براكونەر «قامقورشىسىن» ۇستاۋ مۇمكىن بە؟

بالىق شارۋاشىلىعى كوميتەتى تور­اعاسىنىڭ ورىنباسارى ايان باحيا­نوۆ­تىڭ ايتۋىنشا, ناۋرىزدا اۋىل شارۋا­شىلىعى جانە ىشكى ىستەر مينيسترلەرى مەن ۇلتتىق قاۋىپسىزدىك كوميتەتى توراعا­سىنىڭ بىرلەسكەن بۇيرىعى شى­عا­رىلعان. سوعان سايكەس ۇيلەستىرۋ شتابى­نىڭ قۇرامى مەن جايىق-كاسپي سۋ باس­سەينىندە كەڭ اۋقىمدى بالىق قورعاۋ اكتسياسىن وتكىزۋ جونىندەگى بىرلەسكەن ءىس-قيمىل جوسپارى بەكىتىلدى.

«مۇنداي بىرلەسكەن جۇمىس بەكىرە جانە باسقا بالىق تۇرلەرىن ساقتاۋدا وڭ ناتيجە بەرەدى. ءىس-شارانى جۇزەگە اسىرۋ ازىق-ت ۇلىك قاۋىپسىزدىگىنىڭ ماڭىزدى فاكتورى رەتىندە بالىق شارۋاشىلىعىن ودان ءارى دامىتۋعا, تابىس كوزى رەتىندە الەۋ­مەتتىك ماسەلەلەردى شەشۋگە, جەر­گى­لىكتى تۇرعىنداردى جۇمىسپەن قامتۋدى قا­م­تاماسىز ەتۋگە مۇمكىندىك بەرەدى. اكتسياعا باتىستاعى ءۇش وبلىستان 1 177 قىزمەتكەر جۇمىلدىرىلىپ وتىر. ماسەلەن, 374 قىزمەتكەر اتىراۋدا, 254 قىزمەتكەر باتىس قازاقستان وڭىرىندە, ال 549 مامان مەن اسكەري قىزمەتشى ماڭعىستاۋ وبلىسىنىڭ اۋماعىندا اكتسيانىڭ ءساتتى وتۋىنە اتسالىسادى», دەدى ا.باحيانوۆ.

ونىڭ ايتۋىنا قاراعاندا, اكتسيا اياسىندا براكونەرلىك فاكتىلەر ءجيى بايقالۋى ىقتيمال اۋماقتاردا جىلجىمالى بەكەتتەر مەن ءموبيلدى رەيدتىك توپتار ۇيىمداستىرىلادى. وسىعان بايلانىستى نەگىزگى كۇشتەر مەن قۇرالدار كاسپي تەڭىزىنىڭ جاعالاۋى مەن اكۆاتورياسىندا, جايىق پەن قيعاش وزەندەرىنىڭ ساعالىق كەڭىستىگىندە شوعىرلانادى.

«وتكەن جىلى ءۇش وڭىردەگى «بە­كى­رە­-2023» بالىق قورعاۋ اكتسيا­سى كەزىندە 972 قۇقىق بۇزۋشىلىق انىقتالدى. قۇقىق بۇزعان 669 ادام اكىمشىلىك جاۋاپ­كەر­شىلىككە تارتىلىپ, ولارعا 15,7 ملن تەڭگە ايىپپۇل سالىندى. زاڭسىز اينا­لىمنان 68,3 توننا بالىق الىندى. ونىڭ ىشىندە 1 توننا بەكىرە تۇقىمداس بالىق تۇرلەرى, 29,5 كگ بەكىرە تۇقىمداس بالىقتاردىڭ ۋىل­دى­رىعى بار. تابيعات قورعاۋ زاڭدىلىعىن بۇز­عان­داردان 1038 ءتۇرلى بالىق اۋلاۋ, 89 ءجۇزۋ جانە كولىك قۇرالى تاركىلەندى», دەپ ءمالىم ەتتى ا.باحيانوۆ.

