيىنگى 5 ايدا 2 مىڭنان اسا قوڭىراۋ كەلىپ ءتۇسىپ, حابار يەلەرى زورلىقتان قۇتقارۋدى وتىنگەن. وكىنىشتىسى, بىلەگىنىڭ كۇشىن ايەلىنە باتىرىپ, تاياقتاپ, باسسىزدىققا سالىنىپ, بالاسىن سابايتىندار ەلىمىزدە كۇن ساناپ كوبەيىپ بارادى.

پرەزيدەنت ق.توقاەۆ قول قوي­عان «ايەلدەردىڭ قۇقىقتارىن جانە بالالاردىڭ قاۋىپسىزدىگىن قامتاماسىز ەتۋ تۋرالى» زاڭدى ءماجىلىس دەپۋتاتتارى 2023 جىل­دىڭ قىركۇيەگىندە مەملەكەت باسشىسىنىڭ تۇرمىستىق زورلىق-زومبىلىققا جاۋاپكەرشىلىكتى كۇشەيتۋدى تاپسىرعان جولداۋى­نان كەيىن ازىرلەگەن بولاتىن.

قۇجاتتى دايىنداۋعا بالا قۇقىقتارى جونىندەگى ۋاكىل دينارا زاكيەۆا, پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ مۇشەلەرى, سون­داي-اق ۇلتتىق قۇرىلتاي­دىڭ مۇشەلەرى بەلسەنە اتسالىس­تى. پار­لامەنت ماجىلىسىندەگى تال­قى­لاۋلارمەن قاتار سەناتتا عانا جيىرماعا جۋىق جۇمىس وتىرىسى ءوتىپ, جان-جاقتى تالقىلاندى. سون­دىقتان ءيىنى قانعان زاڭداردىڭ ءبىرى دەۋگە تولىق نەگىز بار.

نەگىزگى زاڭنامالىق جاڭا­شىلدىقتارعا توقتالساق, تۇرمىس­تىق زورلىق-زومبىلىقتى كريميناليزاتسيالاۋ, بالالارعا قاتىستى زورلىق-زومبىلىقتىڭ بارلىق ءتۇرى ءۇشىن جازانى كۇشەيتۋ جانە ونىمەن كۇرەسۋدە الدىن الۋ شارا­لارىنىڭ تۇتاس كەشەنى بار.

ايەلدەر مەن بالالاردىڭ قۇ­قىقتارىن قورعاۋ – مەملەكەتتىك ساياساتتىڭ باسىم باعىتتارىنىڭ ءبىرى. مەملەكەت باسشىسى بۇل ماسەلەگە باسا نازار اۋدارىپ كەلەدى. ۇلتتىق قۇرىلتايدىڭ ءۇشىنشى وتىرىسىندا پرەزيدەنت تۇرمىستىق زورلىق-زومبىلىقپەن كەشەندى كۇرەس ىزگىلىك جولىنداعى قوعام كەلەشەگىنىڭ كەپىلى ەكەنىن اتاپ ءوتتى.

تۇرمىستىق زورلىق-زومبىلىق پەن بۋلينگتەن زارداپ شەككەندەرگە كومەك كورسەتەتىن 111 سەنىم تەلەفونىنىڭ ىسكە قوسىلعانىنا جارتى جىل ءوتتى. ورتالىققا وسى كۇنگە دەيىن 10 مىڭنان اسا ادام جۇگىنگەن ەكەن. جاڭا زاڭ مۇنداي وكىنىشتى كورسەتكىشتىڭ كەمۋىنە كومەكتەسەدى دەگەن سەنىم مول.

بيبىگۇل جەكسەنباي,

سەنات دەپۋتاتى