بۇگىنگى قوعامدا ايەل مەن بالاعا قاتىستى زورلىق-زومبىلىق ءۇشىن جازانى قاتاڭداتۋ زاماننىڭ تالابى مەن سۇرانىسىنا سايكەس تۋىنداپ وتىرعانىن ۇمىتپاۋىمىز قاجەت. ويتكەنى قوعامداعى قوردالانعان ماسەلە وسىنداي زاڭدى قابىلداۋعا اكەلدى.
بۇل ماسەلە قوعامدا قىزۋ تالقىلانىپ, وسى باعىتتاعى زاڭنامالاردى جەتىلدىرۋ قاجەتتىگى ايقىندالدى. ساراپشىلار, قوعام بەلسەندىلەرىنىڭ پىكىرى ەسكەرىلگەن زاڭنىڭ باستى مىندەتى بالالار قاۋىپسىزدىگىن قامتاماسىز ەتۋ ماسەلەلەرى بويىنشا مەملەكەتتىك ساياساتتىڭ قۇقىقتىق, ەكونوميكالىق, الەۋمەتتىك جانە ۇيىمداستىرۋشىلىق نەگىزدەرىن جەتىلدىرۋ, ايەلدەر مەن بالالارعا قاتىستى قىلمىستىڭ الدىن الۋ جانە جولىن كەسۋ دەگەن ورتاق مۇددەدە توعىستى.
مەملەكەت باسشىسىنىڭ ۇستانىمى ايقىن – زاڭنىڭ ۇستەمدىگىن بەلگىلەۋ جانە زاڭ نورمالارى ساقتالاتىن ادىلەتتى قوعام قۇرۋ. پرەزيدەنت ۇسىنعان زاڭ جانە ءتارتىپ قاعيداتى بارلىق ماسەلە قۇقىقتىق سالادا شەشىلۋى كەرەك دەگەندى بىلدىرەدى.
قۇجاتتىڭ ماقساتى – مەملەكەت باسشىسىنىڭ ايەل مەن بالاعا قاتىستى زورلىق-زومبىلىقتىڭ كەز كەلگەن كورىنىسى ءۇشىن جاۋاپكەرشىلىكتى قاتاڭداتۋ, وتباسى ينستيتۋتىن نىعايتۋ جانە كامەلەتكە تولماعانداردىڭ قاۋىپسىزدىگىن قامتاماسىز ەتۋ. ونىڭ ىشىندە بالا قۇقىقتارى جونىندەگى ۋاكىلدىڭ قىزمەتىن ودان ءارى جەتىلدىرۋ جونىندەگى تاپسىرمالارىن ىسكە اسىرۋعا باعىتتالعان.
زاڭ شىعارۋشى ورگان قوعامنىڭ سۇرانىسىنا سايكەس جازا تۇرلەرىن انىقتادى. قاتاڭ جازا – قىلمىستىڭ الدىن الۋدىڭ جانە قوعامدى قاۋىپتى قىلمىسكەرلەردەن قورعاۋدىڭ ءتيىمدى ءادىسى. قۇجاتتا, ەڭ الدىمەن, قىلمىستىڭ الدىن الۋعا جانە ازاماتتاردىڭ قۇقىقتارىنىڭ ادىلدىگى مەن قورعالۋىن قامتاماسىز ەتۋگە باعىتتالعان شارالار كەشەنى كوزدەلگەن. سونىمەن قاتار ەنگىزىلگەن تۇزەتۋلەر بالالاردىڭ قۇقىقتىق ساناسىن قالىپتاستىرۋعا ارنالعان. كامەلەتكە تولماعانداردى قورقىتۋ جانە كيبەربۋللينگ ءۇشىن اكىمشىلىك جاۋاپكەرشىلىك ەنگىزىلدى. كامەلەتكە تولماعاندار اراسىندا بۋللينگ ءجيى كەزدەسەدى. وسىعان بايلانىستى ءبىلىم بەرۋ ۇيىمىندا ۇزاق ۋاقىت بويى بۋللينگكە قارسى تۇرۋدىڭ زاڭدى تەتىكتەرى بولعان جوق. ولار تەك پروفيلاكتيكالىق سويلەسۋمەن, مەكتەپتە ەسەپكە الۋمەن شەكتەلۋگە ءماجبۇر بولدى.
قۇجاتقا ايەلدەر مەن بالالارعا قاتىستى كەز كەلگەن سيپاتتاعى زورلىق-زومبىلىق ءۇشىن جاۋاپكەرشىلىكتى قاتاڭداتاتىن, سونداي-اق وتباسى ينستيتۋتىن, كامەلەتكە تولماعانداردىڭ قاۋىپسىزدىگىن نىعايتاتىن نورمالار ەنگىزىلدى.
ەندىگى جەردە اتالعان زاڭ ءوز دەڭگەيىندە ورىندالادى دەپ سەنەمىز. سەبەبى زاڭ ورىندالۋىمەن ماڭىزدى.
رۋسلان رۇستەموۆ,
سەنات دەپۋتاتى