اتىراۋ وبلىسىنىڭ پوليتسەيلەرى «بەكىرە-2024» بالىق قورعاۋ اكتسياسىنا بەلسەنە كىرىستى. ءتارتىپ ساقشىلارى اتىراۋدان باتىس قازاقستان, اقتوبە, ماڭعىستاۋ جانە رەسەيدىڭ استراحان وبلىسىنا قاتىنايتىن جولمەن جۇرە­تىن كولىكتەرگە باقىلاۋ جۇرگىزەدى. مۇن­داي باقىلاۋدان يندەر اۋدانىنا, يسا­تاي اۋدانىنداعى جانباي, اتىراۋ قالا­سى­نىڭ ماڭىنداعى دامبى اۋىلىنا قاتى­نايتىن جول دا تىس قالمايدى.

«بالىق قورعاۋ ءىس-شاراسى كەزىندە شە­كارا ماڭىنداعى مەملەكەتتەردىڭ ءتيىستى ورگاندارىمەن ىنتىماقتاستىق اياسىندا ۇيىمداسقان قىلمىستىق توپتار ارە­كە­تىنىڭ جولىن كەسۋگە, زاڭسىز اۋلانعان بالىق ونىمدەرىن ساتىپ الۋ جانە ساتۋ نارىعىن جويۋعا باسا ءمان بەرىلەدى. براكونەرلەرگە «قامقورشىلىق» تانىتاتىن لاۋازىمدى تۇلعالاردى انىقتاۋعا باعىتتالعان ارنايى جەدەل-ىزدەستىرۋ ءىس-شاراسى وتكىزىلەدى», دەپ حابارلادى دەپارتامەنتتىڭ ءباسپاسوز قىزمەتى.

ال بالىق شارۋاشىلىعى كوميتەتى 2 ساۋىردە اتىراۋدا بىرلەسكەن رەيد وتكىزدى. وعان وبلىستىق پوليتسيا دە­پار­­تامەنتى مەن مامانداندىرىلعان پرو­كۋ­راتۋرانىڭ قىزمەتكەرلەرى قاتىس­تى. رەيد كەزىندە مۇنايلى شاھار­عا تاياۋ ورنالاسقان دامبى اۋىلى ماڭىن­داعى ەكى وزەكتىڭ بويى تەكسەرىلدى.

«تۇنگى ساعات 00.50-دە جايىق وزەنىنىڭ تارايتىن وزەكتىڭ جاعاسىنان 313 كيلو­­گرامنان استام بەكىرە تابىلدى. برا­كونەرلەر 14 قاپقا سالىنعان باعالى بالىقتى قامىس اراسىنا جاسىرىپ كەتىپتى. ال ساعات 06.00-دە بەكىرە تابىلعان تۇستان شامامەن 400 مەتر قاشىقتا وزەن جاعاسىنا بەكىتىلگەن اسپالى موتورى بار 8 ءجۇزۋ قۇرالى تابىلدى. ونىڭ ىشىندە ءۇش «ياماحا-200», ءبىر «ياماحا-225» جانە ءتورت «بايدا» قايىعى بار. يەسىز ءجۇزۋ قۇرالدارى تاركىلەندى», دەگەن اقپارات تاراتتى كوميتەتتىڭ ءباسپاسوز قىزمەتى.

زاڭسىز اۋلانعان بەكىرەگە بايلانىستى دەرەك قىلمىستىق كودەكتىڭ 339-بابىنىڭ 1-بولىگىمەن سوتقا دەيىنگى تەرگەپ-تەكسەرۋدىڭ بىرىڭ­عاي تىزىمىنە تىركەلىپ وتىر. باعالى بالىق قورىنا كەلتىرىلگەن زالال شامامەن – 173 505 540 تەڭگە.

اتىراۋ وبلىسى