دەنساۋلىق ساقتاۋ مينيسترلىگىنىڭ كۋرورتولوگيا جانە مەديتسينالىق وڭالتۋ عزي قاتىسۋىمەن كومەك شەڭبەرىندە زارداپ شەككەندەردى تەگىن قابىلدايتىن 16 ساناتوريلىك-كۋرورتتىق ۇيىم ايقىندالدى, دەپ حابارلايدى Egemen.kz.
مينيسترلىكتىڭ ءمالىم ەتۋىنشە ولاردىڭ 12-ءسى تۇركىستان وبلىسىندا ورنالاسقان. جالپى العاندا, اتالعان نىساندار ءبىر مەزەتتە 190 ادامدى قابىلداي الادى, وڭالتۋ كۋرسى 10-نان 14 كۇنگە دەيىن بولادى, بۇل زارداپ شەككەندەردى مۇمكىندىگىنشە ساناتوريلىك ەمدەۋمەن قامتۋعا مۇمكىندىك بەرەدى.
اتالعان مينيسترلىككە قاراستى كۋرورتولوگيا جانە مەديتسينالىق وڭالتۋ عزي ساناتوريلەردە دەرەۋ ورنالاستىرىلۋعا ءتيىس ادامداردىڭ ءتىزىمىن ۇسىنۋ قاجەتتىگى تۋرالى جەرگىلىكتى اتقارۋشى ورگانداردى قۇلاعدار ەتتى.
سۋ تاسقىنىنان زارداپ شەككەندەردىڭ بارلىعىنا, ونىڭ ىشىندە بالالارعا قاجەتتى مەديتسينالىق كومەك جانە پسيحولوگيالىق وڭالتۋ كورسەتىلەدى.