قازاقستاننىڭ 30 جاستاعى تانىمال تەننيسشىسى زارينا دياس ەكى جىلعا سوزىلعان ۇزىلىستەن كەيىن ۇلكەن سپورتقا قايتا ورالدى. ول 12-13 ءساۋىر ارالىعىندا توكيودا وتەتىن دەۆيس كۋبوگىنىڭ ىرىكتەۋ سايىسىندا جاپونيا قۇراماسىنا قارسى وينايدى.
جوعارىداعى جاڭالىقتى ەستىگەن جانكۇيەرلەر كادىمگىدەي قۋانىپ قالدى. ونىڭ وزىندىك سەبەبى دە بار. بۇل كۇندەرى ءتۇرلى حالىقارالىق تۋرنيردە تابىستى ونەر كورسەتىپ جۇرگەن تەننيسشىلەرىمىزدىڭ دەنى لەگيونەرلەر ەكەنى بەلگىلى. ال زارينا – ءوزىمىزدىڭ ءتول تۇلەگىمىز. ونىڭ اتا-اناسى 1999 جىلى جۇمىس بابىمەن چەحياعا قونىس اۋداردى. سپورتتىق كارەراسىن سول جاقتا باستاعان دياس بىرتە-بىرتە ءوز قاتارلاستارى اراسىندا دارالانا باستادى. وتانداسىمىز اۋەلى پراگاداعى, ودان كەيىن گۋانچجوۋداعى تەننيس اكادەميالارىندا شەبەرلىگىن شىڭدادى.
جاسوسپىرىمدەر مەن جاستار بۋىنى اراسىنداعى جارىستاردا ەلەۋلى تابىستارعا قول جەتكىزگەننەن كەيىن دياس ايەلدەردىڭ باسەكەسىندە باق سىناي باستادى. بۇل رەتتە ول ءوزىن جاقسى قىرىنان كورسەتتى. «ۇلكەن دۋلىعا» ساناتىنداعى تۋرنيردەگى جەرلەسىمىزدىڭ ەڭ زور تابىسى – 2014 جانە 2015 جىلدارى ۋيمبلدوننىڭ ءتورتىنشى كەزەڭىنە دەيىن جەتۋى. اۋستراليا (2014, 2015, 2020, 2021) مەن اقش-تىڭ (2014) اشىق بىرىنشىلىكتەرىنىڭ ءۇشىنشى اينالىمىندا ونەر كورسەتتى. WTA دوداسىندا ءبىر رەت دارا شىعىپ, ITF تۋرنيرلەرىندە توعىز رەت توپ جاردى. 2015 جىلدىڭ باسىندا زارينا الەمدىك رەيتينگتە 31-ورىنعا كوتەرىلدى.
2021 جىلدان بەرى جەرلەسىمىزدىڭ سپورتتىق كارەراسىندا قۇلدىراۋ كەزەڭى باستالدى. ول ءدۇبىرلى دودالاردا ءجيى جەڭىلدى. سونىڭ سالدارىنان WTA رەيتينگىندەگى جاعدايىن ناشارلاتىپ الدى. كەيىننەن زارينانىڭ جاراقاتى بولعانىن بىلدىك. ەگەر ەمدەلمەسە, ويىنى جۇرمەيتىنىنە انىق كوز جەتكىزگەننەن كەيىن ويىنشى دەنساۋلىعىن دۇرىستاۋعا كىرىستى. مىنە, ەندى, جاراقاتىنان تولىقتاي ايىققاننان سوڭ قايتا كورتقا شىقپاق. جۋىردا قازاقستان كومانداسىنىڭ كاپيتانى يۋري شۋكين زارينا دياستى دەۆيس كۋبوگىنىڭ ىرىكتەۋ سايىسىندا كۇش سىناساتىنداردىڭ تىزىمىنە قوستى.