استانا. 19 ءساۋىر. اقش پەن ەۋروپا وداعى اراسىنداعى ەركىن ساۋدا جونىندەگى كەلىسىمگە قول قويىلۋىنا قارسىلىق اكتسياسى رەتىندە ءوتىپ جاتقان شەرۋلەرگە جاھاننىڭ كوپتەگەن ەلدەرىندە الدەنەشە ونداعان ادام قاتىستى. بۇل تۋرالى Sputnik اگەنتتىگى حابارلادى.
اگەنتتىكتىڭ مالىمەتىنشە, ترانساتلانتيكالىق ساۋدا-ينۆەستيتسيالىق ارىپتەستىك تۋرالى كەلىسىمگە كۇللى الەمنىڭ 700 جەرىندە قارسىلىق شەرۋلەرى بولىپ وتكەن. قارسىلىق بىلدىرۋشىلەردىڭ ەڭ كوپ قاراسى يسپانيادان كورىنگەن. وندا ءمادريدتىڭ كوشەلەرىنە 20 مىڭ ادام شىقسا, بارسەلونادا ولاردىڭ قولداۋشى 4 مىڭعا جۋىق ادام تابىلعان. ەۋروپارلامەنت دەپۋتاتى, يسپاننىڭ «سولشىلدار بىرلەستىگى» پارتياسىنىڭ مۇشەسى مارينا البيول كەلىسىمگە قول قويىلۋىن «ازاماتتاردىڭ قۇقىقتارىن سىپىرىپ كەتەتىن داۋىلعا» تەڭەگەن. «ءبىزدىڭ ماقساتىمىز – بۇعان جول بەرمەۋ. كەلىسىمگە قول قويىلماي تۇرعاندا, ءبارىن جوندەپ الۋعا بولادى», - دەگەندى قوستى ول.
«گەرمانياداعى ميتينگىلەر دە كوپ ادامنىڭ قاتىسۋىمەن ءوتتى,» - دەپ حابارلايدى Reuters. – بەرليندە 1,5 مىڭ ادام پوتسدام الاڭىنان براندەنبۋرگ قاقپاسىنا دەيىن جاندى شەڭبەر قۇرىپ تۇردى. ميۋنحەننىڭ كوشەلەرىمەن ءۇش مىڭعا تاياۋ ادام ءجۇرىپ ءوتتى. وسىنداي اكتسيالار لەيپتسيگ, شتۋتگارت, فرانكفۋرت قالالارىندا دا ورىن الدى.
ترانساتلانتيكالىق ساۋدا-ينۆەستيتسيالىق ارىپتەستىك تۋرالى كەلىسىمنىڭ ماقساتى اقش پەن ەو اراسىندا ەركىن ساۋدا ايماعىن قۇرۋ بولىپ تابىلادى. مۇنداي جوبا جونىندەگى يدەيانى ەۋروپا ەلدەرى 2013 جىلدان باستاپ كوتەرىپ كەلەدى. الايدا, ەۋرووداقتاعى كوپتەگەن ەلدەردىڭ تۇرعىندارى بۇعان قارسى.
مۇرات ايتقوجا.
دەرەك, سۋرەت: Sputnik.