اتىراۋ وبلىسىنىڭ جىلىوي اۋدانىنان ەۆاكۋاتسيالانعان 7 445 ادام «تەڭىز» كەن ورنىنداعى جاتاقحانالاردا تۇرىپ جاتىر. ونىڭ ىشىندە 3 مىڭنان اسا بالا بار. بالالاردىڭ كوپشىلىگى – مەكتەپ وقۋشىلارى.
«تەڭىزشەۆرويل» جانە مەردىگەر كومپانيالار جىلىويلىق تۇرعىندارعا قولايلى جاعداي جاسادى. ال وقۋشىلاردى قاشىقتان وقىتۋدى جالعاستىرۋ ءۇشىن جوعارى جىلدامدىقتى ينتەرنەتپەن قامتاماسىز ەتىپ وتىر.
قۇلسارى قالاسىنىڭ تۇرعىنى نازىم قالدىبەكوۆا 6 ساۋىردە بالالارىمەن بىرگە «تەڭىزگە» ەۆاكۋاتسيالانعان. سول كەزدە بالالارىنىڭ ساباعىنا الاڭداعانىن جاسىرمايدى.
«قازىر بۇل ماسەلە رەتتەلدى. ەندى بالالارىم تاڭعى استان كەيىن ساباق وقۋعا كىرىسەدى. جىلدامدىعى جوعارى ينتەرنەت بار. بالالار وقۋ باعدارلاماسىن تولىق مەڭگەرۋ ءۇشىن كەز كەلگەن سايتتى پايدالانا الادى», دەيدى ن.قالدىبەكوۆا.
كوپبالالى انانىڭ ءبىرى قىرمىزى جۇماعالي كەن ورنىنداعى جاتاقحاناعا 7 ساۋىردە كەلگەن. بەس بالاسىنىڭ ۇشەۋى ونلاين ءبىلىم الۋعا كىرىستى.
«بالالاردىڭ ونلاين ءدارىس الۋىنا بارلىق جاعداي جاسالىپ وتىر. ساباققا قاجەتتى كەڭسە تاۋارلارىمەن قامتاماسىز ەتىلدى. ۇستەلدەر بالالاردىڭ ساباق وقۋىنا ىڭعايلى ەتىپ جابدىقتالعان. بۇل – بالالارعا قيىن جاعدايلارعا قاراماستان وقۋىن جالعاستىرۋىنا مۇمكىندىك بەرەتىن ماڭىزدى قادام», دەيدى ق.جۇماعالي.
ال 6-سىنىپ وقۋشىسى كاۋسار قىدىرعالي قۇلسارى قالاسىنداعى يۋ.گاگارين اتىنداعى ورتا مەكتەپتە وقىعان. قازىر كەن ورنىنا كەلگەندىكتەن, سىنىپتاستارىن ساعىنىپ ءجۇر ەكەن.
«ساباقتى ونلاين وقىساق تا ءوزىمدى مەكتەپتەگىدەي سەزىنەمىن. كەن ورنى ۇنادى. اسحاناداعى تاعامدار دا ءدامدى ەكەن. دوستارىمىزدىڭ كەيبىرىمەن كەزدەسىپ, سەرۋەندەۋگە ۋاقىت تاۋىپ ءجۇرمىز», دەيدى كاۋسار.
كەن ورنىندا مەردىگەر كاسىپورىندار از ەمەس. سونىڭ ءبىرى – «اspar Kashagan» جشس. بۇل سەرىكتەستىكتىڭ جاتاقحانالارىنا ۇلكەندەرمەن بىرگە 200-دەن اسا بالا ورنالاسقان. ولاردىڭ اراسىندا مەكتەپ جاسىنداعى وقۋشىلار كوپ.
ء«بىز وقۋشىلاردىڭ كەدەرگىسىز ءبىلىم الۋىنا قاجەتتى جاعدايدى جاساپ, بارلىق قولداۋدى كورسەتە بەرەمىز. مەكتەپ جاسىنا جەتپەگەن بالالار ءۇشىن ەرىكتىلەردىڭ كومەگىمەن ويىن-ساۋىق ءىس-شارالارىن ۇيىمداستىرۋدى قولعا الدىق. بالالار قاۋىپسىزدىك پەن جايلىلىقتى سەزىنىپ, الاڭسىز وينايدى. ولاردىڭ سەرۋەندەۋىنە دە مۇمكىندىك بار», دەدى سەرىكتەستىكتىڭ وندىرىستىك ماسەلەلەر جونىندەگى مەنەدجەرى سالتانات سۇلەيمەنوۆا.
اتىراۋ وبلىسى